Números 10:29 - Qullan Arunaka DC

²⁹ Mä urusti, Moisesax warmipan jilaparuw jawsäna, ukasti Hobab satänwa, Reuel sat madianita chachan wawaparakïnwa, juparusti akham säna: —Tatitux churapkitani uka uraqiruw nanakax sarasipkta. Jutam, nanakamp chik saram, nanakax sum uñjapxäma, Tatitux arupampiw arsu Israel markar munasiñamp uñjañataki —sasa.

Aymar Bibliia 1986

²⁹ Moisesasti mä urojj warmipan jilaparuw jawsäna, ucasti Hobab satänwa, Reuel sat madianita chachan wawaparaqui, ucatsti sänwa: —Nanacajj sarasipctwa cawquïri oraktejj Tatitojj churämaw sapquitu ucaru. Jutam, nanacampi chica sarañäni, sum uñjapjjaraquïma, Tatitojj arupampiw arsu Israel marcar munasiñampi uñjañataquejja —sasa.

Qullan Arunaca

²⁹ Moisesasti mä urojj warmipan jilaparuw jawsäna, ucasti Hobab satänwa, Reuel sat madianita chachan wawaparaqui, ucatsti sänwa: —Nanacajj sarasipctwa cawquïri oraktejj Tatitojj churämaw sapquitu ucaru. Jutam, nanacampi chica sarañäni, sum uñjapjjaraquïma, Tatitojj arupampiw arsu Israel marcar munasiñampi uñjañataquejja —sasa.

Números 10:29 Jak'a apnaqawi uñst'ayäwi

Génesis 12:7

Ukawjan Tatit Diosax Abramar uñstäna, ukatsti sarakïnwa: “Jumat saraqir wawanakamaruw aka uraq churä” sasa. Ukatsti Abram chachax mä altar uka chiqan wakichäna, Tatitur jach'añchasa, jupar uñstatap layku.

Génesis 13:15

uñjktas uka uraq nayaw jumar churäma, wiñayatakiw jumankani, wawanakamankarakini.

Génesis 15:18

Uka pachpa uruw Tatitux Abram chachampix mä amtäwir mantäna, sarakïnwa: —Wawanakamaruw aka uraq churä, Egipto jawirata, Éufrates sata jach'a jawirkama.

Génesis 17:8

Canaán uraqisti, kawkhantix jichhax jakkta uka uraqix jumampiru, wawanakamampir wiñayatak churatäniwa, nayasti jupanakan Diosaparakïyäwa —sasa.

Génesis 32:12

12 (13) Jumax qhan sistaxa: ‘Nayaw yanapaskäma, wawanakamas quta iranankir ch'allanakjam jan jakt'kayäniwa’ ” sasa.

Salmos 100:1

¡Taqpach aka uraqin jakirinaka, Tatitur kusisiñamp q'uchupxam!

Salmos 34:8

8 (9) Yant'apxam, uñjapxarakim, Tatitux suma jaqiwa. ¡Jupar taqi chuymamp makhatirix kusisiñaniwa!

Salmos 95:1

Jutapxam, Tatitur q'uchupxañäni, arxatir qhispiyirisar kusisit yupaychapxañäni.

Éxodo 18:1

Jetró chachax Moisesan awkch'ipänwa, Madián markan sacerdoteparakïnwa, jupasti taqi kuntix Diosax Moisesampitaki, Israel markapampitakis lurkatayna ukanak yatïna, kunjämtix Tatitux Egiptot jupanakar irpsunkatayna ukanak yatirakïna.

Éxodo 18:12

Jetró chachasti ukspachaw mä uywa katusin nakt'at wilañcha Diosar luqtäna, ukhamarak yaqha waxt'anakampi. Uka qhipatsti, Aaronampi, Israelan jilïrinakapampix Moisesan awkch'ipamp chikaw Diosan nayraqatapan manq'apxäna.

Éxodo 18:27

Uka qhipatsti Moisesax awkch'ipar sum khithanukxäna, awkch'ipasti markaparuw kuttawayxäna.

Éxodo 2:18

Tawaqunakax utapar purxapxän ukkhasti, awkipax jupanakar jiskt'änwa: —¿Kunatarak jichhürusti wali urut jutxapxtasti? —sasa.

Éxodo 2:21

Moisesasti iyaw sasaw uka tawaqunakan awkipan utapan jakxäna. Uka qhipatsti Jetró sacerdotex Séfora sat phuchhapampiw Moisesar jaqichxäna.

Éxodo 3:1

Moisesax Jetró awkch'ipan ovejanakap awatïna, uka awkch'ipasti Madián chiqan sacerdotënwa. Mä urusti, Moisesax wasaranjam ovejanak anakïna, ukatsti Diosan Horeb sat qullupkamaw purïna.

