2 Timoteo 1:10 - Qullan Arunaka DC

¹⁰ Jichhasti, Qhispiyir Jesucristos tuqiw uka munasiñapax uñacht'ayasi, jupaw jiwan ch'amap t'unjawayi, suma yatiyäwinak tuqiw wiñay jakañ churawayi.

Aymar Bibliia 1986

¹⁰ Ucampis jichhajj uca munasiñapjja uñacht'ayiwa Khespiyiri Jesucristosan jutäwipampi, cawquïritejj jiwañan ch'amapjja t'unjawayi khespiyasiñ arunac toke, uqhamarac jan t'unjatäcani uca jacañjja khanaruw apsuraqui.

Qullan Arunaca

¹⁰ Ucampis jichhajj uca munasiñapjja uñacht'ayiwa Khespiyiri Jesucristosan jutäwipampi, cawquïritejj jiwañan ch'amapjja t'unjawayi khespiyasiñ arunac toke, uqhamarac jan t'unjatäcani uca jacañjja khanaruw apsuraqui.

2 Timoteo 1:10 Jak'a apnaqawi uñst'ayäwi

Isaías 43:3

Nayätwa juman Tatitumaxa, qhispiyirimasa, Israelan Qullan Diosapätwa. Nayaw jumarux alasinsma. Egipto, Etiopía, Sabá uka markanakata.

Isaías 45:15

Ukampisa jumax jan uñjkaya Diosätawa, Israel markan qhispiyir Diosapätawa.

Isaías 45:21

Parlapxam, arsusipxarakim, munapxsta ukapachax jumanakpura jiskt'asipxam: ¿Khitis nayratpacha taqi akanak arsünxa? ¿Khitis nayra urunakatpach yatiyänxa? ¿Janit naya Tatitu ukanak lurktxa? Janiw yaqha Diosax nayat sipan utjkiti. Nayat sipan yaqha atipjiri, qhispiyiri Diosax janiw utjkiti.

Oseas 13:14

¿Ukatti jichhasti jiwañat qhispiyapxämasti? ¡Ukampis janiw khuyapayasiñ uñacht'aykxämati! Jiwa, ¡Jach'a ch'amamampi aka markar t'unjir jutam!”

Lucas 11:36

Taqpach janchimatix qhananïchixa, janirak mä akch'a ch'amakas utjkchi ukaxa, taqi kunsa sum uñjäta, kamisatix mä micha qhanax qhant'ktam ukhama.”

Lucas 13:7

Ukat yapu uñjirirux säna: ‘Uñtam, kimsa maraw aka higo quqan achup apaqasir jutta, ukampis janiw achu jikxatkti. Ukhamax phat'anukum; ¿kunatakirak inamay uraq katxäsinisti?’ sasa.

Lucas 2:11

Jichhürux mä Qhispiyiriw Davidan markapan jumanakatak yuri, jupasti CRISTO Tatituwa.

Juan 1:9

Taqi jaqinakar qhant'ki uka chiqpach qhanax akapacharuw purisinkäna.

Juan 14:6

Jesusasti sarakïnwa: —Nayätwa thakhixa, chiqasa, jakañasa. Naya tuqikiw Awkin ukar puriñax utji.

Juan 20:31

Ukampis kunanakatix akan qillqatäki ukanakax Jesusan Cristötapa, Diosan Yuqapätap iyawsapxañamatak qillqatawa, jupar iyawsasinsti, wiñay jakañ katuqapxañamataki.

Juan 4:42

Ukat warmirux sapxäna: —Jichhax, janiw juman arsutamatakti iyawsapktxa, jan ukasti, nanak pachpaw jupat ist'apxtxa, jupan akapachan Qhispiyir Cristötap yatipxarakta —sasa.

Juan 5:40

jumanakax jakañanïñatakix janiw nayan ukar jutañ munapktati.

Hechos 13:23

Uka kipka Davidat saraqiriw Jesusaxa, juparuw Diosax Israel markar qhispiyir khithani, arskatayna ukhamarjama.

Hechos 5:31

Diosaw jach'ar apti, reyi qunuñapan kupïxaparuw qunt'ayasi, jach'a munañan Jilïr Qhispiyirirak tukuyi, Israel markan Diosar kutikipstañapataki, juchanakapat pampachäwi katuqañapatakiraki.

