Éxodo 16:15 - Qullan Arunaka DC

¹⁵ Israelitanakasti janiw kunätapsa yatipkänti, ukat uk uñjasax maynit maynikam jiskt'asipxäna “¿Kunarak akasti?” sasa, Moisesasti jupanakar sänwa: —Akax t'ant'awa, Tatituw manq'añatak uk churapxtam.

Aymar Bibliia 1986

¹⁵ Ucampis israelitanacajj jan cunätapsa yatisinjja maynit maynicamaw jisct'asipjjäna “¿Acajj cunasa?” sasa, ucatsti Moisesajj sänwa: —Acasti t'ant'awa, Tatituw uc churapjjtam mank'apjjañamataqui.

Qullan Arunaca

¹⁵ Ucampis israelitanacajj jan cunätapsa yatisinjja maynit maynicamaw jisct'asipjjäna “¿Acajj cunasa?” sasa, ucatsti Moisesajj sänwa: —Acasti t'ant'awa, Tatituw uc churapjjtam mank'apjjañamataqui.

Éxodo 16:15 Jak'a apnaqawi uñst'ayäwi

Nehemías 9:15

Manq'at awtjatäpkäna ukkhasti sist'asipxañapatakix alaxpachat t'ant'a churantaxa, umat pharjatäpkäna ukkhasti umt'apxañapatakix qarqat uma jalsuyaraktaxa. Ukatsti jupanakar churañatak arsut uraqiruw mantayaraktaxa.

Nehemías 9:20

Ukhamarus jumax suma chuymanïtam jupanakar uñacht'aytaxa, khuyapayasir ajayumampisti jakañ yaticharaktaxa; janipuniw alaxpach t'ant'a manq'añapataki pist'ayktati, umat pharjatäpkäna ukkhas uma churaraktaxa.

Salmos 105:40

Manq'añ mayitaxa, khullunak apayanïna, alaxpach t'ant'ampiw sisarayäna.

Salmos 78:24

¡maná sat t'ant'a jupanakxarux jalluyäna, alaxpach t'ant'a manq'añapatak churäna!

Éxodo 16:31

Apthapipkän uka t'ant'asti janq'ünwa, cilantro alin jathapar uñtata, misk'impi lurat t'ant'jam muxsarakïnwa. Israelitanakasti ukarux “maná” sasaw sutichapxäna.

Éxodo 16:33

Moisesasti Aaronarux sarakïnwa: —Mä phukhur pä kilo maná t'ant'a phuqhantam. Uksti Tatitun nayraqatapar ucham, wawanakan wawanakapatak imatäpan —sasa.

Éxodo 16:4

Ukat Tatitux Moisesar säna: —Nayax alaxpachat t'ant'a jalluyanï, jaqinakax sapüruw apthapisipxani, qawqhatix uka urutak wakiski ukhamarjama. Ukhamat nayax uñjä arunakaxar jaysirïpxatapsa, jan jaysirïpxatapsa.

Proverbios 9:5

“Jach'a manq'äwixar jutapxam, nayan wakicht'at vino umt'ir jutapxam.

Números 21:5

ukat jupanakax Tatitutak arusiñ qalltapxäna, Moisesarusti sapxänwa: —¿Kunatakirak Egiptot irpsunipxistasti? ¿Wasaran jiwarayañatakit irpsunipxistasti? Janiw umasa, manq'as utjapkituti. ¡Aka jan sist'ayasir manq'ampix amjatäxapxtwa! —sasa.

Lucas 12:30

Diosar jan uñt'ir jaqinakakiw taqi ukanakat llakisipxi; jumanakansti mä Awkiw utjapxtam, jupasti taqi ukanak jumanakan munapxatam yati.

Juan 6:49

Nayra awkinakamax wasaran maná t'ant'a manq'apxäna, ukampis jupanakax jiwarasipkakïnwa;

Juan 6:58

Alaxpachat saraqanir t'ant'at parlta. Aka t'ant'ax janiw nayra awkinakamax maná t'ant'a manq'apkän ukhamäkiti, jupanakasti manq'apkchïna ukas jiwarasipkakïnwa; ukampis khititix aka t'ant'a manq'kani ukax wiñayatakiw jakani —sasa.

1 Corintios 10:3

Uka kipkarakiw jupanakax pachpa ajay t'ant'a manq'apxäna,

Deuteronomio 8:16

Ukatsti wasaran maná sat manq'a manq'ayapxtam, janiw nayra awkinakamas uka manq'a uñt'apkataynati, ukhamat jumanakar yant'añataki, llamp'u chuymanïñ yatiqapxañamataki, ukasti jumanakan askimatakirakïnwa.

Deuteronomio 8:3

Diosax t'aqhisiyapkchïyätam, manq'atsa awtjayapkchïyätam ukasa, jupax maná sat manq'añ manq'ayapxtam, uka manq'añsti janiw jumanakasa, nayra awkinakamas uñt'apkataynati, ukhamat jumanakan yatipxañamataki: jaqix janiw t'ant'a sapampiki jakkiti, jan ukasti Tatitun lakapat mistki uka arunakampiw jakaraki.

Hebreos 9:4

ukawjansti qurit lurat incienso nakt'ayañ altarampi, qurimpi apakipat arust'äwi arcampiw utjäna. Uka arca manqhansti qurit lurat mä chatuw utjäna, uka chatunsti maná sat t'ant'aw uchatäna; Aaronan thujrupax ch'uxñatatkatayna, ukhamarak tunka kamachi qillqat qalanakas arca manqhankänwa.

Josué 5:12

Ukat uksarusti Diosax janiw mayampsa maná manq'xa apayankxänti, ukhamasti israelitanakax kunatix Canaán uraqin achkäna ukaki uka marax manq'asipxäna.

Apocalipsis 2:17

¡Khititix jinchunïki ukax, ist'pan kuntix Tatitun Ajayupax iglesianakar siski uka! Jan walt'añanakar atipjirinakarusti, maná sat imantat t'ant'at manq'ayä; ukatsti mä janq'u qala churarakï, uka qalansti mä machaq sutiw qillqt'ata, uka sutsti janiw khitis yatkiti, uka qala katuqirikiw yati.’ sasa.