ПСАЛТЫР 94 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 94

¹ Пахвальная песьня Давідава. Прыйдзеце, засьпяваем Госпаду, усклікнем Богу, цьвярдыні ратунку нашага;

² станьма прад абліччам Ягоным з хвалою, у песьнях усклікнем Яму,

³ бо Гасподзь ёсьць Бог вялікі і Цар над усімі багамі.

⁴ У руцэ Ягонай глыбіні зямлі, і вяршыні гор - Ягоныя;

⁵ Ягонае - мора, і Ён стварыў яго, і сушу стварылі рукі Ягоныя.

⁶ Прыйдзеце, паклонімся і прыпадзем, укленчым прад абліччам Госпада, Творцы нашага,

⁷ бо Ён ёсьць Бог наш, і мы - людзі паствы Ягонай і авечкі рукі Ягонай. О, калі б вы сёньня паслухалі голасу Яго:

⁸ «ня ўпускайце жорсткасьць у сэрца вашае, як у Мэрыве, як у дзень спакушэньня ў пустыні,

⁹ дзе спакушалі Мяне бацькі вашыя, выпрабоўвалі Мяне, і бачылі дзею Маю.

¹⁰ Сорак гадоў раздражняў Мяне род гэты, Я сказаў: гэта народ, які заблудзіўся сэрцам; яны не спазналі дарог Маіх;

¹¹ і таму прысягнуў Я ў гневе Маім, што яны ня ўвойдуць у Мой спакой».