Éxodo 32:8

Aymar Bibliia 1986

Jupanacasti janc'aquiw saraktapjje nayajj sarapjjam sapcsma uca thaquitjja. Uqhamarac kori umatatayasaw mä vaca kallu lursusipjje, jichhasti ucaruwa yupaychasina sacrificionac loktasipqui. Ucat sapjjaraquiwa: “¡Israel, aca diosamawa Egiptot irpsuntamjja!” —sasa.

Jak'a apnaqawi uñst'ayäwi

1 Reyes 12:28

Uca toketa suma jiscjjatasisinjja, reyejj pä vaca kallunacwa korita lurayäna, ucatsti marcarojj sänwa; “Jumanacasti israelita jakenaca, walja cutiwa Jerusalén marcar sarapjjtajja. Jichhasti acanacapï jumanacana diosamajja, Egiptot apsunipctam ucanacajja” sasa.

Nehemías 9:18

“Jupanacajja mä vaca kallsa metal umatatayasa lurasipcchïna, uqhamarac sapjjäna uca vaca kallojj jupanacan Egiptot apsunir diosapätapsa, uqhamarac juma tokes jan walinaca lurapcchïna ucasa,

Salmos 106:19

Horeb kollun vaca kall lursusipjjäna, kori umatatayasaw mä dios lursupjjäna, ucaruw yupaychapjjäna,

Salmos 78:36

Lacaquiw juparojj parlapjjäna, lajjrampisti c'arintapjjänwa,

Éxodo 20:23

Jumanacajj janiw yakha diosanaca lurasipjjätati koritsa ni kollketsa nayarjama yupaychapjjañamataquejja.

Éxodo 22:20

“Qhititejj yakha diosanacaru sacrificio loktascchi, Tatituru loktañat sipansa ucajja jiwañapawa.

Éxodo 32:4

Aaronasti uca kori aretenac catokasinjja ninampiw umatatayäna, ucatsti mä vaca kallur uñtatwa lursüna. Ucat jakenacajj sapjjänwa: —¡Israel, acawa Egiptota irpsunctam uca diosamajja! —sasa.

Éxodo 34:15

“Ucampis janipuniwa sumancañaru mantapjjätati uca oraken jaquirinacampejja. Jupanacasti diosanacaparu yupaychasina, uqhamarac sacrificionac loktasinjja jumanacaru churapjjeristam, ucatsti jumanacajj inampis uca diosanacaru loktat mank'anacsa mank'antapjjasma.

Isaías 46:6

Yakhepa jakenacajj bolsanacapat walja kori apsupjje, balanzanacansti kollkenac pest'apjjaraqui; ucatsti yakha diosanac luriri mä jakeruw jawsayapjjaraqui, mä dios lurañapataqui, ucat jupanacajj uca diosanacaru quillisipjjañapataqui.

Jeremías 31:32

Aca arust'äwisti janiw cunjämatejj nayra awquinacapampi lurcta uqhamäcaniti, cunapachatejj jupanacarojj amparat wayjjarusin Egipto marcat irpsuncta uqhama; jupanacasti janiw arust'äwejjarojj phokhapquiti, nayajj jupanacan uywiripäcchiyäta ucasa. Naya Tatituw ucjja arsta.

Levítico 17:7

Janipuniw mayampsa uca ñankhanacarojj ofrendanacapjja loktascjjapjjaniti, cawquïrinacarutejj jupanacajj yupaychapjjäna, uqhamarac k'añuchasipjjänsa. Acasti jumanacataquejj wiñaya leyïniwa, awquinacamataqui, uqhamarac wawanacamataquisa.

Deuteronomio 32:17

Supayanacaruw sacrificio loktapjjaraquïna, jan uñt'at c'ari diosanacaru, machak diosanacaru, ucqha purinitanacaru, cawquïri diosanacarutï awquinacamajj jan yupaychapjjerïqui ucaru.

Deuteronomio 9:12

ucatsti sitänwa: ‘Janc'aqui aca chekat sarakawayam, cawquïri marctï Egipto marcat irpsuncta ucanacajj juchanwa jicjjatasi, janc'aquiw jupanacajj uca ewjja arunacajj phokhañjja apanucupjje, ucatsti mä diosa metalat lurasipjje’ sasa.

Deuteronomio 9:16

Ucampisa jumanacan uqham Tatitu Dios contra jucha luratanacam uñjta, mä vaca kallu metalat lursusipjjatanacama, uqhamata cawquïri thaquinjamtï Tatitu Diosajj sarañanacam munqui uca apanucupjjatam uñjasajj,

Josué 22:15

Take jupanacasti Galaad sat orakeruw sarapjjäna, cawqhantï Rubén, Gad, uqhamaraqui chicat Manasés tribunacajj ucancapcän ucaru, ucatsti sapjjänwa:

Jueces 2:17

Ucampis israelitanacajj uca jilïrinacarojj janiw ist'añjja munapcänti. Dios nayrakatan jan walïpjjatap laycusti yakha diosanacaru yupaychiriw sarapjjäna. Jupanacan nayra awquinacapasti Diosan mandamiento arunacaparu ist'asaw jacapjjäna, ucampis jupanacajja janiw uca uñacht'äwirjam sarañjja munapcänti.

Jueces 8:24

Ucampis nayajj mayipjjsmawa, aparanipcta uca surtijanaca churapjjeta —sasa. Uca kori surtijanacsti enemigonacapäqui uca soldadonacaw uchasipjjäna, jupanacasti inti jalsu tokenquir jakenacäpjjatap laycu.