1 Juan 5:6

Aymar Bibliia 1986

Tatit Jesucristojj jutawayiwa umampi wilampi unañcht'ata; janiraquiw umampiquiti, jan ucasti umampi uqhamarac wilampi, Ajayu pachparaquiw ucjjatjja testigo, Ajayusti chekaraquiwa.

Jak'a apnaqawi uñst'ayäwi

Ezequiel 36:25

K'oma umampiw jarekjjapjjaraquïma, take k'añunacamatsa k'omachjjapjjaraquïmawa.

Levítico 17:11

Take jaquirinacasti cuna wilatejj jupanjja utjqui ucampiwa jacaraqui. Nayaw jumanacarojj altarajjan wila churapjjsma, uqhamat jumanacajj uca wila toke cutsuyatäpjjañamataqui, uca wilapï phokjjejja jumanacan jacañanïpjjañamataquejja.

Zacarías 9:11

Acsti Tatituw sejja: “Jerusalén, jumamp arust'äwi wila tokwa, nayajj apsü jan umañ phuch'utjja, jumanacan preso jakenacamjja.

Mateo 26:28

Acasti nayan wilajjaraquiwa. Ucasti [machak] arust'äwiwa, cawquïritejj wartatäcani walja jakenacar juchanacapata khespiyañataqui.

Mateo 3:16

Cunapachatejj Jesusajj bautisatäjjän ucqhajja, umatwa mistunjjäna, ucatsti mayacwa alajjpachajj jist'artäna, Jesusasti uñjaraquïnwa Kollan Ajayurojj palomar uñtat jupjjar sarakasinquiri.

Marcos 14:24

Jesusasti sascaquïnwa: —Acajj nayan wilajjawa [machak] arsüwi phokhañataqui. Walja jakenac laycuw wartasi.

Lucas 22:20

Copa astasinjja uca pachparac luraraqui, mank'añ tucuyatatjja, saraquiwa: —Aca copajj machak arust'äwiwa wilajj toke, acasti jumanacan asquimataquiw wartasi.

Juan 14:17

Ucajj cheka Ajayuwa, acapachanquirinacasti janiw jupar catokcaspati, jan uñjatapa ni uñt'atapa laycu, ucampis jumanacajj uñt'jjapjjtawa, jupasti jumanacampïsquiwa, ucatsti jumanacanwa jacani wiñayataqui.

Juan 14:6

Jesusajj saraquïnwa: —Nayätwa thaquejja, chekasa, jacañasa. Naya tokequiw Awquin ucar puriñajj utji.

Juan 15:26

“Cunapachatejj chekpach Chuymachiri Ajayojj jumanacar yanapir jutcani ucqhajj, jupajj nayjjat parlani. Uca chuymachirsti nayaw Awquejjat qhitanï. Ucasti chekpach Ajayuraquiwa.

Juan 16:13

Cunapachatejj Kollan Ajayojj jutcani ucqhajja, jupaw take cunatejj chekäqui uca yatichapjjätam. Janiraquiw jupa pachpat parlcaniti, jan ucasti cuntejj ist'qui ucwa sani, yatiyapjjaraquïtamwa cunanacatejj pascani ucanacsa.

Juan 3:5

Jesusasti ucjjarojj saraquïnwa: —Khanacwa sisma, qhititejj umampita Ajayumpita jan nascani ucajj, janiw Diosan reinopar mantcaspati.

Juan 4:10

Ucjjarusti Jesusajj saraquïnwa: —Cuntejj Diosajj churqui uctejj yatismajja, uqhamarac qhititejj um mayctam uc yatiraquisma ucajja, jumaw nayarojj um mayitasmajja, nayasti jacquir umwa churaraquirisma —sasa.

Juan 4:14

Ucampis qhititejj naya churcta uca umat umcani ucajja, janiw mayampis pharjayascjjaniti. Cawquïr umtejj nayajj churcta ucajja jupa pachpanwa jalsuni wiñay jacañ churañataqui.

Juan 6:55

Janchejjasti chekpach mank'awa, wilajjasti chekpach umañaraquiwa.

Hechos 8:36

Cawqhantï umajj utjcäna ucawja cheka pascasinsti, uca jilïri take yänacjjar utt'ayat jakejj sänwa: —Acajjay umajja. ¿Janit nayajj bautisatäquiristjja?—sasa.

Romanos 3:25

Diosasti Jesucristoruw juchan pagopjama uchi, jupan jiwäwip laycu khespiyasiñajj utjañapataqui, iyawsäwi toke. Take acanacasti lurasiwa jupan llamp'u chuymapajj uñstañapataqui nayra juchanacas perdonatapatjja.