Éxodo 3:8

Ukat nayax jutta egipcionakan amparapat markaxar qhispiyiri; jupanakar uka markat apsunxäwa, ukatsti mä jach'a suma uraqiruw irpxä, kawkhantix lechesa, misk'isa umjam jalaski ukaru. Uka uraqisti cananeonaka, hititanaka, amorreonaka, ferezeonaka, heveonaka, jebuseonakax jakapki uka uraqiwa.

Éxodo 6:4

Ukhamarus jupanakamp mä arust'äwi lurta, jupanakar Canaán uraqi churañatakiw arsurakta, kawkhantix jupanakax nayra pachan jayankir jaqinakjam jakapkäna uka uraqi.

Isaías 2:3

walja markanakaw purintanipxani, akham sasa: “Jutapxam, Tatitun qullupar makhatapxañäni, Jacobun Diosapan utaparu, jupaw jiwasarux thakhip uñacht'ayistani, ukhamat thakhipanjam sarnaqañasataki” sasa. Sión qullutpach Tatitun yatichäwinakapax mistuni, Jerusalenat arunakapas misturakini.

Jeremías 50:5

Jerusalén markar sarir thakhit jiskt'asipxani, ukatsti uksaruw akham sasa sarapxarakini: ‘Tatitun ukar sarxañäni, jupampisti wiñayatak mä arust'äwi lurañäni, jan mayampitak armaskiri’ sasa.

Números 10:28

Ukhamaw israelitanakan ejercitonakapax thakhinjam tam tama sarantapxäna.

Números 23:19

Tatitux janiw jiwir jaqinakjamäkiti: janiw k'ariskiti, janirakiw amuyt'äwip mayjt'aykisa. Jupax arsutaparjam lurapuniwa. Jupax arsutap phuqhapuniwa.

Hechos 7:5

Ukampis janiw kuna katuqäwsa aka uraqin churkänti, janirakiw mä jisk'a uraqsa churkänti. Ukampisa, Diosax uraq churañatakiw Abrahamar arsuwayäna, jupa jiwatat aka uraqix wawanakapankañapataki. Ukürunakansti Abrahamax janïraw wawanïkänti.

Deuteronomio 30:5

Tatituw wasitat kuttayanipxätam, kawkïr uraqtix jumanakan awkinakamax katupkäna uka uraqiru; jumanakaw ukan utjasipxäta, juparakiw jumanakar jach'aptayapxätam, awkinakamat sipan walja wawanak churapxätam.

Deuteronomio 4:40

Jichhürun churapksma uka kamachi arunakap phuqhapxam, ukatsti jumanakasa, wawanakamasa, sumakiw sarnaqapxäta, walja maranakarakiw jakapxäta Tatit Diosamax wiñayatak churapkätam uka uraqina.”

Tito 1:2

ukhamarak wiñay jakañ suyt'äwirusa. Uka wiñay jakañ churañatakix Tatitux janïr aka uraqi qalltaskipan phuqhañatakiw arsuwayi, Tatitusti ukham arsutap phuqhapuniwa.

Hebreos 6:18

Aka pä luräwix janiw mayjt'kaspati, ukanakat Diosax janiw k'ariskaspati; khitinakatix Diosan imantasiñap thaqhapktan ukanakax mä jach'a chuymachasïwi katuqtan, jupax churkistu uka suyt'äwirus iyawsaraktan.

Apocalipsis 22:17

Qullan Ajayumpi Corderon esposapampisti sapxiwa: “Jutam” sasa. Ist'irïki ukasti sarakpan “Jutam” sasa. Umat pharjayasiristi, jutpan; um muniristi, jakañ umat inak umt'arakpan.

Jueces 1:16

Moisesan awkch'ipat saraqiri quenita wawanakapasti, Judá ayllunkirinakamp chikaw Jericó markat mistupxäna, ukatsti Arad sat chiqankki uka wasararuw sarapxäna, ukan jupanakax ukankir jaqinakamp jakiri qhiparapxäna.

Jueces 4:11

Quedes sat chiqa jak'anxa, Saanaim sat encina thiyan Héber sat quenita jaqix utap lurasïna, jupasti mayni quenitanakat jayaruw saraqxatayna, jupanakax Hobab sata, Moisesan awkch'ipat saraqirïpxarakïnwa.

1 Samuel 15:6

Quenitas sat jaqinakarusti sarakïnwa: —¡Jithiqtapxam! ¡Amalecita jaqinak taypit mistupxam, ukhamat nayan jumanakar jan jupanakamp chika tukjañaxataki; jumanakasti israelitanakarux sum uñjapxäyätaxa kunapachatix Egiptot jutapkän ukaxa! —sasa. Quenitanakasti amalecita jaqinak taypit mistuwayxapxänwa.