Juan 12:27 - Qullan Arunaka DC

²⁷ “Jichhax wali llakt'atätwa; ¿kamsarakïsti? ¿‘Awkixay, aka t'aqhisiñat qhispiyita, säti’? Janiwa. Nayax uka urun t'aqhisiñatakiw jutta.

Aymar Bibliia 1986

²⁷ Jichhajj wali llact'atätwa; ¿camsäsa? ¿“Awqui, khespiyita cunatejj jichhajj pasquitani ucat” säti? Uqhamäñapataquipuniw nayajj jutta.

Qullan Arunaca

²⁷ “Jichhajj wali llact'atätwa; ¿camsäsa? ¿‘Awqui, khespiyita cunatejj jichhajj pasquitani ucat’ säti? Uqhamäñapataquipuniw nayajj jutta.

Juan 12:27 Jak'a apnaqawi uñst'ayäwi

Salmos 6:3

3 (4) ¡Axsarañat inakiw khathatiskta! Tatay, jumasti ¿kunapacharak jutätasti?

Salmos 88:3

3 (4) Ajayuxax llakinakampi aynacht'atawa, jakañaxasti jiwañar jalantañampiwa;

Isaías 38:15

¿Ukampis, kamsarakïsti? Jupaxay ukham lurchixa. Nayan t'aqhisitax laykusti, ikis janiw purkxituti.

Isaías 53:3

taqiniw juparux jisk'achjapxäna, apanukupxarakïna. Usuyasiñapampis wal t'aqhisïna, ukham t'aqhisiñatakis wakicht'atarakïnwa. Taqinis jupar ukham uñjañ janiw munapktanti; jisk'achapxtanwa, janirakiw juparux yäqapktanti.

Mateo 11:25

Ukapachaw Jesusax sarakïna: “Yupaychsmaw Awkixa, jumaw alaxpacha, akapacha apnaqtaxa, jumaw yatiñ kankañ wali yatiñan jaqinakat imanttaxa; ukatsti juk'a yatiñan jaqinakaruw uñacht'aytaxa.

Mateo 11:26

Tatay, jumaw ukham muntaxa.”

Mateo 26:42

Wasitat sararakikïnwa, ukatsti akham sasaw mayisïna: “Awkixay, t'aqhisiñaxatix wakisipunchixa, juman munañamax luraspan” sasa.

Mateo 26:45

Ukatsti Jesusax yatiqirinakapan ukaruw kuttanxäna, jupanakarusti sarakïnwa: —¿Jichhakam ikisipkaktati? Pachax purinxiwa, Jaqin Yuqapan juchararanakan amparapar katuyatäñapataki.

Lucas 22:44

Jach'a t'aqhisiñankasasti, juk'amp ch'amampiw Diosat mayisïna, jump'ipas wila ch'aqanakjamaw ch'aqaräna.

Lucas 22:53

Tatitun utapan yatichas sapüruw jumanakampïskäyäta, ukkhay katuntapxitasamänxa. Ukampis jichhaw jumanakan pachamax purinxi, kunapachatix ch'amakax munañanïki ukapachaxa —sasa.

Juan 11:41

Ukat qala atiqapxäna. Jesusasti alaxpach uñtasin arsüna: —Awkixay, nayar ist'atamat yuspagarsma.

Juan 12:23

Jesusasti jupanakarux sänwa: —Jaqin Yuqapan jach'añchatäñap urux purinxiwa.

Juan 13:21

Uk arsusinsti, Jesusax chuymapan wali llakt'ataw uñjasïna, ukatsti qhan arsurakïna akham sasa: —Qhanak sapxsma, jumanakat mayniw aljantitani —sasa.

Juan 18:37

Ukatsti Pilatox Jesusar jiskt'änwa: —¿Ukhamasti jumax Reyïtati? —sasa. Jesusasti sänwa: —Jumaw nayan Reyïtax arsusktaxa. Nayax ukatakiw yurta, kunatix chiqäki uk yatiyiriw akapachar jutta. Taqi khitinakatix chiqan sarnaqki ukanakax nayan arux ist'apxi —sasa.

1 Timoteo 1:15

Ukax chiqäskapuniwa, taqiniw iyawsapxañapa: Cristo Jesusax aka uraqirux juchararanakar qhispiyiriw juti, jupanakatsti nayaw nayrïrïtxa.

Hebreos 2:14

Kunjämatix mä utankir wawanakax mä janchita, mä wilat jutixa, ukhamarakiw Jesusax jaqjam janchinïna, jaqjam wilanïna, ukhamat jiwäwipampi atipjañataki, khititix jiwayañatak ch'amanïkän uka supayaru.

Hebreos 5:7

Kunapachatix Cristox aka uraqinkaskän ukkhaxa, jupax jach'at arsusa, jacht'asisaw Diosarux achikt'asïna, khititix jiwañat qhispiyañatakix ch'amanïkän juparu; jaysirïtapatsti Diosax juparux ist'änwa.