Jeremías 15:19 - Qullan Arunaka DC

¹⁹ Ukhamasti Tatitux sarakituwa: “Nayan ukarutix kuttanxäta ukkhaxa, nayax katuqxämawa, kuntix nayatak lurañamäki ukarak lurxarakïta. Jan wal arsuñamtix apanuküta, kunatix arsuñamäki ukak arsurakïta ukkhasti, jumax naya lantiw arsüta. Jupanakaw juman ukarux kuttanxañapa, janiw jumati jupanakan ukarux kuttañamäki.

Aymar Bibliia 1986

¹⁹ Uqhamasti Tatitojj saraquituwa: “Nayan ucarutejj cuttanjjäta, ucapachasti catokjjaraquïmawa, sirviraquitätawa. Alekaquiw parlañ yattajja, uctejj apanucüta, cunatejj parlañajj waquisqui ucaqui parlaraquïta ucapachasti, jumajj nayat parläta. Jupanacaw juman ucarojj cuttanjjapjjañapajja, janiw jumati jupanacan ucarojj cuttañamäqui.

Qullan Arunaca

¹⁹ Uqhamasti Tatitojj saraquituwa: “Nayan ucarutejj cuttanjjäta, ucapachasti catokjjaraquïmawa, sirviraquitätawa. Alekaquiw parlañ yattajja, uctejj apanucüta, cunatejj parlañajj waquisqui ucaqui parlaraquïta ucapachasti, jumajj nayat parläta. Jupanacaw juman ucarojj cuttanjjapjjañapajja, janiw jumati jupanacan ucarojj cuttañamäqui.

Jeremías 15:19 Jak'a apnaqawi uñst'ayäwi

1 Reyes 17:1

Elías profetax Galaad uraqinkir Tisbé markankirïnwa. Mä urusti jupax Ahab reyiruw säna: “¡Israelan Tatit Diosap laykuw juramentompi arsta, jupan luqtiripätwa, janiw aka maranakan jallusa, sullasa purxatkaniti, kunapachatix nayax siskä ukkhakama!” sasa.

Éxodo 4:12

Ukhamasti saramaya, parlkäta ukkhax nayaw jumampiskä, nayarakiw kunanaktix arsuñamäki uksa yatichäma —sasa.

Proverbios 22:29

Lurañap sum lurir jaqix, reyinakan luqtiripäniwa, janiw jan yäqat jaqinakan luqtiripäkaniti.

Jeremías 1:9

Ukatsti Tatitux amparap luqtanisin lakaxat llamkt'itu, sarakituwa:

Jeremías 15:1

Tatitux sarakituwa: “Moisesampi, Samuelumpis nayan nayraqataxar uñstanisipkpan, ukkhas janipuniw nayax aka jaqinakat khuyapayaskiristti. Nayan nayraqataxat mistupxpan, jayar sarapxpan.

Jeremías 20:9

Nayatix siristxa: “Janiw juk'ampi Tatitut amtkxäti, janirakiw jupan sutipatsa parlkxäti” sasa, ukapachasti arunakamax chuymaxan ninjamaw nakhantitu, ch'akhanakaxamppach nakhantitu. Janiw arunakam parlkxäti sistwa, ukampis janiw amukt'añjamäkiti.

Jeremías 35:19

Jonadab chachan wawanakapax utjapuniniwa, jupanakasti nayar luqtiriw jutapxani. Naya, Israelan Diosapa taqi ch'aman Tatituw uk arsta’ ” sasa.

Jeremías 4:1

Tatitusti siwa: “Israel marka, jumatix kuttanxañ munstaxa, jan juk'ampi jucha lurkxamti. Uka axtaskañ diosanakamsti apanukxam, nayatsti janirak jayarst'amti.

Jeremías 6:29

Plomo metalax ninampi umatatayas q'umachatawa, ukampis uka jan wali jaqinakax janiw kunampis q'umachatäkaspati. ¡Jupanakax chhaqhatampi sasiwa!

Lamentaciones 1:11

Taqi markachirinakapaw jichhax wal jachapxi, manq'añ thaqhasaw sarnaqasipki; qamir yänakapsa manq'ampiw turkasipxi, ukhamat manq'atjam jan jiwañataki. ¡Tatay, nayan aynacht'atax uñtanimaya! ¡Jan walt'ataxsa amuyarakimaya!

Ezequiel 2:7

Jumax nayan arunakax jupanakar qhanañcham, ist'apxpasa janis ist'apkpan, jupanakax qallasir jaqinakawa.

