ЁВА 13 - Біблія (пераклад А.Бокуна)

Ёў 13

¹ Усё гэта бачыла вока маё, і чула вуха маё, і ўсё зразумела.

² Тое, што вам вядома, і я ведаю, і я ня горшы ад вас.

³ Я хачу гаварыць з Усемагутным і прагну Богу прадставіць [справу маю].

⁴ Бо вы задумалі няпраўду, вы — лекары, нічога ня вартыя.

⁵ Калі б вы маўчалі, вы зьявілі б гэтым мудрасьць!

⁶ Паслухайце скаргу маю і зважце на адказ вуснаў маіх.

⁷ Ці належала вам дзеля Бога казаць няпраўду і дзеля Яго гаварыць хлусьліва?

⁸ Ці належала вам быць крывадушнымі дзеля Яго, і за Бога на судзе спрачацца?

⁹ Ці добра будзе, калі Ён вас будзе выспрабоўваць? Ці зможаце з Яго насьміхацца, як насьміхаюцца з чалавека?

¹⁰ Ён, караючы, пакарае вас, калі будзеце патаемна зважаць на аблічча.

¹¹ Няўжо веліч Ягоная не палохае вас, і страх Ягоны не агартае вас?

¹² Напаміны вашыя — гэта словы з попелу, а вежы вашыя — вежы гліняныя.

¹³ Памаўчыце крыху, а я буду гаварыць, і няхай што заўгодна прыйдзе на мяне.

¹⁴ Навошта мне кусаць цела маё зубамі маімі і душу маю трымаць рукамі маімі.

¹⁵ Хоць бы і забіў мяне [Бог], буду мець у Ім надзею і буду абараняць шляхі мае перад абліччам Ягоным.

¹⁶ У гэтым будзе збаўленьне маё, бо ніводзін бязбожнік ня прыйдзе перад аблічча Ягонае.

¹⁷ Слухайце ўважліва словы мае, і няхай будзе ў вушах вашых тлумачэньне маё.

¹⁸ Бо я пачаў суд, і ведаю, што [буду] апраўданы.

¹⁹ Хто будзе судзіцца са мной? Тады я змоўкну, і [гатовы] памерці.

²⁰ Дзьвюх толькі рэчаў не рабі са мною, і тады я ня буду хавацца ад аблічча Твайго:

²¹ аддалі руку Тваю ад мяне, і жах Твой няхай не палохае мяне.

²² Пакліч мяне, і я адкажу Табе, або я буду гаварыць, а Ты адкажы мне.

²³ Якія грахі і правіны я маю? Пакажы мне грэх мой і правіны мае.

²⁴ Чаму Ты хаваеш аблічча Тваё і лічыш мяне за ворага для Цябе?

²⁵ Ці Ты пужаеш лісток, які [ветрам] сарваны, і гонішся за сухой саломай?

²⁶ Бо Ты пішаш пра мяне прыкрасьці і прыгадваеш мне грахі маладосьці маёй.

²⁷ Ты замыкаеш у калоду ногі мае, і пільна назіраеш сьцежкі мае, і дасьледуеш усе сьляды мае.

²⁸ І я марнею, як спарахнелае дрэва і як адзеньне, якое моль патачыла.