2 Timoteo 1:10

Aymar Bibliia 1986

Ucampis jichhajj uca munasiñapjja uñacht'ayiwa Khespiyiri Jesucristosan jutäwipampi, cawquïritejj jiwañan ch'amapjja t'unjawayi khespiyasiñ arunac toke, uqhamarac jan t'unjatäcani uca jacañjja khanaruw apsuraqui.

Jak'a apnaqawi uñst'ayäwi

Isaías 43:3

Nayätwa juman Tatitumajja, khespiyirimajja, Israelan Kollan Diosapätwa. Nayaw jumarojj alasinsa alassma. Egipto, Etiopía, Sabá marcanacata,

Isaías 45:15

Ucampisa jumajj jan uñjcaya Diosätawa, Israelan khespiyir Diosapa.

Isaías 45:21

Parlapjjam, arsusipjjaraquim, munapjjsta ucapachajj jumanaccamaraqui jisct'asipjjam: ¿Qhitis nayratpacha take acanac arsünjja? ¿Qhitis nayra urunacatpach yatiyänjja? sasa. ¿Janiti naya Tatitu ucanac lurctsti? Janiw yakha Diosajj nayat sipan utjquiti. Nayat sipan yakha atipjiri khespiyiriraqui Diosajj janiw utjquiti.

Oseas 13:14

¿Sepulturatjja jupanacar khespiyaraquïti? ¿Jiwañatsa khespiyaraquïti? ¿Jiwaña, cawquincarac t'unjiri jach'a ch'amamasti? ¿Sepulcro, cawquincaraqui jan wali lurañanacamasti? ¡Janiw aca jakenacatjja juc'ampi qhuyapayascjjäti!”

Lucas 11:36

Takpach janchimatejj khananïsina, jan mä acch'a ch'amacas utjcchejja, take cunwa sum uñjäta, cunjämatï mä lamparajj khantctamjja uqhama.”

Lucas 13:7

Ucat uca yap uñjirirojj säna: “Uñtam, quimsa marpachaw nayajj jutta aca alin achup uñjirejja, ucatsti janipuniw jicjjatcti. Phat'anucum. ¿Cunataquis inamayajj orakjj catjjäsinejja?” sasa.

Lucas 2:11

Jichhürojj jumanacataqui mä Khespiyiriw naci, Davidan marcapana, ucasti CRISTO Tatituwa.

Juan 1:9

Take jakenacar khant'qui uca chekpach khanawa acapacharojj purisincäna.

Juan 14:6

Jesusajj saraquïnwa: —Nayätwa thaquejja, chekasa, jacañasa. Naya tokequiw Awquin ucar puriñajj utji.

Juan 20:31

Ucampis acanacajj kellkatawa Jesusajj Cristötap iyawsapjjañamataqui uqhamarac Diosan Yokapätapsa, ucatsti iyawsasinjja jacañanïpjjañamataqui.

Juan 4:42

Ucatsti warmirojj sapjjänwa: —Jichhajj, janiw juman arsutamatacti iyawsapctjja, jan ucasti nanac pachpawa jupat ist'apjjtjja, yatipjjaractwa jupajj acapachan khespiyiri chekpach Cristötapa.

Juan 5:40

Jumanacasti janiw nayar jutañ munapctati jacañanïpjjañamataquejja.

Hechos 13:23

Uca quicpa Davidan familiapataraquïnwa Jesusajja, qhitirutejj Diosajj Israel marcar khespiyañapatac sayt'aycäna arsutaparjam uca.

Hechos 5:31

Ucatsti Diosajj jach'aruraquiw apti, cupëjjaparu utt'ayasa. Jach'a munañan Jilïri Khespiyiriracwa tucuyi, Israel marcajj juchanacapat arrepientisisa perdón catokañapataqui.

Romanos 16:26

Jichhasti take acanacajj khanañchasiwa Kellkatanac toke, cawquïrinactejj profetanacajj jaytawaycatayna wiñay Diosan arunacaparjama uca. Aca jan uñt'at yatichäwisti khanañchasiwa take jakenacajj juparu iyawsapjjañapataqui, jaysapjjañapataquiraqui.

