100 Diosar jan jitheqtañat parlir Biblian jiskʼa tʼaqanakapa

“Tatitu Diosamarusti take chuymamampi, take jacañamampi, take ch'amamampi munam.

Ucampisa janitï jumanacajj Diosar sirviñ munapcsta ucajj, jichhüruy ajllisipjjam qhitirutï sirvipjjäta uca. Awquinacamajj Eufrates sat jawira lacana sirvipcäna uca diosanacaruti, jan ucajj cawquïrinacatï aca orakenacan jacapqui uca amorreonacan diosaparucha. Ucampisa nayampi take familiajjampejja Diosaruw sirvipjjä.

Uqhamarusa, qhititejj mä luraña catokqui ucajj asquïñapawa take cunana uqhamat sumaru uchatäñapataqui.

“Janiw qhitis pä patronarojj sirvcaspati, maynirojj munaniwa, maynirusti uñisiraquiniwa, jan ucajj maynirojj jach'achaniwa, maynirusti jisc'acharaquiniwa; Diosampiru kollkempirojj janiw qhitis sirvcaspati.

Tatitojj asqui cancañar muniriwa, arquirinacaparojj janiw jaytanucquiti. Jucharar jakenacarusti tucjiwa, allchhinacaparus tucusiyaraquiwa.

Jumanacajj Tatituruquiw ajjsartapjjañama, uqhamarac juparojj chekpachana take chuymampiraqui sirvipjjañama, amtasipjjañamaraquiwa cuna jach'a asquinactejj jumanacataqui lurqui ucanacata,

Janipuni cunapachas armasimti munasiñampita cheka cancañampita; ucanacsti mä collarjama cuncamar warcuntasim. Chuymamarusti ucanacjja sum imaraquim, Jan qhitis jumar ñankha lurquipanjja, jan qhitimpisa ch'ajjwañaru mantamti. Lokhe chuyman jakerojj, jan jach'ar aptamti, janirac jupjam sarnakañsa munamti; Tatitusti jan wali luririnacarojj janiw munquiti, ucampis jupajj asqui jakenacampiwa parlasi. ñankha lurir jaken utaparojj ñankhachiwa, ucampis asqui jaken utaparojja asquimpiw phokt'i. Tatitojj jisc'achiri jakenacarojj jisc'achiwa, ucampis llamp'u chuyman jakenacatsti qhuyapayasiwa. Yatiñan jakenacan churäwipajj aytat cancañawa, ucampis jan amuyt'an jakenacajj p'enkachatäniwa. ucatsti sumaru uñjata, munataraquïyätawa Diosan nayrakatapana, uqhamarac jakenacan nayrakatapansa.

“Jumanacatejj munapjjchistajja, camachinacajj phokhapjjam.

“Jichhasti israelit jakenaca, ¿cunsa Tatitu Diosamajj jumanacat mayipjjtamjja? Juparu jach'añchañanacama, jupan thaquipanjam arcañanacama muni, ucatsti munaraquiwa juparu munapjjañanacama, yupaychapjjañama take chuymampi, take jacañamampi,

Tatitur iyawsirinaca, jupar munasipjjam: Tatitojj asqui arquirinacaparojj imiwa, jach'a jach'a tucurinacarusti lurataparjamaruw juchañchi.

Ucampis jumanacajj Tatit Diosasampejj chekapäpjjam, ucatsti leyinacapjja phokhapjjam, uqhamarac camachi arunacaparusa ist'apjjaraquim cunjämatï jichhürunjama” sasa.

Takpach chuymajjampiw thaksma, janiquiy arunacamat saraktañajj munamti.

Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.

Uqhamasti jilatanaca, Diosan qhuyapayasiñap laycuw achict'apjjsma, jumanacajj Diosarojj jacquir ofrendjamay loktasipjjam, Diosar cusisiyquiri loktata. Ucawa Diosataquejj ajayu token chekpach Diosar sirviñajja.

Jesusasti juparojj sänwa: —“Tatit Diosamaruw munäta take chuymamampi, take almamampi, take amuyumampiraqui.”