Romanos 16:26

ukampis jichhax profetanakan qillqatanakap tuqiw uñachayasi, wiñay jakir Diosan arunakaparjama. Diosan imantat aka amtäwipax taqi markanakaruw yatiyasi, ukhamat iyawsapxañapataki, jaysapxañapatakiraki.

Romanos 2:7

Diosax wiñay jakañ churani taqi khitinakatix Diosan markapa, chiqa kankañampi jan inakt'as thaqhirinakaruxa;

Romanos 3:31

Ukhamasti, ¿iyawsäwi laykut kamachir ina ch'usar tukuytansti? ¡Janiw kunäkipansa! Jan ukasti juk'amp ch'amani kamachirux tukuytan.

Romanos 6:6

Jiwasax yattanwa, nayra jakäwisan Cristomp chika ch'akkatatäxatapa, ukhamat jiwasan ñanqha luräwisan t'unjatäñapataki, juchampix jan juk'ampi t'aqhisiyatäñasataki.

1 Corintios 15:26

qhipïr uñisiristi jiwawa, ukas q'ala t'unjatarakïniwa.

1 Corintios 4:5

Ukhamasti, jumanakax jan kunatsa mäkix taripapxamti; Tatitun jutañap suyt'apxam, jupaw ch'amakankki uk qhanar apsuni, chuyman amtäwinakapsa qhanstayarakini. Ukatsti Diosaw sapaqat maynirux luräwipatjam jach'achaskani.

2 Corintios 5:4

Akapachankir utan jakkasax t'aqhistanwa, ayquraktanwa, janiw q'alaläñ munktanti, jan ukasti isthapitäñ muntanxa, ukhamat kunatix jiwirïki ukax, machaq jakañamp chhaqtayatäñapataki.

Gálatas 5:4

Jumanaka, kamachinak phuqhas Diosampi katuqayasiñ munapkta ukanakax, Cristot saraqtapxtaxa, Diosan khuyapayasiñap apanukupxtaxa.

Efesios 1:18

Jumanakan amuyunakam qhanjtayañapatakiw Diosarux mayirakta, kuna suyt'äwirutix jawskistu uk yatipxañamataki, kunja muspharkaña, jilarkir waxt'äwtix Diosax qullan markapankirinakar churki uk yatipxañamatakiraki,

Efesios 1:9

ukatsti jan amuyt'kañ amtäwipat uñt'ayistu. Jupax khuyapayasiñapan amtatayna, Cristo tuqi uka amtäwip lurañataki.

2 Tesalonicenses 2:8

Ukatsti uka ñanqha jaqiw uñstanini, juparusti Tatit Jesusax lakapampi phust'asakiw tukjani, ukatsti kunapachatix k'ajkir jutäwipampi jutkan ukkhax jisk'aruw tukuyani.

2 Timoteo 1:1

Munat Timoteo: Jumaruw aruntansma, taqi chuymaxampiw Dios Awkisaru, ukhamarak Tatit Jesucristosarux mayta munasiñapampi jumar phuqt'añapataki, taqi kunan yanapañapataki, samarañapsa churañapataki. Kunjämtix nayrax siskäyäsma, nayax Criston apostolupätwa sasa. Diosaw qhispiyasiñ arunakap yatiyañatak nayar khithitu, juparakiw Jesucristo tuqi wiñay jakañ katuqañaxatak arsuwayi.

2 Timoteo 1:8

Tatitusat yatiyañ jan p'inqasimti, Jesucristo layku katuntat uñjasitaxatsa janirak p'inqasimti. Ukatsipana, Diosan ch'amapampix kuna t'aqhisiñanakatix suma yatiyäwi layku jumatak jutkan ukatakix wakicht'asim.

2 Timoteo 4:1

Diosan nayraqatapana, Tatit Jesucriston nayraqatapana, khititix jiwatanakaru, jakirinakaru taripir Reyjam jutkani ukan nayraqatapan wal iwxt'sma,

2 Timoteo 4:8

Jichhax mä suma pilluw suyt'askitu, chiqapar taripir Tatituw khä urun churitani. Janiw naya saparukit churkitani, jan ukasti, taqi khitinakatix munasiñampi Tatitun jutañap suyt'asipki ukanakarux churarakiniwa.

