2 ФЕСАЛОНІКІЙЦАЎ 3 - Біблія (пераклад А.Бокуна)

2 Тэс 3

¹ Нарэшце, маліцеся за нас, браты, каб слова Госпада пашыралася і выслаўлялася, як і ў вас,

² і каб мы былі выбаўленыя ад нягодных і злых людзей, бо не ў-ва ўсіх вера.

³ Але верны Госпад, Які ўмацуе вас і захавае ад злога.

⁴ Мы пэўныя адносна вас у Гос­падзе, што вы выконваеце і будзеце выконваць тое, што мы загадваем вам.

⁵ Няхай Сам Госпад накіруе сэрцы вашыя да любові Божае і цярплівасьці Хрыстовай.

⁶ Загадваем вам, браты, у імя Госпада нашага Ісуса Хрыста, каб цураліся ўсякага брата, які ходзіць свавольна і не паводле традыцыі, прынятай ад нас,

⁷ бо вы самі ведаеце, як трэба насьлядаваць нас, бо мы не сваволілі між вамі,

⁸ таксама дарма ні ў каго хлеба ня елі, але ў працы і стоме рабілі ўначы і ўдзень, каб не абцяжарыць каго з вас,

⁹ не таму, што ня маем улады, але каб сябе саміх даць вам за прыклад дзеля перайманьня нас.

¹⁰ Бо калі мы былі ў вас, дык загадалі вам: калі хто ня хоча працаваць, той няхай і ня есьць.

¹¹ Але чуем, што некаторыя ў вас ходзяць свавольна, нічога ня робяць, але мітусяцца.

¹² Гэтакім загадваем і молім у Госпадзе нашым Ісусе Хрысьце, каб яны, працуючы моўчкі, елі свой хлеб.

¹³ А вы, браты, не журыцеся, робячы дабро.

¹⁴ Калі ж хто не паслухаецца слова нашага праз гэтае пасланьне, таго мейце на прыкмеце і ня мейце справы з ім, каб быў асаромлены;

¹⁵ але не лічыце яго за ворага, але настаўляйце, як брата.

¹⁶ Сам жа Госпад супакою няхай дасьць вам супакой заўсёды і ў-ва ўсім. Госпад з усімі вамі.

¹⁷ Прывітаньне маёю рукою, Паўлаваю, што ёсьць знак у-ва ўсякім пасланьні; пішу я гэтак:

¹⁸ ласка Госпада нашага Ісуса Хрыста з усімі вамі. Амэн.