Uqhamasti munat jilatanaca, jumanacajj Tatitumpejj sum sayt'asipjjam, janirac sarakapjjamti. Irnakasipcaquim juc'ampi juc'ampi Tatitun luräwipanjja; jumanacajj yatipjjaractawa Tatitumpi mayaqui irnakapjjatamajj janiw inamayäquiti.

Tatitun arunacapar jaysirinacajj cusisiñaniwa, takpach chuymamp jupar thakerinacajj cusisiñaniwa,

Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.

Juparutejj jan take chuyma arccañäni ucas, jupajj janiw armasquistaniti, Diosajj janiw jupapachpa armascaspati.

Diosaruy jaysapjjam, Supayataquisti sayt'asipjjaraquim, uca Supayasti jumanacatjja jaltawayjjaraquiniwa.

Walja jakenacawa sapjje: “Suma asqui jakëtwa” sasa, ucampis janiw qhitis asqui jakejj utjquiti.

“Janiw jumajja nayat sipana yakha diosanacjja uscusïtati.

Tatay, chekaparuy uñjita, jacañajjajj jan camscayawa. Tatay, jumaruw takpach chuymamp iyawssma,

Tatitu Diosama saparuqui arcapjjam, jach'añchapjjaraquim, ist'apjjaraquim camachi arunacapsa, jaysapjjam juparu ucatsti yupaychapjjaraquim, uqhamaraqui juparu chict'atapuni jacapjjaraquim.

Janiw Tatitun copapampita ñankha ajayunacan copapampitjja umapcasmati, janiraquiw Tatitun mesapampita ñankha ajayunacan mesapampitsa mank'apcaraquismati.

Asqui jakenacaruw nayajj uñtä, nayamp chic jacapjjañapataqui; chekap sarnaker jakequiw loktitani.

Tatitusti sumwa uñjasqui take acapachana cunanacatejj lurasisqui ucanacjja, uqhamata ch'ama churañataqui qhitinacatejj chekpachana juparu iyawsasipqui ucanacaru. ¡Jumasti mä lokjamawa uqham lurtajja! ¡Jichhat ucsarusti juc'ampi guerranacawa jumataqui utjani!” sasa.

Take jakenacaraquiw jumanacarojj uñisipjjätam nayar arcapjjatam laycu, ucampis qhititejj tucuycama sayt'cani ucawa khespiyatäni.

Take jumanacasti Jesucriston arunacaparjam sarnakapjjam. Nayasti jutcäsa jan ucajj jayanccäsa, yatiñwa munta jumanacatjja suma yatiyäwinaca, ch'amampi sarantasa mä jakjamaqui, uqhamarac khespiyasiña arunacar iyawsäwi laycusti takenisa mayaqui nuwasïwincasasa,

Ucampis Tatitojj chekawa, jupajj ch'amañchapjjätamwa, take jan walitsa imapjjaraquïtamwa.

Mä uruquis utaman kamañajj juc'amp sumawa, warank urunac ankancañat sipana. Nayajj Diosan templopancañ munta, ñankha lurañ chekawjan jacañat sipana.

Jan acapachar munirïpjjamti, janirac acapachan yänacapsa. Cawquïritejj acapachar munasqui ucanjja, janïraw Dios Awquitac munasiñapajj utjquiti.

Suyapjjapunim, iyawsañanacamansti ch'aman sayt'apjjam, chachjama sarnakapjjam, ch'amañchasipjjaraquim.

Cuna t'akhesiñanacatï jumjjaru jutcani ucanacatjja jan ajjsaramti. Supayasti jumanacat mä yakhepanacarojj carcelaruw apayani, take jumanacasti wali yant'atäpjjaraquïtawa. Tunca ururaquiw t'akhesipjjäta. Ucampis jiwañcamatejj arcascaquïta ucapachasti, nayasti jacañ corona churäma.

Juramento lurta, ucsti phokhäwa: cheka arunacamarjamaw sarnakä.

Jiwasatejj juchanacas arsusiñänejja, jupajj chekawa, asquiraquiwa juchanacas perdonañataqui, uqhamarac take jan walinacata k'omachañataquisa.

Jacapctansa, Tatitutaquiw jacapjjtanjja; jiwjjañän ucqhatsti Tatitutaquiraquiw jiwjjañäni. Uqhamasti jiwañansa jacañansa Tatitutaquïtanwa.

