1 ЦІМАФЕЯ 5 - Біблія (пераклад А.Бокуна)

1 Цім 5

¹ Старога не дакарай, але прасі, як бацьку, маладых — як братоў,

² старых жанчынаў — як матак, маладых — як сёстраў, з усякай чысьцінёю.

³ Удоваў шануй, тых, якія праўдзіва ўдовы.

⁴ А калі якая ўдава мае дзяцей ці ўнукаў, яны перш няхай вучацца шанаваць свой дом і аддаваць належнае бацькам, бо гэта добра і прыемна перад Богам.

⁵ Праўдзівая ўдава і адзінокая спадзяецца на Бога і трывае ў малітвах і просьбах уночы і ўдзень,

⁶ а тая, што жыве ў распусьце, жывучы, мёртвая.

⁷ І гэтак загадвай, каб былі бездакорнымі.

⁸ А калі хто пра сваіх, і асабліва, пра хатніх ня дбае, той адрокся ад веры і горшы за бязьвернага.

⁹ Удава мае быць унесеная ў сьпіс, якой ня менш як шэсьцьдзясят гадоў, якая была жонкаю аднаго мужа,

¹⁰ засьведчаная ў добрых учынках, калі дзяцей выгадавала, калі прыймала падарожных, калі абмывала ногі сьвятым, калі падтрымлівала прыгнечаных, калі ішла сьледам за ўсякай добрай справай.

¹¹ А маладым удовам адмаўляй, бо калі яны, разласаваўшыся насуперак Хрысту, захочуць замуж,

¹² атрымаюць асуджэньне, бо адкінулі ранейшую веру.

¹³ Да таго ж яны прывучаюцца не працаваць, цягаючыся па дамах; і ня толькі не працаваць, але і балбатаць, і рабіць непатрэбныя рэчы, гаворачы, чаго ня сьлед.

¹⁴ Дык хачу, каб маладыя [ўдовы] ішлі замуж, нараджалі дзяцей, кіравалі домам і не давалі супраціўніку аніякае нагоды дзеля абмаўляньня,

¹⁵ бо некаторыя ўжо збочылі ўсьлед за шатанам.

¹⁶ Калі які верны ці верная мае ўдовы, няхай падтрымлівае іх і не абцяжарвае царквы, каб яна падтрымлівала праўдзівых удоваў.

¹⁷ Старосты, якія кіруюць добра, дастойныя падвойнае пашаны, асабліва тыя, якія працуюць у слове і навучаньні.

¹⁸ Бо Пісаньне кажа: «Не закелзай вала, які малоціць», і: «Работнік варты нагароды сваёй».

¹⁹ Абвінавачваньне на старосту не прыймай, хіба што пры двух ці трох сьведках.

²⁰ Тых, якія грашаць, дакарай перад усімі, каб і іншыя страх мелі.

²¹ Перад Богам і Госпадам Ісусам Хрыстом і выбранымі анёламі сьведчу [табе], каб ты захаваў гэтае без перадузятасьці, нічога ня робячы паводле прыхільнасьці.

²² Рукі хутка ні на каго не ўскладай і ня будзь супольнікам у чужых грахах; захоўвай сябе чыстым.

²³ Больш ня пі ваду, але ўжывай крыху віна дзеля страўніка твайго і частых тваіх немачаў.

²⁴ Грахі некаторых людзей відочныя і вядуць на асуджэньне, а за некаторымі ідуць сьледам.

²⁵ Гэтаксама і добрыя ўчынкі відочныя; і калі іначай, схавацца ня могуць.