Romanos 2:7

Diosajj wiñay jacañwa churani take qhitinacatejj Diosan marcapa, cheka cancañampi jan inact'as thakerinacarojja.

Romanos 3:31

Uqhamasti, ¿jichhajj iyawsäwi toketi leyirojj ina ch'usar tucuytanjja? Janiw cunäquipansa, ucat sipansa juc'amp ch'amanwa leyirojj tucuytanjja.

Romanos 6:6

Yattanwa, nayra jacañasajj jupampi chica ch'accatatäjjewa uqhamat jiwasan cuna jan walitejj utjqui ucajj t'unjatäñapataqui, uqhamat jan juc'ampi juchar sirvjjañasataqui.

1 Corintios 15:26

Khepïri uñisiristi jiwañawa, ucas k'ala t'unjataraquïniwa.

1 Corintios 4:5

Uqhamajj jumanacajj jan cunatsa mäqui juchañchapjjamti, jan ucasti suyt'apjjam Tatituru, jupaw take cunsa khanar apsuscani, cunatejj ch'amacan imantatäqui ucsa. Tatitojj take jakenacan amtatanacapsa khanaruw apsuni, ucatsti Diosajj sapakat maynirusa lurataparjamaraquiw uñjani.

2 Corintios 5:4

Aca oraken jaccasajja t'akhestanwa, ucatsti aykoractanwa. Janiw k'alaläña munctanti, jan ucasti isthapitäñwa muntanjja, uqhamata cunatejj jiwirïqui ucajj machak jacañampi chhaktayatäñapataqui.

Gálatas 5:4

Jumanacat maynïrinaca: “Leyiru phokhatas laycuwa Diosampi catokatätan” sirinacajja, Cristotjja jayancapjjewa, Diosan munasiñapatsa jayancapjjaraquiwa.

Efesios 1:18

Diosarojj maytwa jumanacar amuyt'ayañapataqui, cawquïri suyt'äwitaquitejj jawsquistu uc yatipjjañamataqui, cunja muspharcaña jach'a herenciatejj Diosajj churqui jupanquirinacaru uc yatipjjañamataquiraqui,

Efesios 1:9

Uqhamaraquiw uñt'ayistu jan amuyt'cañ amtäwipjja, ucasti cuntejj jupajj munañaparjam amtqui ucawa.

2 Tesalonicenses 2:8

Ucatsti qhä ñankha jakejj uñstaniniwa, Tatit Jesusasti saman phust'apampiquiw jiwayani, c'ajquir jutäwipampiw t'unjaraquini.

2 Timoteo 1:1

Naya Pablojj Jesucriston apostolopätwa, Diosan munañapat qhitata, cunjämatejj arsüwejj utjqui Cristo Jesusampi mayaru tucusin jacañjjata.

2 Timoteo 1:8

Jan p'enkasimti Tatitusjjat yatiyañjja, janirac nayats p'enkasistati. Jupa laycuw nayajj preso catutäscta. Ucat sipana t'akhesïwinacanjja t'akhesiraquim khespiyasiñ arunac laycu, cunjämtejj Diosajj ch'am churqui uqhamarjama.

2 Timoteo 4:1

Diosan nayrakatapana, uqhamarac Tatit Jesucriston nayrakatapana, cawquïritejj jutcani mä jach'a reyjama jiwatanacaru jaquirinacaru taripañataqui ucan nayrakatapanwa wal ewjjt'sma.

2 Timoteo 4:8

Jichhajj suma coronaw suyasquitu, qhä urunwa chekapar uñjir Tatitojj churitani, cawquïritejj chekap taripirïqui ucajja. Janiw naya saparuquiti churquitani, jan ucasti take qhitinacatejj munasiñampi Tatitun jutañap suyt'asipqui ucanacarojj churaraquiniwa.

Tito 2:11

Diosasti uñachayistuwa qhuyapayasiñapjja khespiyasiñap apanisa take jaketaqui.