“Qhititejj juc'a apnakañanacan chekapäqui ucajj, walja apnakañanjja chekaparaquïniwa; juc'ana jan chekapäcchi ucajja waljanjja janiraquiw chekapäcaspati.

Jarc'akasipjjam take armanactejj Diosajj churapctam ucanacampi, Supayan c'ari arunacaparu atipjañataqui.

Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa.

Uqhamajja asqui lurañanjja janiw karjasiñasäquiti, janitejj karjtcañäni ucajja, horasaparuw cosechjja apthapiñäni.

Tatitojj qhuyapayasiñamp asqui cancañampipuniw irpi, arusjäwipamp arsutanacapamp imir jakenacarojja.

Diosan arunacapan kellkatasti saraquiwa: “Jumanacajj kollanäpjjam, nayasti kollanätwa uca laycu” sasa.

Iyawsäwi laycuraquiw sarnakasctanjja, janiw uñjatas laycuti.

Jumajj Tatit Diosaman ewjjanacapa phokham, munañapa lurasina, uqhamarac leyinacapa phokhasina, camachi arunacapa, arsutanacapsa, cunjämatï Moisesan leyipan kellkatäqui uqhama, take luräwinacamasa, cawqharutejj sarcäta ucqhansa asquir sarañapataqui.

Take cuna imatäqui ucat sipansa chuymam imam, jacañamasti uca chuymamatwa juti.

Marcajjay, jupar take chuymamp iyawsam, chuymanacam jupar jist'arapjjam, Diosaw jiwasan imantasiñasajja.

Tatay, thaquimay uñacht'ayita, jan saraktas arcañajjataqui. Chuymajjarusti sutim wakaychir tucuyam.

Jesusasti discipulonacaparojj saraquiwa: —Maynitejj nayar arcañ munchitu ucajja, jupa quipcat armt'aspan, ucatsti arquitpan jacañap apt'asirjamäcchi ucasa.

Jesusasti juparojj sänwa: —Qhititejj arado catt'atäcasin khepar uñtqui ucajja, janiw Diosan reinopataquejj asquiquïti —sasa.

Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.

Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.

Jan wali amtäwini jakenacarojj Tatitojj janiw munquiti, ucampis jupajj munasiwa asqui lurasa sarnakeri jakenacarojja.

Ucatwa nayajj Tatit laycu presötjja, achict'apjjsmawa jumanacajj Diosan jawsatanacjama sarnakapjjam.

Ucatpï munat jilatanaca, acanac suyt'casajja take cunsa ascpun lurapjjam, uqhamata Diosajj jumanacar sumana jicjjatañapataqui, jan juchani ni cuna k'añunsa.

Janiw Diosarojj jan iyawsañampejj cunapachas cusisiycsnati, jupar jac'achasiñataquejja maynejj iyawsañapawa Diosajj utjatapa, uqhamaraqui jupar thakerinacarojj bendicirïtapa.

Cheka lurir jakejj jach'añchatäniwa; qhititejj sallkjañampi mäqui kamiriptqui ucajja, juchañchatäniwa.

Tatitojj uywatanacaparojj khespiyiwa, jupar iyawsirinacajj janiw juchañchatäpcaniti.

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

Uqhamajj janiy iyawsañanacamjja chhaktayasipjjamtejja, uca iyawsañasti mä jach'a wajjt'äwi utjayani.

Take cun yant'apjjam, ucatsti cunatejj asquïqui ucana catjjarupjjam.

Cusisiñaniwa qhititejj yant'anacjja llamp'u chuymampi catokqui ucanacajja. Uca yant'ar atipjas misturinacasti churäwi catokapjjani mä coronar uñtata, uca churäwisti cuntejj Diosajj jupar munirinacaru jacañ churaña arscänjja ucawa.

Qhititejj ñankha lurir jakenacan amtayataparjam jan sarnakqui ucajj cusisiñan jakewa. Jupajj janiw jucharar jakenacan thaquipan sarnakquiti, janiraquiw Diosamp sawcasirinacampis chicachasquiti, jan ucasti, jupan cusisiñapajj Tatitun arupawa, uca arupatsti arumay uruw lup'i.

