Lucas 11:41

Aymar Bibliia 1986

Jumanacajj chuymanacamatay limosnanacamjj churapjjamjja, uqhamanwa takpachajj k'omäjjanejja.

Jak'a apnaqawi uñst'ayäwi

Salmos 112:9

Jan cunan jakenacaruw churäwinac wajjt'i, jaker qhuyapt'ayañapajj jan tucusquiriwa, jan qhitin camscañaw p'ekep waytaraqui.

Salmos 41:1

Jan cunan jakempiru, pisi ch'aman jakempir uñjirejj cusisiñan jakewa, Tatituw jan walt'añ urunacan juparojj khespiyani.

Proverbios 14:31

Pobreru t'akhesiyirirojj Diosaruwa jisc'achasqui, ucampis pobrer qhuyapayirejja Tatituruw jach'ar aptasqui.

Proverbios 16:6

Jucha luratarojja munasiñampi, cheka cancañampiwa pampachi; Tatitur ajjsaratap laycuwa maynejja jan walita jithekti.

Proverbios 19:17

Mä pobre jaker mayt'irejj Tatituruw mayt'asqui, ucatsti Tatit pachpawa uca manjja phokjjani.

Daniel (hebreo) 4:27

Uca laycu, jichhajj, jach'a rey, aca ewjja aru ist'ita: Juma, jach'a reyejj, take cunsa chekaparupuni uñjam, janiraqui juc'ampi juchsa lurcjjamti, ñankha luräwinacamsti apanucum, pobrenacaru yanapt'araquim. Inampisa uqhamata, jach'a reyejj, sumancañampina, kamir cancañampina jacascasma sasa.

Mateo 26:11

Pobrenacajj jumanacampïscapuniniwa, ucampis nayajj janiw jumanacampipunïcäti.

Mateo 5:42

Mä cuns maynejj mayïtam ucarojja churam; mayt'asirirusti janiraqui “janiw” sasajj samti.

Marcos 7:19

Ucajj janiw chuymapar mantquiti, jan ucasti puracaparuquiw manti, ucatsti mistjjaraquiwa —sasa. Uqham sasinjja Jesusajj take mank'asa k'omätap yatiyäna.

Lucas 12:33

Cunatejj utjapctam ucjja aljapjjam, ucatsti qhititejj jan cunanïpqui ucanacar churjjapjjam; uqhamat jan merk'esir bolsanac lurasipjjäta, alajjpachansti jan tucusquir yänacaraqui imasipjjäta, ucansti lunthatas janiw apscaniti janiw qharus qharuntcaraquiniti.

Lucas 16:9

“Nayajj sapjjsmawa, aca jucharar oraken yänacapjj apnakapjjam amigonïñataqui, cunapachatï aca yänacajj tucusjjani ucqhajja wiñay jacañ utanacaru mayni jumanacar catokerejj utjañapataqui.

Lucas 18:22

Jesusajj uc ist'asinjja sänwa: —Ucampis maya jan phokctati; aljaram take cunatejj utjctam ucanaca, ucatsti pobrenacar churam, ucapachaw kamir cancañamajj alajjpachan utjätam, ucatsti jutam, nayar arquita —sasa.

Lucas 19:8

Ucapachaw Zaqueojj sayt'asi, ucat Tatituru saraqui: —Uñtam tata, take cunatejj utjquitu ucatjja pobrenacaruw chicat churjjä; maynirutejj lunthatsta ucarojja, pusi ucqhampiw cuttayjjä —sasa.

Hechos 10:15

Wasitatwa uca arojj juparojj arjjayani, saraquiwa: —Cuntï Diosajj k'omachqui ucarojja, jan k'añuw samti —sasa.

Hechos 11:29

Ucatwa Tatitur arquiri Antioquianquir jakenacajj amtapjjäna mä yanap apayañatac Judeanquir jilatanacaru, cunjämatejj sapa mayni jupanacan utjcän uqhamarjama.

Hechos 24:17

Mä kawkha maranaca yakha marcanacan sarnakasinsti, pachpa marcajjaruw cutt'jjta limosna churañataqui uqhamarac Tatiturus ofrendanac churañataqui.

2 Corintios 8:12

Cunapachatejj maynejj churañ muni ucqhajja Diosajj catokewa utjiriparjama. Jupajj janiw mayquiti maynin jan utjcchi ucqhajja.

Efesios 4:28

Qhititejj lunthatasirïcän ucajja jan juc'amp lunthatascjjpanti, jan ucasti irnakañaru uscuspan, sum irnakasinwa pobrenacar yanapt'añataquis utjaraquini.

Tito 1:15

Qhitinacatejj k'oma amuyunïpqui ucanacataquejj take cunas k'omawa, ucampis jan suma amuyunïpqui ucanacataquejj janiw cunas walïquiti, jupanacan amuyunacapas, chuymanacapas k'añütap laycu.

Hebreos 13:16

Janiraqui armt'asipjjamti asqui lurañatjja, uqhamarac maynit maynicama cunanacamatejj utjapctam uc jaljasiñsa; uca casta sacrificiow Diosarojj cusisiyi.

Hebreos 6:10

Diosasti asquiwa, janiw armascaniti cuntejj lurapcta, uqhamarac munasiñanacamsa uñacht'ayapjjaracta Diosanquir jilatanacar yanapt'asina ucanacatjja. Jichhacamas ucjj lurasipcactawa.

Santiago 1:27

Cuna Diosar arcañatejj k'omäqui chekapäcaraqui Dios Awqui nayrakatan ucajj acanacawa: Wajchanacaru, ijmanacaru, llaquitanacaru yanapt'aña, ucatsti janiraqui acapach k'añu lurañanacampejj k'añuchasiña ucawa.