Jueces 3:9

Aymar Bibliia 1986

Israelitanacasti Diosaruw arnacasjjapjjäna, ucatsti Diosajj arnakasitanacap ist'asinsti jupanac taypitjja mä khespiyiri sayt'ayäna, ucasti Otoniel satänwa, Cenaz sat chachan yokapa, uqhamarac Caleb chachan sullca jilaparaqui.

Jak'a apnaqawi uñst'ayäwi

Nehemías 9:27

Ucatwa jumajj uñisirinacapan amparanacaparojj catuytajja jupanacar t'akhesiyapjjañapataqui. Ucatsti jupanacajj uqham t'akhesiyatäsinwa jumarojj yanapa mayipjjtamjja, ucampis jumajja jach'a qhuyapayasiñama laykojja, alajjpachatpachwa ist'tajja; ucatjja churtawa jakenaca t'akhesiyiripan amparapat khespiyapjjañapataqui.

Salmos 22:5

jumaruw arnakasipjjäyätam, jupanacasti khespiyataw uñjasipjjäna, jumaruw take chuymamp arnakasipjjäyätam, jumasti janiw inamay suyayctati.

Salmos 78:34

Diosajj jiwaraycän ucapachaquiw juparojj thakapjjäna, janc'aquiw Diosar maqhatjjañataquejj thakapjjäna;

Josué 15:17

Cawquïri jaketï uca marca t'unjcän ucasti Caleb chachan sobrinopänwa Otoniel sutini, jupasti Cenaz chachan wawapänwa; Caleb chachajj Otonielaruw Acsa sat phuchapa warmipatac churäna.

Jueces 1:13

Uca marcarusti Otoniel sata chachaw atipjäna, jupasti Cenaz chachan yokapawa, uqhamarac jupajj Caleb chachan sullca jilaparaqui. Ucampis Caleb chachasti juparojja Acsa sat phuchapa warmipataqui churäna.

Jueces 10:10

Ucatsti israelitanacajj Diosaruw yanapa mayipjjän aqham sasa: “Dios Tatitu, juma contraw nanacajj jucha lurapjjta, uqhamarac apanucupjjaracsmawa c'ari diosanacaru yupaychatanacajj laycu” sasa.

Jueces 2:16

Uca khepatsti Dios pachparaquiw jilïrinaca sayt'ayaraquïna jupanacaru jan wali luririnacata khespiyañapataqui.

Jueces 2:18

Diosasti sapa cuti mä jilïri sayt'aycäna ucarusti yanaparaquïnwa, aca jilïristi jacäwipanjja khespiyänwa israelitanacarojja uñisirinacapan t'akhesiyatäñatjja. Diosasti jupanacatjja qhuyapt'ayasïnwa t'akhesisa sarnakapjjatanacap uñjasa, uqhamarac arnakasipjjatanacap ist'asinjja.

Jueces 3:15

Ucat israelitanacajj Diosaru arnakasjjapjjäna; Diosajj arnakasitanacap ist'asinsti mä khespiyirwa jupanac taypit sayt'ayäna. Aca khespiyiristi mä ch'ekachünwa Aod sat sutini, jupasti Gera sat chachan yokapänwa, uqhamarac Benjamín sat tribunquiriraqui. Mä urojj israelitanacajj aca Aod sataruw mä wajjt'äwi apayapjjäna Eglón sat reyirojja.

Jueces 3:8

Diosasti uqham uñjasinjja jupanacatac colerasisasti Cusan-risataim sat Mesopotamia marcanquir reyin amparaparuw catuyäna. Ucatsti israelitanacajj Cusan-risataim sat reyirojj quimsakallko marawa sirvipjjäna.

Jueces 4:3

Jabín sat reyisti llätunca pataca fierrot lurata carronacanïnwa. Uca laycusti pä tunca maranacawa israelitanacarojj t'akhesiyapjjäna. Uqham t'akhesiñana jicjjatasisajja israelitanacajja Diosaruw arnakasjjapjjäna yanapt'añapataqui.

Jueces 6:7

Cunapachatejj israelitanacajj Diosaru arnakasipjjäna madianitanacat khespiyañapataqui ucqhajja,

1 Samuel 12:10

Ucampis jupanacajj Tatituruw juchanacap arsusipjjäna, uqhamarac juparu apanucutanacapsa, Baal uqhamaraqui Astarté sisqui uca yakha diosanacapar sirvisina, ucatsti achict'asipjjaraquïnwa, uñisirinacapat khespiyañapataqui, jupa saparu sirviñataquiw arsupjjaraquïna.