2 Crónicas 5:2 - Qullan Arunaka DC

² Ukatsti Salomonax Jerusalén markan Israelankir jilïri jaqinakaru, ayllunakan jilïrinakaparu, israelita wila masi tamanakan jilïrinakaparuw tantacht'äna, Tatitun arust'äwi arcap Sión sata Davidan Markapat apxañataki.

Aymar Bibliia 1986

² Ucatsti Salomonajj Jerusalenanjja tantachänwa Israelanquir jilïri jakenaca, tribunacan take jilïrinacaparu, uqhamarac israelitanacan familianacapan jilïrinacaparu, Tatitun arust'äwi arcapa apjjañataqui Sión sata Davidan Marcapata.

Qullan Arunaca

² Ucatsti Salomonajj Jerusalenanjja tantachänwa Israelanquir jilïri jakenaca, tribunacan take jilïrinacaparu, uqhamarac israelitanacan familianacapan jilïrinacaparu, Tatitun arust'äwi arcapa apjjañataqui Sión sata Davidan Marcapata.

2 Crónicas 5:2 Jak'a apnaqawi uñst'ayäwi

2 Samuel 5:7

Ukampis, Davidax Sión suma utt'ayat marka katuntäna, jichhasti uka chiqax Davidan Markapat uñt'atawa.

2 Samuel 6:12

Kunapachatix Davidar yatiyapxäna, kunjämtix Tatitux Obed-edom jaqimpiru, taqi wila masinakapampir aski waxt'äwinakamp phuqt'katayna arcan utapankatap layku, ukapachasti Davidax jach'a kusisiñampiw Diosan arcap Obed-edom jaqin utapat aptawayxäna Davidan Markaparu.

1 Crónicas 15:1

David reyix Davidan Markapan utanak lurayäna, ukatsti Tatitun arcapatakix mä chiqawja wakicht'arakïna, mä carpa sayt'aykän ukkhana.

1 Crónicas 15:12

jupanakarusti sänwa: “Jumanakax levitanakan wila masinak jilïrinakjamax kunatix phuqhañäki ukhamar q'umachasipxam, wila masinakamas q'umachasipxarakpan, ukhamat Israelan Tatit Diosapan arcap kawkharutix nayax wakichkta ukkhar aptanxapxañamataki;

1 Crónicas 15:25

Ukhamasti Davidampi, Israelan chuyman awkinakampi, soldadonakan jilïrinakapampix kusisitaw Tatitun arust'äwi arcap Obed-edom chachan utapat aptir sarapxäna.

1 Crónicas 15:3

Ukspachaw Davidax taqi israelitanakar Jerusalén markan tantacht'äna, kawkharutix jupax wakicht'kän ukkhar Tatitun arcap apañataki.

1 Crónicas 16:1

Tatitun arcapasti, Davidax uka amtampi lurkatayna uka chhujllar uchatänwa. Ukspachaw Dios nayraqatan nakt'at luqtäwinaka, sumankañ wilañchanak luqtäna,

1 Crónicas 24:31

Ukhamarakiw jupanakax suertetkam lurañanak jalanuqasipxäna, jilïrin wila masinakapasa, sullka jilan wila masinapasa, uka kipkarak Aarón chachat saraqir wawanakapan wila masinakapasa, uksti David reyina, Sadoc, Ahimélec, sacerdotenakan wila masipa jilïrinakana, levitanakan nayraqatapan lurapxäna.

1 Crónicas 24:6

Ukatsti Semaías qillqirixa, Natanael chachan yuqapa, levitanakat maynïrïnwa, jupaw reyin nayraqatapan sutinak qillqantäna: jilïrinakan sutinakapa, Sadoc sacerdoten sutipa, Abiatar chachan Ahimélec yuqapan sutipa, sacerdotenakan wila masi jilïrinakapan sutinakapa, levitanakan sutinakapa. Maykip lurañanakasti suertetkam apsutänwa, Eleazar chachat saraqir wawanakapatakix pä kuti lurañ wakt'ayapxäna, Itamar chachat saraqir wawanakapatakisti mä kutiraki.

1 Crónicas 26:26

Selomit chachampi jilanakapampix qullan yänakap imañ utanak uñjañatak utt'ayatänwa, uksti Davidampi, wila masinakan jilïrinakapampi, soldado tamanakan jilïrinakapampi, ejerciton jach'a jilïrinakapampix Tatituruw luqtapxatayna.

1 Crónicas 28:1

Davidax Jerusalén markan Israelankir jilïrinakaruw tantacht'äna: Ayllunakan irpirinakaparu, reyin luqtirinakapäpki uka soldadonakan jilïrinakaparu, soldado tamanakan jilïrinakaparu, reyin uraqinakapa, uywanakapa, wawanakap uñjirinakaru, wali aytat jaqinakaru, ukhamarak wali aytat soldadonakaru.

2 Crónicas 1:4

Ukampis Davidax Diosan arcap Quiriat-jearim chiqat Jerusalén markaruw apatayna, kawkharutix mä chhujlla wakichkatayna ukkharu.

2 Crónicas 5:1

Ukatsti kunapachatix Tatitutak uta lurañax arsutarjam tukuyatäxän ukkhaxa, Salomonax David awkipan Tatitur luqtat qurita, qullqita lurat yänak aptayanïna, ukanaksti Diosan utapan imatäñapatakiw uchayxäna.

2 Crónicas 5:12

Q'uchuri levitanakasa, Asaf, Hemán, Jedutún jupanakax wawanakapamppacha, maynïr wila masinakapamppachax, lino isimpi isthapitaw altarat inti jalsu tuqin sayt'ata ukankapxäna. Jupanakanxa platillonaka, salterionaka, arpanakaw utjäna. Jupanakamp chikasti trompetanak phusiri pataka pä tunkani sacerdotenakaw utjäna.

Salmos 2:6

“Naya pachpaw reyixarux ajllista, Sión, qullan qullux patxaruw utt'ayta” sasa.

Salmos 87:2

Tatitux Jerusalén markarux wal munasi, Israelan taqpach markanakapat sipana.

Levítico 9:5

Israelitanakasti, kuntix Moisesax siskatayna ukhamarjamaw Tatitump Jikisiñ Utäkis uka nayräxar apapxäna, ukatsti taqi jaqinakaw Tatit nayraqatan sayt'at jikxatasipxäna.

Números 10:33

Ukhamaw jupanakax Tatitun qullupat sartawayxapxäna, ukatsti kimsüruw sarapxäna. Tatitun arust'äwi arcapax jupanakan nayrap saräna, kawkharutix samart'apkaspa ukawja thaqhasa.

Números 10:36

Arcax sayt'kän ukkhasti, Moisesax sänwa: “¡Tatay, Israel markar jan apanukumti, wali mirantat markamar jan apanukumti!” sasa.