Jeremías 22:9 - Qullan Arunaka DC

⁹ Ukxarusti arusxatapxarakiniwa: ‘Jupanakax kuntix Tatitu Diosapax mä arust'äwi jupanakampi lurkäna uka apanukupxatayna, ukatsti yaqha diosanakaruw killisis yupaychapxarakitayna, ukat ukham uka markarux luri’ ” sasa.

Aymar Bibliia 1986

⁹ Ucatsti ucjjarojj arusjjatapjjaraquiniwa: ‘Jupanacajj cuntejj Tatitu Diosapajj mä arust'äwi jupanacampi lurcäna uca apanucupjjatayna, ucatsti yakha diosanacaruw quillisipjjatayna yupaychapjjaraquitayna, ucatwa uqham uca marcarojj luri’ ” sasa.

Qullan Arunaca

⁹ Ucatsti ucjjarojj arusjjatapjjaraquiniwa: ‘Jupanacajj cuntejj Tatitu Diosapajj mä arust'äwi jupanacampi lurcäna uca apanucupjjatayna, ucatsti yakha diosanacaruw quillisipjjatayna yupaychapjjaraquitayna, ucatwa uqham uca marcarojj luri’ sasa.

Jeremías 22:9 Jak'a apnaqawi uñst'ayäwi

1 Reyes 9:8

Aka utasti laqayanakar tukuyatäniwa, uka chiqanjam sarir jaqitakisti mulljaskayäniwa, jupasti larusisin sarakini: ‘¿Kunatarak Tatitusti Israel markaru, ukhamarak aka utarusa ukham lurpachasti?’ sasa.

2 Reyes 22:17

Jupanakax nayar apanukusin yaqha diosanakaruw inciensonak nakhayapxi, taqi uka luratanakapampi nayar q'apisiyasa; ukat nayan q'apisiñaxax aka chiqatak aqti, ukasti janiw t'akurkaniti.

2 Crónicas 34:25

Nayat armasipxituwa, yaqha diosanakaruw inciensonak nakt'ayapxi, uka luratanakapampi nayar q'apisiyasa; ukat q'apisiñaxax aka chiqatak nakti, ukasti janiw jiwt'kaniti.

Jeremías 11:10

Kuna juchanaktix nayra awkinakapax lurkäna uka pachpa jucha lurañanakaruw kuttapxi, uka awkinakapasti janiw nayarux ist'añ munapkitänti, ukatsti yaqha diosanakaruw arkxapxäna yupaychapxarakïna. Israel markasa, Judá markasa kuna arust'äwtix nayax nayra awkinakapampi lurkäyät ukanak t'unjapxi.

Jeremías 11:3

ukatsti sarakim, naya Tatitu, Israelan Diosapaw sista: Kawkïr jaqitix aka arust'äwir jan phuqkani ukax ñanqhachatäniwa.

Jeremías 16:11

Jumasti jupanakarux sarakim: ‘Tatitux siwa: Jumanakan nayra awkinakaman nayar apanukusin yaqha diosanakar killt'asis yupaychapxatapat taqi akanakax juti; nayarusti apanukupxitänwa, janirakiw kuntix nayax jupanakar siskäyäta ukanak phuqhapkänti.

Jeremías 50:7

Uñisirinakapasti jupanakar uñjasax p'inqachjapxänwa, ukatsti sapxarakïnwa: ‘Janiw nanakan juchaxäkiti, jupanakaw Tatitu nayraqatan jucha lurasipki, taqi kunsa churir Tatit tuqi, nayra awkinakapan suyt'äwipäkän uka Tatit nayraqatana’ sasa.

Jeremías 9:13

13 (12) Tatitusti ukxarux siwa: “Israelitanakan taqi yatichäwinakax apanukupxatapata, nayar jan ist'apxatapata, yatichäwinakaxarjam jan sarnaqapxatapat taqi akanakax ukham lurasiski.

Ezequiel 12:16

Ukampis nayaw mä qawqha jaqinakar jilt'ayä, nuwasïwin jiwañata, manq'atjam jiwañata, jan ukax kunayman usunakampi jiwañatsa; ukhamat kawki markanakarutix sarapkani ukanakan yatiyapxañapataki, jupanakan kunayman q'añu luräwinakapata. Ukapachaw yatipxani, nayan Tatitütaxa” sasa.

Ezequiel 14:23

Jupanakan sarnaqäwipa, luratanakap yatisasti chuymachasxapxätawa. Ukapachaw jumanakax amuyapxäta, kuna mutuyäwinaktix Jerusalén markxar apayankta ukanakan wakisirïtapa. Naya, Tatituw ukanak arsta.”

Ezequiel 39:23

Yaqha markanakasti yatipxarakiniwa, israelitanakan jucha luratanakapat yaqha markar apanukuyata uñjasipxatapa, janiw nayarux taqi chuymampi arkapkitänti; ukat nayax jupanakataki maysa uñtxta, uñisirinakapas nuwasïwin atipjasin jupanakar jiwarayapxañapataki.

Ezequiel 5:15

Nayax wali jach'a phiñasiñampi juma tuqi arsutanakax phuqkä, jan khuyapt'ayasis mutuykäma ukkhasti, taqiniw jan wali arunakampi arnaqapxätam, chuymamsa ust'ayapxarakïtam, juma jak'ankir markanakatakisti mä jach'a yatichäwïyätawa. Naya, Tatituw uk arsta.

Deuteronomio 29:24

24 (23) “Ukapachasti taqi jaqinakaw jiskt'asipxani: ‘¿Kunatsa Tatitux aka markar ukham lurpacha? ¿Kunatsa q'apisiñapax ukataqïpacha?’ sasa.