Apocalipsis 22:18 - Qullan Arunaka DC

¹⁸ Akan qillqatäki uka profecía arunak ist'irinakarux, taqpachaniruw nayax sista: Khititix akan qillqatäki uka arunakar kunsa yapxatanixa, Diosax jupar kuna mutuyäwinakattix aka qillqatan parlki ukxa yapt'arakiniwa.

Aymar Bibliia 1986

¹⁸ Take qhitinacatejj aca libron kellkatäquis uca Diosan arupa ist'irinacarojj nayajj sistwa: Qhititejj aca libron kellkatäquis uca arunacar yapjjatanejja, Diosajj juparojj cuna mutuyäwittï parlqui ucjja yapt'araquiniwa.

Qullan Arunaca

¹⁸ Take qhitinacatejj aca libron kellkatäquis uca Diosan arupa ist'irinacarojj nayajj sistwa: Qhititejj aca libron kellkatäquis uca arunacar yapjjatanejja, Diosajj juparojj cuna mutuyäwittï parlqui ucjja yapt'araquiniwa.

Apocalipsis 22:18 Jak'a apnaqawi uñst'ayäwi

Proverbios 30:6

Jupan arunakapar jan kunsa yapxatamti, jan ukasti jumarux tuqiristamwa, k'arit uñt'ayarakiristam.

Levítico 26:18

“Taqi akanak katuqasas janipun nayar jaysapkitäta ukapachasti, nayax jumanakarux paqallqu kutimpiw juchanakamat t'aqhisiyapxäma.

Levítico 26:28

nayax jumanakar jan walt'ayañatakiw sartä, ukatsti jucha luratanakamatxa paqallqu ukkhamp mutuyapxäma.

Levítico 26:37

nuwasiñatsa jaltxapkasma ukhamaw jan khitin arknaqat jumanakkam liwirtapxäta; ¡jumanakatsti janipuniw khitis uñisirinakapar saykatirjamäkaniti!

Mateo 15:13

Jesusasti jupanakarux sänwa: —Alaxpachankir Awkixan jan ayrut alix saphitpach jik'sutäniwa.

Efesios 4:17

Ukhamasti ak jumanakar Tatitun sutipxar iwxt'apxsma: Janiy juk'ampi Diosar jan uñt'irinakjam jakxapxamti, jupanakax pantjat amuyunakaparjamakiw jakapxi,

Deuteronomio 12:32

“Ukhamasti, taqi aka kamachinak phuqhapxam, ukhamarjam sarnaqapxarakim, jan kunsa k'ichxatasa, janirak kuns k'ichiqasa.

Deuteronomio 4:2

Churapksma uka kamachi arunakarux janipun jilxatayapxamti, janirak apaqapxamsa; jan ukasti, Tatit Diosaman kamachi arunakap phuqhapxam.

1 Tesalonicenses 4:6

Janiy khitis uka tuqin jila masipar jan wal lurpati, janirak sallqantpasa, uk luririrusti Tatitux ch'amampiw mutuyi, kunjämtix niy iwxt'apksma ukhama.

Apocalipsis 1:3

Aka yatiyäwi arunak ullaririx kusisiñaniwa. Diosat katuqat arunak ist'irinakasa, akan qillqatäki uka arunakarjam sarnaqirinakas kusisiñanïpxarakiwa, uka arunakan phuqhasiñap urux niy jak'ankxiwa.

Apocalipsis 15:1

Ukatsti alaxpachan yaqha jach'a chimpurak uñjta, ukasti wali muspharkañänwa. Paqallqu angelanakaw paqallqu mutuyäwimpi uñstanïna, ukanakasti qhip qhipa mutuyäwinakawa, ukanakampiw Diosan q'apisiñapax tukusxäna.

Apocalipsis 15:6

Uka qullan utjäwitsti paqallqu angelanakaw mistunïna, paqallqu mutuyäwinakas apt'ata. Uka angelanakasti suma q'uma qhankir lino isinakampi isthapitänwa, quri wak'anakampi wak'antatarakïnwa.

Apocalipsis 19:20

Uka jach'a axsarkañ animalasti k'ari profetamp chika katuntatäxänwa, uka k'ari profetasti muspharkañanak lurirïtayna uka axsarkañ animal nayraqatana. Uka muspharkañ luräwinak tuqiw, uka k'ari profetax sallqjatayna khitinakarutix jach'a axsarkañ animalan chimpupampi chimpuyasipkatayna, ukatsti ukan uñtasit lursutapar yupaychapkatayna ukanakaru. Ukatsti k'ari profetasa, uka axsarkañ animalasa azufrempi aqaskir nina qutar jakkirpacha jaquntataw uñjasipxäna.

Apocalipsis 20:10

Sallqjir supayasti nina azufre qutar jaquntataw uñjasini, kawkirutix k'ari profetampi uka jach'a axsarkañ animalampix jaquntat uñjasipkarakïn ukaru. Ukan uruy aruma taqpachan t'aqhisipxani, wiñayan wiñayapataki.

Apocalipsis 20:15

khitinakan sutinakapatix wiñay jakañ qillqatan jan qillqatäkän ukanakax, ukar jaquntataw uñjasipxäna.

Apocalipsis 22:10

Sarakituwa: “Akan qillqatäki uka profecía arunakxa, jan imxäsimti, phuqhasiñap urusti jak'achasinxiwa.

Apocalipsis 22:16

“Naya, Jesusaw angelaxar khitta iglesianakar taqi akanak yatiyañapataki. Nayätwa David reyit saraqirixa; qhantati ururi warawarätwa.”

Apocalipsis 22:7

“¡Jank'akiw jutä! ¡Khititix aka qillqatankir profecía arunak chuymapar katuqkani ukax, kusisiñaniwa!”

Apocalipsis 22:9

Ukampis jupax situwa: “Jan uk luramti. Diosaruy yupaycham, taqpach jiwasanakax jupan luqtiripätanwa, nayasa, jumasa, profetanakasa, Diosan arunakapar jaysirinakasa” sasa.

Apocalipsis 3:14

“Laodicea iglesiankir angelar qillqasin apayam: ‘Khititix chiqapäki, kunsa chiqapapun arski, khititix Diosan luratanakapat nayrïrïki ukax akham siwa: