3 ЯНА 1 - Біблія (пераклад А.Бокуна)

3 Ян 1

¹ Староста — улюбёнаму Гаю, якога я люблю ў праўдзе.

² Улюбёны! Малюся, каб ты быў здаровы і пасьпяховы ў-ва ўсім, як пасьпяховая душа твая.

³ Бо я вельмі ўзрадаваўся, калі прыйшлі браты і засьведчылі пра тваю праўду, як ты ходзіш у праўдзе.

⁴ Для мяне няма большай радасьці, як чуць, што дзеці мае ходзяць у праўдзе.

⁵ Улюбёны! Ты робіш вернае ў тым, што робіш для братоў і для чужынцаў,

⁶ якія засьведчылі перад царквою пра тваю любоў. Ты добра зробіш, правёўшы іх, як належыцца перад Богам,

⁷ бо яны дзеля імя Ягонага пайшлі, нічога ня ўзяўшы ад паганаў.

⁸ А мы павінны прыймаць гэтакіх, каб стацца супрацоўнікамі праўдзе.

⁹ Я пісаў царкве, але Дыятрэф, які любіць у іх быць першым, не прызнае нас.

¹⁰ Дзеля гэтага, калі я прыйду, нагадаю пра ўчынкі ягоныя, якія ён робіць, абмаўляючы нас злымі словамі; і не задавольваючыся гэтым, і сам не прызнае братоў, і тым, якія хочуць, забараняе, і выганяе з царквы.

¹¹ Улюбёны! Не пераймай ліхое, але добрае. Хто робіць дабро, той ад Бога; а хто робіць ліхое, ня бачыў Бога.

¹² Пра Дэмэтрыя засьведчана ўсімі і самой праўдаю, і мы сьведчым, і вы ведаеце, што сьведчаньне нашае праўдзівае.

¹³ Шмат меў я пісаць, але не хачу пісаць табе атрамантам і трысьцінай,

¹⁴ а спадзяюся неўзабаве пабачыць цябе і гаварыць вуснамі ў вусны.

¹⁵ Супакой табе! Вітаюць цябе сябры; прывітай сяброў паіменна.