Efesios 2:16 - Qullan Arunaka DC

¹⁶ Cristox cruzan jiwasin paypach markan ch'axwanakap t'unjawayi, Diosampis sumankayaraki, jupanakat mä sapa markar tukuyasa.

Aymar Bibliia 1986

¹⁶ Uqhamatwa Cristojj crusan jiwasina paypach marcan ch'ajjwanacap tucuyawayi, Diosampis sumancayaraqui, jupanacat mä sapa cuerporu tucuyasina.

Qullan Arunaca

¹⁶ Uqhamatwa Cristojj crusan jiwasina paypach marcan ch'ajjwanacap tucuyawayi, Diosampis sumancayaraqui, jupanacat mä sapa cuerporu tucuyasina.

Efesios 2:16 Jak'a apnaqawi uñst'ayäwi

Romanos 5:10

Kunapachatix Diosan uñisiripäkäyätan ukkhaw Wawapan jiwatap tuqi jupampi sumankthapxtan, ukatarak jakañap tuqi qhispiyatäñäni, jichhasti jupampi sumankthapitäxtanwa.

Romanos 6:6

Jiwasax yattanwa, nayra jakäwisan Cristomp chika ch'akkatatäxatapa, ukhamat jiwasan ñanqha luräwisan t'unjatäñapataki, juchampix jan juk'ampi t'aqhisiyatäñasataki.

Romanos 8:3

Diosax kuntix Moisesan kamachipax jan lurkän uk phuqhawayi, jaqin janchi kankañanïtap laykuw ukax jan luraskänti: Diosasti jupan mä sapa Wawap khithani, juchan jaqjam janchi kankañani, jucha layku jiwiri, ukhamat janchi kankañanïkasin juchar t'unjañataki.

Romanos 8:7

Janchin munañaparjam luririnakax Diosan uñisirinakapawa, jupanakax janiw Diosan kamachipar munapkiti, janirakiw arunakaparus jaysapkaspati.

1 Corintios 10:17

Waljanïpktan ukasa, taqiniw mä sapa t'ant'at manq'apxtan, ukatarak mä sapa janchikïpxtan.

Gálatas 2:20

Chiqpachansa, nayax Cristomp chikaw ch'akkatat uñjasta, janiw nayax jakxtti, jan ukasti, Cristow nayan jakxi. Jichhasti janchin jakaskasaxa, Diosan Yuqapar iyawsatax laykuw jakaskta, nayar munasin jakañap naya layku apt'asiwayi.

Efesios 2:15

Cristox kunatix kamachin arsutäkäna ukanak chhaqtayawayi, ukatsti jupa tuqiw uka pä tamatxa, mä sapa machaq marka utt'ayawayi. Ukhamat sumankañax utjawayi.

Efesios 3:6

Uka jan amuyt'kañ amtäwix akawa: Tatitun qhispiyasiñ arunakap tuqiw jan judiöpkis ukanakax judionakamp chik pachpa waxt'äwi katuqapxani, ukhamarak mä sapa markar tukutakïpxani, kuntix Diosax Jesucristo tuqi arsuwaykäna uksa, katuqapxarakini.

Efesios 4:4

Mä sapa janchikiw utji, mä sapa Ajayukiw utjaraki, kunjämtix Diosax mä sapa suyt'añar jawsapktam ukhama.

Colosenses 2:14

Kamachin qillqatax jiwasanakar juchañchirïnwa, ukampis Diosaw Criston cruzan jiwatapampix taqi ukanak phuqhantawayi.

Colosenses 3:15

Criston sumankañapay chuymanakam apnaqpan, Diosasti uka amtäwimpiw mä janchir tukupxañamatak jawsapxtam. Ukatsti yuspagarapxapunim.