ЁВА 22 - Біблія (пераклад А.Бокуна)

Ёў 22

¹ І адказаў Эліфаз з Тэману, і сказаў:

² «Ці можа чалавек быць карысным Богу? Разумны ледзь самаму сабе можа быць карысным.

³ Што за карысьць Усемагутнаму, калі ты праведны, або што Яму дасьць, калі шлях твой беззаганны?

⁴ Ці ж за пабожнасьць тваю Ён карае цябе і ідзе на суд з табою?

⁵ Ці ж не за ліхоту тваю і незьлічоныя злачынствы твае?

⁶ Бо ты браў заклад ад братоў тваіх ні за што і з голых зьдзіраў адзеньне.

⁷ Ты не даваў вады сасьмягламу, і галоднаму адмаўляўся даваць хлеба.

⁸ Моцнаму чалавеку даваў ты зямлю, і заможны пасяляўся на ёй,

⁹ а ўдоваў адсылаў ты з пустымі рукамі, і сіротаў абцяжарваў работамі.

¹⁰ Дзеля таго акружаны ты пасткамі, і трывожыць цябе страх неспадзяваны,

¹¹ і ў цемры ты ня бачыш, і вада вялікая залівае цябе.

¹² Ці ж Бог не вышэйшы за неба? Паглядзі ўгару на зоркі, як яны высока!

¹³ А ты кажаш: “Што ведае Бог? Ці праз імглу Ён можа судзіць?

¹⁴ Хмары — заслона Яму, так што ня бачыць Ён і ходзіць па скляпеньні нябесным”.

¹⁵ Ці ты будзеш трымацца сьцежкі старадаўняй, па якой хадзілі злачынцы,

¹⁶ якія заўчасна былі зьнішчаныя, бо паводка падмыла падваліны іхнія?

¹⁷ Яны казалі Богу: “Адыйдзіся ад нас! Што можа зрабіць нам Усемагутны?”

¹⁸ А Ён багацьцем напоўніў дамы іхнія. Але няхай будзе далёкая ад мяне рада бязбожных.

¹⁹ Праведнікі будуць бачыць гэта і цешыцца, і чалавек нявінны будзе сьмяяцца з іх:

²⁰ “Сапраўды вынішчаны супраціўнік наш, а багацьце іхняе спаліў агонь”.

²¹ Дык пагадзіся з Ім, і мей супакой, і праз гэта прыйдзе да цябе добрае.

²² Вазьмі з вуснаў Ягоных закон і палажы словы Ягоныя ў сэрцы тваім.

²³ Калі навернешся да Усемагутнага, адновішся і адкінеш злачыннасьць ад намёту твайго,

²⁴ калі ацэніш золата як парахно, а [золата] Афіру — як камень з ручая,

²⁵ тады Усемагутны будзе золатам тваім і бліскучым срэбрам для цябе.

²⁶ Тады захапляцца ты будзеш Усемагутным і падымеш да Бога аблічча тваё.

²⁷ Будзеш прасіць Яго, і Ён выслухае цябе, і ты споўніш абяцаньні твае.

²⁸ Што пастановіш, прыйдзе да цябе, і на шляхах тваіх будзе сьвяціць сьвятло.

²⁹ Бо Ён паніжае таго, хто пыхлівы, а хто схіляе вочы, той будзе збаўлены.

³⁰ Ён ратуе [нават] таго, хто не без віны, і будзе ён уратаваны дзеля чыстасьці рук сваіх».