Tito 2:11

Tatitusti khuyapayasiñapxa, taqi jaqitak qhispiyasiñap apanisaw uñacht'ayistu.

Tito 2:13

ukatsti kusiskañ suyt'äwimpi jakañas yaticharakistu, jach'a Qhispiyir Tatit Jesucriston kutt'aniñap suyasa.

Tito 3:4

Ukampis kunapachatix Qhispiyir Tatitux khuyapayasiñapa, munasiñapsa taqi jaqinakar uñacht'ayistuxa,

Hebreos 10:32

Ukampis jumanakax nayra urunakat amtasipxam, kunapachatix jumanakax Diosan qhanap katuqapkäyäta, llamp'u chuymampi nuwasiñan t'aqhisipkäyäta ukkha.

2 Pedro 1:1

Nayax Simón Pedro, Jesucriston luqtiripätwa, apostoluparakïtwa. Aka qillqatsti, khitinakatix nanakjam mä suma iyawsañ jikxatapktas ukanakaruw qillqanipxsma, Qhispiyiri Jesucristo Tatitusan chiqätap layku.

2 Pedro 1:11

Ukhamat Qhispiyir Tatit Jesucristosan markapar mantapxañamatakix punkunakax jist'aratäni.

2 Pedro 1:3

Tatituw jach'a ch'amapampi churistu taqi kuntix jakañatak munktan ukanakxa, jupar munañsa churarakistu, khititix jach'a ch'amapampi, muspharkañ luräwinakapampi jawskistu ukar uñt'ayasa.

2 Pedro 2:20

Khitinakatix Tatit Jesucristo Qhispiyirisar uñt'asin uka jan wali luräwinakat jaltxapxi, uka qhipatsti juchar kutt'asina jucha lurañanakampi atipjayasipkaraki ukanakax, nayra jakañanakapat sipansa juk'ampi jan walïxapxiwa.

2 Pedro 3:18

Ukampis Qhispiyiri Tatit Jesucristosar uñt'apxam, munasiñapan jiltapxarakim. ¡Jupasti jach'añchatäpan, jichhasa, wiñayataki! Ukhamäpan.

2 Pedro 3:2

Amtasipxam, kuna yatiyäwi arunaktix nayra pachanakan Diosan profetanakapax churkistu ukanakata. Jan armasipxamti, Tatitu Qhispiyir Jesucristosax churkistu uka kamachi arunakata, uka arunaksti apostolunakaw jumanakarux yatichapxtam.

1 Juan 1:2

Aka jakañ Arusti uñstawayiwa: nanakasti uk uñjapxta, ukarak arsupxta; ukatsti jumanakaruw aka wiñay jakañat yatiyapxsma, khititix Awkimpiskäna ukat jiwasanakar uñstarakistu.

1 Juan 4:14

Jiwas pachpaw uñjtan, Dios Awkix akapachar qhispiyirix Yuqapar khithanitap arsuraktan.

Apocalipsis 18:1

Taqi ukanak qhipatsti, yaqha angelaruw uñjarakta alaxpachat wali munañan kankañampi saraqasinkiri; uraqisti uka angelan k'ajatapampiw qhanäna.

Apocalipsis 2:7

¡Khititix jinchunïki ukax, ist'pan kuntix Tatitun Ajayupax iglesianakar siski uka! Jan walt'añanakar atipjirirusti, Diosan suma markapan utjki uka jakañ churir quqan achupat manq'ayä’ sasa.

Apocalipsis 20:14

Ukatsti, Jiwañasa manqhapachasa, nina qutar jaquntatäxänwa. Uka nina qutasti payïr jiwawa,

Apocalipsis 22:14

Jakañ churir quqan achupat manq'asiñatak isinakap t'axsusirinakax kusisiñanïpxiwa, ukhamarak markar punku chiqa mantañ munirinakasa.

Apocalipsis 22:17

Qullan Ajayumpi Corderon esposapampisti sapxiwa: “Jutam” sasa. Ist'irïki ukasti sarakpan “Jutam” sasa. Umat pharjayasiristi, jutpan; um muniristi, jakañ umat inak umt'arakpan.