Tito 2:13

Yaticharaquistuwa mä cusiscañ suyt'äwimpi jacañasa, jach'a Khespiyiri Jesucristo Diosajj uñstancani uc suyasina.

Tito 3:4

Ucampis cunapachatejj Khespiyir Diosajj qhuyapayasiñapa, munasiñapsa take jakenacaru uñacht'ayistojja,

Hebreos 10:32

Ucampis amtasipjjaraquimay nayra urunacamjja, cunapachatejj Diosan khanap catokapcäyäta, uqhamarac llamp'u chuymampi nuwasiñanacan t'akhesipcäyäta ucanacatjja.

2 Pedro 1:1

Naya Simón Pedrojja, Jesucriston sirviripätwa apostoloparaquïtwa. Aca cartsti, qhitinacatejj nanacjamaraqui mä suma iyawsañ jicjjatapctas ucanacaruw kellkanipjjsma, Khespiyiri Jesucristo Tatitusajj chekätap laycu.

2 Pedro 1:11

Uqhamatwa jumanacarojj churasiraquini jiwasan khespiyiri Jesucriston wiñay marcapar khespita mantapjjañamajja.

2 Pedro 1:3

Diosaw jach'a ch'amapampi churistu take cuntejj jacañataqui munctansa ucanacjja, uqhamarac jupar munañsa churaraquistu, qhititejj jach'a ch'amapampi, uqhamarac muspharcañ luräwinacapampi jawsquistu ucar uñt'ayasajja.

2 Pedro 2:20

Qhitinacatejj Tatit Jesucristo Khespiyiriru uñt'asin uca jan wali luräwinacat jaltanjjapjje, ucatsti khepatjja juchar cutt'asina jucha lurañanacampi atipjayasipjjaraqui ucanacajja, nayra jacañanacapat sipansa juc'ampi jan walëjjapjjewa.

2 Pedro 3:18

Ucampis khespiyiri Tatit Jesucristosar uñt'apjjam, munasiñapanraqui jiltapjjam. ¡Jupasti jach'achatäpan jichhas, wiñayataqui! Uqhamäpan.

2 Pedro 3:2

Amtasipjjam cuntejj nayra kollan profetanacajj Tatitun arunacap tokejj parlapcäna ucanacatjja, uca arunacasti jichhürojj apostolonac tokew jumanacarojj yatichatäjje.

1 Juan 1:2

—Aca jacañ Arusti uñstawayiwa, nanacasti uñjapjjaractwa, uca pachpataracwa khanañchapjjta; uqhamarac jumanacarus yatiyanipjjaracsma aca wiñay jacañata, qhititejj Awquimpïscäna ucat jiwasanacar uñstaraquistu ucata —sasa.

1 Juan 4:14

Jiwasanacpachaw uñjaractanjja, khanañcharactanwa aqham sasa: —Alajjpach Awquejja qhitaniw Yokaparu acapachar khespiyañataqui.

Apocalipsis 18:1

Take ucanaca pasatatsti yakha angelaruraquiw uñjaracta alajjpachat wali munañani sarakasinquiri, khanapasti take aca orakpacharuraquiw khant'äna.

Apocalipsis 2:7

Qhititejj ist'añ munqui ucajj ist'pan cuntejj Kollan Ajayojj iglesianacar sisqui ucjja: Qhitinacatejj atipjcani ucanacajj Diosan marcapan utjquis uca jacañ churir kokatwa mank'apjjani.”

Apocalipsis 20:14

Jiwañasa jiwirinacan utjäwipasa nina kotaru jakontatäjjänwa. Aca nina kotasti payïri jiwawa.

Apocalipsis 22:14

“Cusisiñanïpjjewa qhitinacatejj isinacapa t'ajjsusipjje jacañ kokat mank'asiñataqui, uqhamarac marcar puncu chek mantañataquisa.

Apocalipsis 22:17

Kollan Ajayumpi Corderon esposapampisti siwa: “Jutam”. Ist'irïqui ucasti saracpan “Jutam” sasa. Qhititejj umat pharjayasqui, ucat um muncaraqui ucajj jutpan, jacañ umat inac umt'aracpan.