Ezequiel 22:26

Aka markankir sacerdotenakax, nayan yatichäwinakax maysaruw q'iwipxi, nayataki qullanäki ukanaksti takichasipxiwa; janiw jupanakax kunatix qullanäki, kunatix ñanqhäki uk amuyapkiti, janirakiw mayninakarus kunatix q'umäki, kunatix q'añüki uk amuyapxañapatakis yatichapkiti. Nayan samarañ sábado urunakaxarusa janiw yäqapkiti, janirakiw nayarux jach'añchapkituti.

Ezequiel 44:23

“Sacerdotenakasti markaxarux kunatix qullanäki kunatix jan qullanäki ukanakxata, ukhamaraki kunatix q'umäki, kunatix jan q'umäki ukanakxat yatichapxañapawa.

Levítico 10:10

ukhamat kunatix qullanäki, ñanqhäki, kunatix q'añüki, kunatix q'umäki ukanak sum amuyapxañamataki,

Levítico 14:57

ukhamat kunatix q'umäki, q'añükaraki ukan yatisiñapataki. Akkhakamaw lepra usunak tuqit yatichäwinakaxa.

Jonás 3:2

“Sartam, ukatsti Nínive jach'a markar saram, kuntix siskäma uka arunak yatiyiri” sasa.

Zacarías 3:7

“Taqi ch'aman Tatitux akham siwa: ‘Thakhinakaxanjam sarnaqam, jumar churat luräwinak taq phuqharakim. Ukhamtix lurätaxa, nayan utax apnaqäta. Utaxsti, uta anqanakamppach uñjarakïta, nayasti, nayar luqtir angelanak taypin mä luräwi churäma.

Lucas 1:19

Angelasti juparux sänwa: —Nayax Gabriel angelätwa, Diosan munañap lurirïtwa; jupaw nayarux khithanitu aka suma yatiyäwinak jumar yatiyiri.

Lucas 10:16

“¡Khititix jumanakar ist'ki ukax nayaruw ist'itu; khititix jumanakar jan katuqapktam ukanakasti nayaruw jan katuqkituti; nayar jan katuqirïki ukasti khithankitu ukaruw jan katuqkiti!”

Lucas 12:12

ukapachasti Qullan Ajayuw kunatix arsuñamäkani uk sasipkätam.”

Lucas 21:15

nayaw jumanakarux yatiñ kankañan phuqt'at arunak churapxäma, ukarusti janirakiw khiti uñisirinakamas kun kamsañatakis ch'amanïpkaniti.

Lucas 21:36

Jumanakax wakicht'atäpxam, Diosat mayisipxapunim, ukhamat taqi ukanak luraskani ukat jaltapxañamataki, ukatsti Jaqin Yuqap nayraqatan uñstapxañamataki.

Hechos 20:27

nayax jumanakar jan kuns imt'asaw Diosan taqpach amtäwinakap yatiyapxsma.

2 Corintios 5:16

Ukat nanakax jan khititsa akapachan amtäwinakaparjam lup'kxapxti; nayrapachax uka amtäwinakarjam Cristot lup'ipkchïyäta ukasa, jichhax janiw jupat ukham lup'kxapxti.

Gálatas 1:10

Janiw nayax jaqinakampi walikiw sayasiñ munkti, jan ukasti Diosan nayar walikiw sañap munta. Janiw jaqin munataparjam kusisiyañ munkti. Nayatix jaqinakampi sumat uñt'ayasiñ muniristxa, janiw Criston luqtiripäkxiristti.

Gálatas 2:5

Ukampis janiw kunansa jupanakampix atipayasipkti, nanakasti munapxäyätwa chiqpach qhispiyasiñ arunakax jumanak taypit jan chhaqtañapa.

Hebreos 5:14

Ukampis waña manq'ax jach'a jaqinakatakiwa, khitinakatix amuyt'asiñ yatipki, kunatix walïki, jan walïki uk uñt'añatakis yatitäpki ukanakatakiwa.

Judas 1:24

Mä sapa Tatitu, jiwasan Qhispiyirisax, jumanakar imañatak ch'amaniwa, ukhamat jan tinkupxañamataki, ukatsti jan juchani, kusisiñan phuqt'ata, jupan nayraqatapan k'ajkir uñstapxañamatakis ch'amanirakiwa. Juparuy churatäpan yupaychañasa, jach'a kankañasa, ch'amasa, jilïr kankañasa, Jesucristo Tatitus layku, nayra pachasa, jichhasa, wiñayan wiñayapataki. Ukhamäpan.