Efesios 1:7

Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.

Colosenses 1:4

Yatipjjaractwa jumanacan Jesucristor iyawsapjjatama, uqhamarac take Diosanquirinacarus munapjjatama,

1 Timoteo 3:16

Janiw Diosar arcäwisana imantatäqui ucatjja payachasiñajj utjquiti, ucasti wali jach'awa: Diosajj jaker tucusaw uñstawayi; jupajj Ajayunsa asquit khanañchataraquiwa, angelanacansa uñjataraquiwa. Marcanacarojj yatiyatawa, aca orakpachanjja iyawsataraqui, alajjpachansa catokataraqui.

Tito 3:5

janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa.

Hebreos 10:29

Uqhamajj ¿cunja jach'a mutuñsa catokañapäni qhitinacatejj Diosan Yokaparu, uqhamarac wilaparus jisc'achapjje, munasir Diosan Ajayuparus jisc'achapjje ucanacajja? Uca wilaw arust'äwi cheka tucuyejja, ucampiraquiw jupanacajj Diosatac yakhachatäpjje.

Hebreos 12:24

Uqhamarac Jesusarusa, jupawa machak arust'äwin arjjatiripajja, jupan k'omanchir wilapaw juc'amp suma parljjayistu Abel chachan wilapat sipansa.

Hebreos 13:20

Sumancañan Diosajj Jesucristorojj jiwatanac taypit jactayi. Uca Jesucristosti ovejanacan jach'a awatiripawa, wilapampiwa wiñay arust'äwipjja arsuwayi.

Hebreos 9:14

Ucampis ucajj uqhamächi ucajja ¡kawkha juc'amp ch'amanïpachas Criston wilapajja! Ucasti wiñay jaquir Ajayu tokew Cristojj Diosaru jupa pachpa loktasi jan k'añucht'ata, wilapas k'omacharaquistuw chuymasjja jiwañaru apquistus uca jan wali luräwinacatjja, jacquir Diosar sirviñasataqui.

Hebreos 9:7

Ucatsti Sinti Kollan Chekarojj jilïri jach'a sacerdotequiw mantirïna, maran mä cuti. Ucar mantañataquisti apañapänwa animalanacan wilapa, juchanacapat loktañataqui, uqhamarac jakenacataquisa.

1 Pedro 1:2

Take jumanacarusti Dios Awquiw ajllisipjjtam nayratpacha amtataparjama. Kollan Ajayu tokeraquiwa jumanacarojj jupataqui yakhachasipjjtam, jupar jaysapjjañamataqui, Jesucriston wilapampi k'omachatäpjjañamataquiraqui. Jumanacasti Diosan bendicionanacapjja jilarquiri catokapjjam, uqhamarac suman sarnakasiñsa.

1 Pedro 3:21

Uca umasti bautismo umaruw uñtasejja, uca tokeraquiw jichhajj khespitätanjja. Uca bautismosti janiw janchi k'omachañataqui asquïquiti, jan ucasti Diosat mä k'oma chuyma mayiñanquiwa; Jesucriston jactäwip tokeraquiw khespitätanjja,

1 Juan 1:7

Jiwasatejj khanan jacstan, cunjämatejj Diosajj khanancqui uqhamjja, mayaquïtanwa maynimpi maynimpisa, Jesucristo Yokapan wilapaw take juchanacasat k'omacharaquistu.

1 Juan 4:10

Aqhamanquiw munasiñajja: janiw jiwasanacati Diosar munapcäyätanjja, jan ucasti jupaw munistu Wawap qhitanisina juchanacasat khespiyañataqui.

Apocalipsis 1:5

Diosan cheka testigopa Jesucristotsa catokapjjaraquim bendicionapjja. Uca Jesucristowa jiwatanacat nayrïri jactirejja. Take acapach reyinacjjarus jupajj munañaniraquiwa. Jesucristojj jiwasarojj walwa munistu, juchanacasatsa wilapampiw jarekestu.

Apocalipsis 5:9

Mä machak k'ochu k'ochupjjaraquïna: “Jumajj asquïtawa uca libro catuñataqui, sellonacap ch'iyarañataquisa; jumarojj jiwayapjjäyätamwa, ucatsti wilamampiw Diosataqui alapjjestajja, take casta jakenacaru, cunayman parlani jakenacaru jisc'a marcaru, jach'a marcaru.

Apocalipsis 7:14

Nayasti sistwa: “Tata, jumaw yattajja” sasa. Jupasti saraquituwa: “Acanacajj wali jach'a llaquinacwa pasanipjje, isinacapsti Corderon wilapampi t'ajjsusaraquiw jank'optayanipjje.