ПСАЛТЫР 116 - Біблія (пераклад А.Бокуна) Біблія (пераклад А.Бокуна)
ПСАЛТЫР 116

¹ Люблю ГОСПАДА, бо Ён пачуў голас мой і маленьне маё,

² бо Ён прыхіліў да мяне вуха Сваё ў дзень, калі я клікаў [Яго].

³ Ахапілі мяне путы сьмерці; мукі пякельныя адшукалі мяне; я знайшоў трывогу і смутак.

⁴ І паклікаў я імя ГОСПАДА: «Выратуй, прашу, ГОСПАДЗЕ, душу маю!»

⁵ Літасьцівы ГОСПАД і праведны, наш Бог міласьцівы.

⁶ ГОСПАД захоўвае неразумных; і калі зьнемагаю, Ён ратуе мяне.

⁷ Вярніся, душа мая, да супачынку твайго, бо ГОСПАД робіць добрае табе.

⁸ Бо Ты выратаваў душу маю ад сьмерці, вочы мае — ад сьлёзаў, ногі мае — ад падзеньня.

⁹ Буду хадзіць перад абліччам ГОСПАДА ў зямлі жывых.

¹⁰ Я веру, дык гавару: «Я моцна прыгнечаны».

¹¹ Я сказаў у зьбянтэжанасьці маёй: «Усе людзі хлусяць!»

¹² Што я вярну ГОСПАДУ за ўсе дабрадзействы Ягоныя для мяне?

¹³ Келіх збаўленьня ўзьніму і імя ГОСПАДА буду клікаць.

¹⁴ Абяцаньні мае ГОСПАДУ споўню перад усім народам Ягоным.

¹⁵ Каштоўная ў вачах ГОС­ПАДА сьмерць багабойных Ягоных.

¹⁶ О ГОСПАДЗЕ! Я ж — слуга Твой, я — слуга Твой, сын служкі Тваёй! Ты разьбіў кайданы мае.

¹⁷ Табе ахвярую ахвяру падзякі і імя ГОСПАДА буду клікаць.

¹⁸ Абяцаньні мае ГОСПАДУ споўню перад усім народам Ягоным,

¹⁹ у панадворках Дому ГОС­ПАДА, пасярод цябе, Ерусаліме! Альлелюя!