Jan ucasti Jesucristomp isthapt'asipjjam, janiraqui lup'ipjjamti janchin munañapa lurañjja.

Uqhamajj jichhajja, take iyawsañampiw arssnajja: “Tatituw yanapt'irejjajja; janiw cuntejj jakejj lurquitaspa ucjj ajjsarcäti” sasa.

Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti.

Ucampis jiwasanacajj urunquirjamajja, amuyasiñasapuniwa. Jarc'akasiñasawa iyawsañampi, uqhamarac munasiñampi, khespiyasiñataqui suyt'añajj mä cascjamawa p'ekesaru imantañapajja.

Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.

Jan sallkjayasipjjamti. Cunjämtejj säwejj sisqui: “Jan wali jakenacampi sarnakañajj suma luräwinaca chhakhayañawa” sasa.

Nayajj suma nuwasïwjja nuwastwa, tucuyäwcamaw jalaracta, iyawsañsti janiraquiw chhakaycti.

ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.

Tatay, asqui jaketaquejj asquiraquïtawa, jan camscayäqui uca jaketaquis jan camscayaraquïtawa,

“C'ullc'u puncu toke mantapjjam. Chhakhañaru irpiri thaquisti anchowa, puncupasti wali anchoraquiwa; waljaniraquiwa uca toke mantasipqui. Jacañaru irpiri thaquisti wali c'ullc'uwa, puncupas uca quicpa c'ullc'uraquiwa, juc'aniquiraquiw ucarojj mantapjje.

Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa. Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu.

Tucuycamatejj take chuyma arcañäni take iyawsañampi, cunjämatï kalltatpacha utjquistu uqhama, ucapachajj Cristompejj utjistuw cunatejj jiwasanccani ucajja.

Wali amuyt'asirïpjjam, janc'aquïpjjaraquim, jumanacar uñisir Supayasti mä leonar uñtataw warart'asisa sarnakasqui qhitiru mank'antañataquisa. Uca Supayataquisti wal sayt'asipjjam iyawsañanacamanjja, yatipjjaraquim walja jilatanacan jumanacjamaraqui take chekan t'akhesipjjatapjja.

“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.

Ucampis qhititejj tucuycama sayt'cani ucawa khespiyatäni.

Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja. Janchi awquinacasajj juc'a tiempotaquiquiw chekachawayistu cunjämtejj amuyupanjj walïquejj uqhamaru, ucampis Diosajj jiwasan asquisataqui, kollan tucuñasataqui, cunjämatejj jupajj kollanäqui uqhamaruw chekachistu. Chekpachansa janipuniraquiw cuna mutuyäwi catokasas —Walic mutuyitojj —sisctanti, jan ucasti usustuwa, qhitinacatejj uca mutuyäwi toke yatekapjje ucanacajj mä suma asquin samarañanracwa jacapjje. Uqhamajj machak ch'amay churapjjamjja uca karjata amparanacarojja, uqhamarac t'uqha konkorinacamarusa. Chekap thaqui thakapjjam, ucatsti cojo cayüquis ucajj waliptjjaniwa, janiraquiw mayampsa k'ewsuscjjaniti. Takenimpis suman sarnakasiñ thakapjjam, k'oma jacañan sarnakasa, jan ucampisti janiw qhitis Tatitur uñcatcaspati. Amuyasipjjamay takenis Diosan yanapt'apa catokapjjañamataqui, jan jumanacata maynisa cunjämatejj mä jan wali c'asc'a korajj mayninaca jan walt'ayqui, uqhamäpjjamti. Janiraqui qhitis wachoka jucha lurasa sarnakcpati, janirac jisc'achapjjamti cunatejj k'omäqui ucarusa. Esaú chachajj ucwa luränjja, mä plato mank'a laycuquiw jilïr yokall wawäñjja aljasïna. Yatipjjaractaw cunapachatejj Esaú chachajj bendición awquipat catokañ munäna ucapachajja, janiw churatäcänti, wali jachatapampis janiw cutsuycänti uca luratapatjja. Jumanacajj janiw jac'achasipctati israelitanacjama qhaya kolluru llamct'añjamäcän ucarojja, ucanjja ninaraquiw akäna, lajja ch'amacanacan jach'a thayampi cuna; janiraquiw trompeta phust'atarus ni Diosan arunacaparus jumanacajj ist'apcäyätati. Uca ist'irinacasti achict'asipjjänwa jan juc'amp parljjañapataqui. Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.

