ПСАЛТЫР 128 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 128

¹ Песьня ўзыходжаньня. Шмат уціскалі мяне зь юнацтва майго, хай скажа Ізраіль:

² шмат уціскалі мяне зь юнацтва майго, але не адолелі мяне.

³ На хрыбце маім аралі аратыя, вялі доўгія барозны свае.

⁴ Але Гасподзь справядлівы; Ён расьсек путы бязбожнікаў.

⁵ Хай пасаромяцца і павернуць назад усе ненавісьнікі Сіёна.

⁶ Хай будуць, як трава на дахах, якая раней, чым вырвана будзе, засыхае,

⁷ якою жнец не напоўніць рукі сваёй, а хто вяжа снапы - жмені сваёй;

⁸ і хто праходзіць міма, ня скажа: дабраславеньне Гасподняе на вас; дабраслаўляем вас імем Гасподнім!