ЯКАВА 2 - Біблія (пераклад В. Сёмухі) Біблія (пераклад В. Сёмухі)
ЯКАВА 2

¹ Браты мае! майце веру ў Ісуса Хрыста, нашага Госпада славы, бяз увагі на асобы.

² Бо калі на сход ваш увойдзе чалавек з залатым пярсьцёнкам, у багатым убраньні, увойдзе і бедны ў гаротнай адзежы,

³ і вы глянеце на таго, хто ў багатым убраньні, і скажаце яму: табе трэба сесьці тут, а беднаму скажаце: ты стань там, альбо: сядзь тут, каля ног маіх,

⁴ дык ці ня робіце розьніцы між сабою і ці ня робіцеся вы зламыснымі судзьдзямі?

⁵ Паслухайце, браты мае любасныя: ці ж ня бедных сьвету выбраў Бог быць багатымі вераю і спадчыньнікамі Царства, якое Ён абяцаў тым, хто любіць Яго?

⁶ а вы пагрэбавалі бедным. Ці не багатыя ўціскаюць вас, і ці ж не яны цягнуць вас у суды?

⁷ Ці не яны няславяць добрае імя, якім вы называецеся?

⁸ Калі вы выконваеце закон царскі, паводле Пісаньня: палюбі блізкага твайго, як сябе самога, - добра робіце.

⁹ Але калі робіце з аглядкаю на асобы, дык грэх чыніце, і перад законам вы злачынцы.

¹⁰ Хто выконвае ўвесь закон і згрэшыць у чым-небудзь адным, той робіцца вінаватым ва ўсім.

¹¹ Бо Той, Хто сказаў: не распусьнічай, сказаў і: не забі; таму, калі ты не распусьнічаеш, але заб'еш, дык ты таксама адступнік ад закона.

¹² Так гаварэце і так рабеце, як тыя, што маюць быць суджаныя згодна з законам свабоды.

¹³ Бо суд ня мецьме літасьці да таго, хто не літасьцівы; літасьць узьнесена над судом.

¹⁴ Якая карысьць, браты мае, калі хто кажа, што ён мае веру, а дзеяў ня мае? Ці можа гэтая вера ўратаваць яго?

¹⁵ Калі брат альбо сястра безадзежныя і ня маюць на дзень пражытку,

¹⁶ а хто-небудзь з вас скажа ім: ідзеце зь мірам, грэйцеся і кармецеся, але ня дасьць ім патрэбнага целу: якая карысьць?

¹⁷ Гэтак і вера, калі ня мае дзеяў, мёртвая сама ў сабе.

¹⁸ А скажа хто-небудзь: ты маеш веру, а я маю дзеі: пакажы мне веру тваю бязь дзеяў тваіх, а я пакажу табе веру маю празь дзеі мае.

¹⁹ Ты верыш, што Бог адзіны: слушна робіш; і дэманы вераць, і трымцяць.

²⁰ Але ці хочаш ведаць, марны чалавеча, што вера бязь дзеяў мёртвая?

²¹ Ці ж ня дзеямі апраўдаўся Абрагам, бацька наш, паклаўшы на ахвярнік Ісаака, сына свайго?

²² Ці бачыш, што вера спрыяла дзеям ягоным, і дзеямі вера дасягнула дасканаласьці.

²³ І спраўдзілася слова Пісаньня: вераваў Абрагам Богу, і гэта залічылася яму ў праведнасьць, і ён названы прыяцелем Божым.

²⁴ Ці бачыце, што чалавек апраўдваецца дзеямі, а ня вераю толькі?

²⁵ Гэтак сама і Рааў распусьніца ці ж ня дзеямі апраўдалася, прыняўшы выведнікаў і выпусьціўшы іх іншаю дарогаю?

²⁶ Бо, як цела бяз духу мёртвае, так і вера бязь дзеяў мёртвая.