Éxodo 38:21 - Qullan Arunaka DC

²¹ Moisesan arsutaparjamasti, levitanakax sum jakthapipxäna, kuna metalanaktix Tatitump Jikisiñ Carpa lurañatak uchapkatayna ukanaka, uka lurañansti Aarón sacerdoten Itamar yuqapaw p'iqichäna.

Aymar Bibliia 1986

²¹ Moisesana aruparusti, uqhamarac sacerdote Aaronan Itamar sat yokapan lurayatasti, levitanacajj suma jacthapita apapjjäna cuna casta metalanactejj uca suma arust'äwiru mantatäqui uca carpa lurañataquejj apnakapcäna ucanacjja.

Qullan Arunaca

²¹ Moisesana aruparusti, uqhamarac sacerdote Aaronan Itamar sat yokapan lurayatasti, levitanacajj suma jacthapita apapjjäna cuna casta metalanactejj uca suma arust'äwiru mantatäqui uca carpa lurañataquejj apnakapcäna ucanacjja.

Éxodo 38:21 Jak'a apnaqawi uñst'ayäwi

1 Crónicas 6:3

3 (29) Amram chachan wawanakapa: Aarón, Moisés, María. Aarón chachan wawanakapa: Nadab, Abihú, Eleazar, Itamar.

2 Crónicas 24:6

Ukat Joás reyix Joiadá jach'a jilïr sacerdoter jawsayanïna, juparusti sänwa: —¿Kunatarak levitanakar Judá, Jerusalén muytayiri jan khitktasti, kunjämtix Tatitun Moisés luqtiripasa, Israel markasa Tatitun utapatak churañ amtapkän uka yanapanak markanakat apthapipxañapatakisti? —sasa.

Job 11:4

Jumax saraktawa: “Nayan yatichäwixax chiqapawa; Tatitun nayraqatapan q'umätwa” sasa.

Job 22:23

Jumatix alt'at chuyman tukxäta, taqi ch'amani Diosar makhatxarakïta, utamatsa uka ñanqhanak apanukxarakïta,

Job 26:1

¡Jumax wali sumsa jan ch'amanirux yanapt'irïtätaxä, wali sumsa ch'amap pist'ayasirirus qhispiyirïtätaxä!

Salmos 15:1

Tatay, ¿khitirak qullan utaman jakaspasti?, ¿khitirak qullan qulluman utjasispasti?

Éxodo 25:16

Uka arcarusti nayax churkäma uka kamachinak uchäta.

Éxodo 26:33

Ukat uka cortinxa t'iriñanakampiw warkt'äta, ukatsti uka qhipäxarux arust'äwi lurat arca uchäta. Ukhamat uka cortinax jumanakatak Qullan Chiqawjampi, Qullanansa Qullanap Chiqawjamp jaljani.

Éxodo 38:20

Tatitumpi Jikisiñ Carpan ch'akurunakapasa, carpa anqäx muyuntir ch'akurunakas broncet luratkamakïnwa.

Éxodo 38:22

Ukhamasti, Judá ayllunkir Urí chachan Besalel yuqapa, Hur chachan allchhipaw kunanaktix Tatitux Moisesan lurañapatak siskatayna ukanak luräna.

Éxodo 40:3

Uka manqhirusti arust'äwi lurat arca uchäta, ukatsti cortinampiw jist'aqarakïta.

Éxodo 6:23

Aaronasti, Aminadab chachan Eliseba phuchhapampiw jaqichasïna, Naasón chachan kullakapa. Aaronan wawanakapasti: Nadab, Abihú, Itamar, Eleazar, jupanakawa.

Números 1:50

Jupanakarux Tatitumpi Jikisiñ Carpan luqtapxañapatakiw uchäta, taqi kunanakatix uka qullan chiqawja manqhan utjki ukanak uñjapxañapataki. Jupanakaw arust'äwi qullan carpampi, uka manqhan utjir yänakamp apapxani, ukhamarakiw jupanakax qullan chiqawjar muyuntas utjnuqtapxani.

Números 1:53

Leví ayllunkirinakasti Tatitun arust'äwi qullan carpar muyuntasaw utjnuqtapxani, uk uñjapxarakini, Tatitux israelitanakatak jan q'apisiñapataki.”

Números 10:11

Tatitump Jikisiñ Carpa patxankkän uka qinayanakax, pä mara, payïr phaxsina, pä tunka uru saraqataruw unxtxäna.

Números 18:2

Ukampis Tatitump Jikisiñ Carpan lurañanakanxa, Leví ayllunkir mayni jilanakamampix jumarusa, wawanakamarus yanapt'añapawa.

Números 24:5

¡Jacob, chhujllanakamax wali sumanakawa! ¡Israel, utjnuqäwimax sumapuniwa!

Números 9:15

Kunürutix Arust'äwi Carpa sayt'ayapkän uküruxa, mä qinayaw imxatäna. Jayp'untxän ukapachasti, Arust'äwi Carpa patxan mä ninaw uñstäna, ukampis willjtarux chhaqtawayxänwa.

Mateo 17:4

Pedrosti Jesusarux sänwa: —Tatay, wali sumaw jiwasan akankatasaxa. Munsta ukax, kimsa chhujlla akawjar lurapxä: mayax jumataki, mayax Moisesataki, mayasti Eliasataki —sasa.

Hechos 7:44

“Nayra awkinakasanxa, wasaran arust'äwi carpax utjäna, ukasti kunjämtix Diosax Moisesar siskatayna ukhamarjam luratänwa, uñjkatayna ukhamarjam luratarakïnwa.

2 Corintios 5:1

Jiwasanakax akapachankir utar uñtatakïtanwa, apnaqañ utar uñtata, ukax janiw wiñayatakïkiti; ukampis yattanwa, uka utatix tukusinixa, Diosax alaxpachan wiñay uta wakicharapistu, ukasti janiw jaqinakan amparapampi luratäkiti.

Hebreos 8:2

ukatsti sacerdotjamax chiqpach qullan utan lurañampiw phuqhi, uka utasti Tatitun luratänwa, janiw jaqinakan luratäkänti.

Hebreos 9:11

Ukampis Cristox niy jutxiwa, jichhasti jupaw aski luräwinakat Jilïr sacerdoter tukxi. Jupasti kawkha qullan utantix sacerdotëki uka utax juk'amp sumawa, phuqhatarakiwa, janiw akapachankir jaqinakan luratäkiti.

2 Pedro 1:13

Nayan amuyataxatsti, wakisipuniw jakkasin jumanakar aka iwxa arunakampi amtt'ayañaxa.

Apocalipsis 11:19

Ukatsti Tatitun utapan punkunakapaw alaxpachan jist'artäna, uka utap manqhansti arust'äwipa arcaw uñstäna. Ukatsti lliju llijunakampi, qhixu qhixunakampiw utjäna, wali uxuñanaka, uraq khathatinaka, wali ch'aman chhijchhimpiw utjarakïna.

Apocalipsis 15:5

Uka qhipatsti, alaxpach tuqiruw uñtarakta, ukatsti qullan utjäwi jist'artir uñjta, arust'äwin carpapa.

Apocalipsis 21:3

Ukatsti jach'a aru ist'arakta qhapaq qunuñat art'asiniri: “¡Akaxay, Diosax jichhax jaqinak taypin jaki! Jupanakampiw jakani, jupanakasti markapäniwa, Dios kipkarakiw jupanakampïni, jupanakan Diosaparakïniwa.