2 ЦІМАФЕЯ 2 - Біблія (пераклад А.Бокуна)

2 Цім 2

¹ Дык ты, дзіця маё, умацоўвайся ў ласцы, што ў Хрысьце Ісусе,

² і, што чуў ад мяне праз многіх сьведкаў, тое перадай верным людзям, якія будуць здольнымі і іншых навучыць.

³ Дык перанось злыбеды, як добры жаўнер Ісуса Хрыста.

⁴ Ніхто з тых, хто змагаецца, ня зьвязвае сябе справамі жыцьцёвымі, каб падабацца таму, хто яго ўзяў у войска.

⁵ І калі хто спаборнічае, не атрымае вянка, калі будзе спаборнічаць незаконна.

⁶ Земляроб, які працуе, мусіць першы спажываць плады.

⁷ Разумей, што кажу. Няхай жа дасьць табе Госпад разуменьне ў-ва ўсім.

⁸ Памятай пра Ісуса Хрыста, з насеньня Давіда, Які ўваскрос з мёртвых паводле Эвангельля майго,

⁹ у якім пераношу злыбеды аж да путаў, як злачынца, але слова Божага нельга зьвязаць.

¹⁰ Дзеля гэтага я ўсё трываю дзеля выбраных, каб і яны дасягнулі збаўленьня, што ў Хрысьце Ісусе, з вечнаю славаю.

¹¹ Вернае слова, што калі мы памерлі з Ім, і жыць будзем з Ім;

¹² калі трываем [з Ім], і валадарыць будзем з Ім; калі адрачэмся [ад Яго], і Ён адрачэцца ад нас;

¹³ калі мы ня верым, Ён застаецца верным, бо ад Сябе адрачыся ня можа.

¹⁴ Гэта нагадвай, сьведчачы перад Госпадам, каб не спрачаліся дзеля словаў, што нічога не дае, а руйнуе тых, якія слухаюць.

¹⁵ Намагайся паставіць сябе перад Богам вартым, работнікам, які ня будзе асаромлены, які слушна пераказвае слова праўды.

¹⁶ А паганага марнаслоўя пазьбягай, бо яны яшчэ больш будуць узрастаць у бязбожнасьці,

¹⁷ і слова іхняе, як гангрэна, будзе мець пажыву. Гэтакія Гімэнэй і Філет,

¹⁸ якія адхіліліся ад праўды, кажучы, што ўваскрасеньне ўжо было, і руйнуюць у некаторых веру.

¹⁹ Але цьвёрды падмурак Божы стаіць, маючы гэтакую пячатку: «Ведае Госпад тых, якія Яго», і: «Няхай адыйдзецца ад няправеднасьці кожны, хто называе імя Хрыста».

²⁰ А ў вялікім доме ёсьць посуд ня толькі залаты і срэбны, але і драўляны, і гліняны; і адзін — у пашане, а другі — у ганьбе.

²¹ Дык калі хто ачысьціць сябе ад гэтага, той будзе пасудзінаю ў пашане, асьвячонаю і патрэбнаю Уладару, падрыхтаванаю на ўсякую добрую справу.

²² Ад юнацкіх пажаданьняў уцякай, а імкніся да праведнасьці, веры, любові, супакою з тымі, хто прызывае Госпада ад чыстага сэрца.

²³ Ад дурных і бязглуздых спрэчак адмаўляйся, ведаючы, што яны нараджаюць звадкі;

²⁴ а слуга Госпада ня мусіць вадзіцца, але быць ветлівым да ўсіх, здольным навучаць, цярплівым,

²⁵ у ціхасьці настаўляць тых, якія працівяцца, ці ня дасьць ім Бог навяртаньня дзеля пазнаньня праўды,

²⁶ каб яны вызваліліся з пасткі д’яблавай, які злавіў іх пад сваю волю.