Jan wali yatiyäwinacarojj janiw ajjsarquiti, chuymapajj Tatituncasajj wali thurt'atawa.

Criston ch'amapampejj take cunaruw saycatirista.

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.

Nayrakatarupuni uñtam, nayräjjat uñtaraquim. Sum amuyasim cawqharutejj tact'ctajj uca chekjja, ucatsti suma chekarupuniw tact'ätajja. Thaquimatjja jan maysaru saranucumti; jan wali sarnakäwinacanjja janipun sarnakañ munamti.

Arunacamajj sarnakäwejjatac khanawa, thaquejjan khantiriraquiwa.

Diosajj jupar catuyasita k'oman jacañasataquiw jawsistu, janiw juchan jacañasataquiti.

Ucatpï jilatanaca, jumanacajj wali amuyt'asipjjam cuntï lurapcäta ucanacatjja, uqhamarac mä suma jacañan sarnakapjjaraquim. Take chuymaraqui suyt'apjjam cuntejj Diosajj qhuyapayasiñapanjja jumanacar churañataqui waquichasqui Jesucristojj jutcani ucqhajja.

Diosasti asquiwa, janiw armascaniti cuntejj lurapcta, uqhamarac munasiñanacamsa uñacht'ayapjjaracta Diosanquir jilatanacar yanapt'asina ucanacatjja. Jichhacamas ucjj lurasipcactawa.

Jumanacajj yatipjjtawa, mä atipasiñanjja takeniw jalapjje, ucampis mayniquiw premio catokejja. Jumanacasti jalapjjamaya premio catokañcama.

jupaw machak ch'am churitu, cheka thaquinjam irpitu, sutipar jach'añchañ laycu.

Ucatpï ch'amacht'asipjjañamajja iyawsatanacamarojja suma luräwinacampi yapjjatapjjañamataqui; suma luräwinacarusti amuyt'asiñampi; amuyt'asiñarusti, jumanacpach suma sarnakañampi; jumanacpach suma sarnakañarusti, llamp'u chuymampi; llamp'u chuymanïñjjarusti, Diosar munañampi; Diosar munañarusti, jilapurjam sarnakañampi; jilapurjam sarnakañarusti, munasiñampi.

“Cusisiñanïpjjew qhitinacatejj Diosan munañaparjam sarnakañat awtjayasipjje, pharjayasipjjaraqui ucanacajja, Diosaw jupanacarojj uc phokhañjja yanapani.

Uqhamajj catjjarupjjam kawkha armanactejj Diosajj churapctam ucanaca, uqhamat jan wali urun atipjapjjañamataqui, uqham lurasinsti juc'amp ch'amani sayt'apjjañamataqui.

Dios Tatitojjay, munañam lurañaw cusisiyitu; yatichäwinacamajj chuymajjanquiwa.”

Alajjpach yänacat lup'ipjjam, jan acapach yänacatjja.

cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.

Ajayojjajj jumamp chict'atawa, cupi amparamasti janiw antutnucquituti.

Nayajj jiwjjtwa Cristompi chic ch'accatata, ucampis janiw nayajj jacjjtti, jan ucasti Cristow nayan jacjje. Aca janchin jactsa ucajja, Diosan Yokaparu iyawsatajj laycuquiw jacasctjja, nayar munasinwa jacañapa naya laycu apt'asiwayi.

jupatejj jichhürojj may munani, khepürusti yakha munaraquini ucajja. Uqham may may amtiri jakejja janiw cuns sum lurcaspati.

Uqhamaraqui chuymanacamanjja ch'amañchatäpjjañamataqui, k'omachata jan cuna juchani Dios Awquisan nayrakatapana, cunapachatejj Tatit Jesusajj take jupanquirinacapampi jutcani ucapachajja.

Acajj janc'aquiw jutä. Sum catjjäsim cunatejj utjctam ucjja, uqhamat jan qhitisa juman wajjt'asiñamjja apakañapataqui.