ZƏBUR 6_1 - ƏHDİ-ƏTİQ (TÖVRAT VƏ ZƏBUR)

Davudun səkkiz simli alətlərin müşayiəti ilə oxunan məzmuru.

¹ Ya Rəbb, qəzəblənib məni töhmətləndirmə, Hiddətlənib məni tənbeh etmə.

² Ya Rəbb, mənə rəhm et, Çünki taqətim qalmayıb. Mənə şəfa ver, ya Rəbb, Sümüklərim sızlayır.

³ Canıma vəlvələ düşüb. Ya Rəbb, bu nə vaxtadək olacaq?

⁴ Ya Rəbb, gəl, mənə kömək et, Məhəbbətin naminə məni xilas et!

⁵ Səni ölüb-gedən insan xatırlamaz. O necə ölülər diyarından Sənə şükür etsin?

⁶ Öz ah-naləmdən bezmişəm, Hər gecə ağlamaqdan döşəyim islanır, Göz yaşlarımdan yatağım yaş olur.

⁷ Qəmdən gözümün nuru sönüb, Gözlərim düşmənləri görməkdən zəifləyib.

⁸ Siz ey şər iş görənlər, məndən uzaq durun! Çünki Rəbb hönkürtümü eşitdi,

⁹ O, yalvarışımı dinlədi, Rəbb duamı qəbul etdi!

¹⁰ Bütün düşmənlərim rüsvay olacaq, Canlarına vəlvələ salınacaq, Xəcalət içində bir andaca geri qayıdacaq.