ЯНА 15 - Біблія (пераклад А.Бокуна) Біблія (пераклад А.Бокуна)
ЯНА 15

¹ Я ёсьць сапраўдная вінаградная лаза, а Айцец Мой — вінаградар.

² Усякую галіну ў Мяне, якая не дае плоду, Ён адсякае; і ўсякую, што дае плод, абчышчае, каб больш пладоў давала.

³ Вы ўжо ачышчаныя праз слова, якое Я гаварыў вам.

⁴ Заставайцеся ў-ва Мне, і Я ў вас. Як галіна ня можа даваць плоду сама сабою, калі ня будзе на лазе, так і вы, калі не застанецеся ў-ва Мне.

⁵ Я — вінаградная лаза, вы — галіны; хто застаецца ў-ва Мне, і Я ў ім, той прыносіць мноства пладоў, бо без Мяне вы ня можаце рабіць нічога.

⁶ Хто ня будзе ў-ва Мне, будзе выкінуты вон, як галіна, і засохне; і іх зьбіраюць, і кідаюць у вагонь, і яны згараць.

⁷ Калі застанецеся ў-ва Мне, і словы Мае ў вас застануцца, то што хочаце, прасіце, і станецца вам.

⁸ У гэтым будзе праслаўлены Айцец Мой, калі вы прынесяцё мноства пладоў і будзеце Маімі вучнямі.

⁹ Як палюбіў Мяне Айцец, і Я палюбіў вас; заставайцеся ў любові Маёй.

¹⁰ Калі захаваеце прыказаньні Мае, застанецеся ў любові Маёй, як і Я захаваў прыказаньні Айца Майго і застаюся ў Яго любові.

¹¹ Гэтае сказаў Я вам, каб радасьць Мая ў вас была, і каб радасьць вашая была поўная.

¹² Гэта прыказаньне Маё, каб вы любілі адзін аднаго, як Я палюбіў вас.

¹³ Ніхто ня мае любові большае за тую, калі хто аддасьць душу сваю за сяброў сваіх.

¹⁴ Вы — сябры Мае, калі робіце тое, што Я загадваю вам.

¹⁵ Я больш не называю вас слугамі, бо слуга ня ведае, што робіць гаспадар ягоны, а Я назваў вас сябрамі, бо ўсё, што чуў ад Айца Майго, паведаміў вам.

¹⁶ Ня вы Мяне выбралі, але Я вас выбраў і паставіў вас, каб вы ішлі і прыносілі плод, і каб плод ваш заставаўся; каб тое, што папросіце ў Айца ў імя Маё, Ён даў вам.

¹⁷ Гэта загадваю вам, каб вы любілі адзін аднаго.

¹⁸ Калі сьвет вас ненавідзіць, зразумейце, што Мяне раней за вас зьненавідзіў.

¹⁹ Калі б вы былі са сьвету, сьвет любіў бы сваё, а як вы не са сьвету, але Я выбраў вас са сьвету, дык за гэта ненавідзіць вас сьвет.

²⁰ Памятайце словы, якія Я сказаў вам: “Слуга ня большы за гаспадара свайго”. Калі Мяне перасьледавалі, і вас будуць перасьледаваць; калі Маё слова захавалі, і вашае захаваюць.

²¹ Але ўсё гэтае зробяць вам дзеля імя Майго, бо ня ведаюць Таго, Хто паслаў Мяне.

²² Калі б Я не прыйшоў і не гаварыў ім, ня мелі б грэху, а цяпер ня маюць адгаворкі ў грэху сваім.

²³ Хто Мяне ненавідзіць, ненавідзіць і Айца Майго.

²⁴ Калі б Я не ўчыніў сярод іх справаў, якіх ніхто іншы не рабіў, ня мелі б грэху, а цяпер і бачылі, і зьненавідзелі і Мяне, і Айца Майго.

²⁵ Але каб споўнілася слова, напісанае ў Законе іхнім: “Зьненавідзелі Мяне дарэмна”.

²⁶ Калі ж прыйдзе Абаронца, Якога Я пашлю вам ад Айца, Дух Праўды, Які ад Айца зыходзіць, Ён будзе сьведчыць пра Мяне.

²⁷ І вы таксама будзеце сьведчыць, бо вы ад пачатку са Мною.