Apocalipsis 22:12

Aymar Bibliia 1986

“Nayasti janc'aquiw jutä. Sapa maynitaquiraquiw churäwi apanï luratanacaparjama churañataqui.

Jak'a apnaqawi uñst'ayäwi

Job 34:11

Jupajj sapakatarusa luräwipatjamwa pago churi; sapakata jakerusa cunatejj waquisqui ucwa churaraqui.

Salmos 28:4

Luratanacaparjam jupanacarojj uñjam, jan wali sarnakäwiparjam uñjaraquim; jan wali luratanacaparjam mutuyam, ñankha lurataparjam juchañcham.

Isaías 40:10

Tatitojj ch'amapampiw purini, take cunsa ch'amampiraquiw apnakani. marcaparusti apanjjaraquiniwa, khespiyanjjasinjja.

Isaías 62:11

Tatituw acjja yatiyascaraqui aca orake tucuscama: “Sión marcarusti, sapjjaraquim, ‘Khespiyirimajj purinjjewa’ sasa. Tatituw marcapar khespiyasiñjja wasitat apasinjje.”

Jeremías 17:10

Naya Tatituwa, jaken chuymapjja uñjta, chuyma mankhapan amtatanacapsa yatiractwa; sapa maynirusa waquisitaparjamaw churaractjja, luratanacaparjamaraqui.”

Sofonías 1:14

“Jac'anquiwa Tatitun qhä jach'a urupajja. ¡Jac'anquiwa uca urojj, janc'aquiw puriniraquini! Tatitun jutäwip urusti wali jachañ urüniwa, jach'a ch'aman jakenacas ajjsarañat wararipjjaniwa.

Mateo 16:27

Jaken Yokapajj Awquipan jach'a munañapampiw angelanacapampi jutani, ucatwa sapa maynirus luratanacaparjama churjjani.

Romanos 14:12

Uqhamajj take maynipï Diosarojj luräwinacasat cuenta churañänejja.

1 Corintios 3:14

Maynin luräwipatejj uca ninan jan naqhantcani ucajja, pago catokani luratapatjja.

1 Corintios 3:8

Yapuchirisa, karpirisa mayaquiwa, Diosajj sapa mayniru luräwipatjam churcchini ucasa.

Apocalipsis 11:18

Marcanacajj wal colerasipjje, juman mutuyañ urusti puriniraquiwa, jiwatanacar taripañ horasamasa. Jumjjat parliri sirvirinacamarusti mä wajjt'äwi churaraquïtajja, uqhamarac jumar catuyasitäqui ucanacarusa, sutim jach'achirinacarusa, jisc'arusa, jach'arusa. Aca orake t'unjirinacarusa, jumajj t'unjaraquïtawa” sasa.

Apocalipsis 2:23

Wawanacaparus jiwarayaraquïwa, uqhamatwa take iglesianacajj yatipjjani nayajj jaken amuyupsa, chuymapsa uñt'atajja; jumanacarusti luräwinacamarjamaraquiw sapakat mayniru churapjjäma.

Apocalipsis 20:12

Jiwatanacarusti jisc'arus jach'arus jupan nayrakatapan sayt'ata uñjta. Libronacasti jist'aratänwa, uqhamarac yakha librosa. Uca librosti jacañ libro satawa. Jiwatanacasti luräwinacaparjam uñjatäpjjänwa, cunjämtï uca libronacan kellkatäcänsa uqhamaru.

Apocalipsis 22:20

Acanac khanañchiristi siwa: “Nayasti janc'aquiw jutä” sasa. Uqhamäpan. ¡Jutascaquim, Tatit Jesús!

Apocalipsis 22:7

“¡Janc'aquiw jutä! ¡Cusisiñaniw qhititejj Diosan arunacap aca libron kellkatäqui uc ist'qui ucajja!”

Apocalipsis 3:11

Acajj janc'aquiw jutä. Sum catjjäsim cunatejj utjctam ucjja, uqhamat jan qhitisa juman wajjt'asiñamjja apakañapataqui.