Lucas 20:10 - Qullan Arunaka DC

¹⁰ Yapu apthapiñ pacha purinxipansti, mä uywatap khithäna yapuchirinakat qawqhatix jupar wakt'kän uk mayiri; ukampis jupanakax nuwjasaw jan kunan khithanukxapxäna.

Aymar Bibliia 1986

¹⁰ Yapu apthapi horasa purinjjëpansti mä uywatap qhitäna yapuchirinacat cunatï jupar wact'cäna uca mayiri; ucampis jupanacajj nuwjapjjänwa, ucatsti ucsac qhitanucjjapjjäna.

Qullan Arunaca

¹⁰ Yapu apthapi horasa purinjjëpansti mä uywatap qhitäna yapuchirinacat cunatï jupar wact'cäna uca mayiri; ucampis jupanacajj nuwjapjjänwa, ucatsti ucsac qhitanucjjapjjäna.

Lucas 20:10 Jak'a apnaqawi uñst'ayäwi

1 Reyes 22:24

Ukat Quenaaná chachan Sedequías yuqapax, Micaías profetar jak'achasisin ajanupat may t'axllintäna, ukat sarakïna: —¿Kawkinjamsa Tatitun ajayupax nayat mistuwayi, jumar parlañatakisti? —sasa.

2 Reyes 17:13

Tatitusti taqpach profetanak tuqiw israelitanakarux iwxatayna, jan wali sarnaqäwinakap apanukupxañapataki, ukhamaraki nayra awkinakapar jupax churkatayna uka kamachi arunakaparu, taqi yatichäwinakapar phuqhapxañapataki.

1 Crónicas 19:4

Ukatsti Hanún reyix Davidan jaqinakaparuw katurayäna, ukatsti sunkhanakap khithurayäna, isinakapsa jikhanit aynach tuqirux q'al ch'iyanuqayäna. Ukat khithanukxäna.

2 Crónicas 16:10

Asá reyisti profetatakix walpun q'apisïna, ukat carcelar uchantayäna. Uka urunakanxa markankirinakat yaqhipanakarux mutuyarakïnwa.

Nehemías 9:26

“Ukampis jupanakax jan ist'asirïpxänwa, jumatak sayt'asisin kamachimar jisk'achapxarakïna. Ukxarusti profetanakamarux jupanakar juchañchatapat jiwayapxäna, uka profetanakasti jupanakan jumar wasitat makhatxañapatakiw jupanakar parläna; jach'a juchanakpun jumatak sayt'asisin lurapxäna.

Nehemías 9:30

Walja maranakaw jupanakar llamp'u chuymamp uñch'uktaxa, ajayum tuqisa, profetanakam tuqis iwxt'araktawa; ukampis janiw ist'asipkänti, ukat uraqinkir jaqinakan munañapar jupanakar apnaqapxañapatak katuyaraktaxa.

Salmos 1:3

Jupax, jawir thiyan ayruntat quqar uñtatawa: wakisitarjamaw achunak churi, laphinakapax janiw wañskiti. ¡Taqi luräwinakapasti walt'askakipuniwa!

Jeremías 2:30

Inamayaw wawanakamarux mutuytxa, jan wali luratanakapatxa janiw kuttaniñ munapkiti, jumanakasti qhuru leonanakar uñtataw profetanakamarux jiwarayapxtaxa.

Jeremías 20:2

Ukat jupax Jeremiasar nuwjapxañapatak khithäna, ukatsti katuntasin carcelaruw apantapxäna, ukasti Benjamín siski uka Jach'a Punku tuqin jikxatasïna, Tatitun utap jak'ana.

Jeremías 35:15

Jumanakan ukarusti, nayan profetanakaxarux mayamp mayampi khithanipxsma jumanakar sañapataki: ‘Uka jan wali sarnaqäwinakama, jan wali luräwinakam apanukupxam. Janirak yaqha diosanakan qhipapsa sarapxamti, ukanakarus yupaychapxamti, ukhamat kuna uraqtix nayax jumanakarusa, nayra awkinakamarus churkäyäta ukan jakasipkakïta’ sasa. Ukampis jumanakax nayan arunakaxarux janiw jaysapkistati, ist'apkarakistasa.

Jeremías 5:24

Janiw amuythapisipktati, janirakiw sapktasa: ‘Tatitu Diosasarux axsartañäni, jupaw qhipa, nayra jallsa wakisitapar apayanistu, pachaparuw achunak apthapiyarakistu’ sasa.

Lucas 13:34

“¡Jerusalén, Jerusalén, jumax profetanakaruw jiwaytaxa, Diosax khithanktam ukanakaruw qalampi k'upjtaxa! ¡Qawqha kutiw nayax wawanakamar anthapiñ munäyäta, kunjämtix wallpax chhiwchhinakap chhiqha manqhipar anthapiski ukhama, ukampis jumanakax janiw munapktati!

Lucas 20:11

Ukat yapunix yaqha uywat khithäna; juparusti kipkak tuqjapxäna, nuwjapxarakïna, ukatsti jan kunan khitxapxäna.

Lucas 20:9

Ukatsti Jesusax jaqinakar parlañ qalltäna, mä uñtasïwi tuqit amuyt'ayäna: “Mä jaqiw utjäna, jupasti yapuparux uva yapuchrantäna, ukatsti yaqha yapuchirinakaruw chikat lurañapatak churäna, ukat jaya maranakatakiw yaqha markar sarxäna.

Juan 15:16

Janiw jumanakax nayar ajllisipkistati, jan ukasti, nayaw jumanakar ajllisipxsma, ukatsti walja achunak churapxañamatakiw khithapxsma, uka achun jan pist'añapataki. Ukhamat Awkix kuntix nayan sutixar mayipkäta uk churapxätam.

Romanos 7:4

Munat jilatanaka, ukhamarakiw jumanakax Cristonkxasax jupamp chikaw kamachitakix jiwatäxapxta, khititix jiwatanak taypit jakatatawayki jupampi mayakïxañataki. Ukhamat jiwasanakax suma luräwinak Diosatak lursna.