2 Corintios 7:10 - Qullan Arunaka DC

¹⁰ Diosan munañaparjam llakisiñax qhispiyasiñ utjayi, janiw kunat llakisiñas utjkiti. Ukampis akapachan llakisiñapax jiwañ utjayi.

Aymar Bibliia 1986

¹⁰ Diosar cusisiyquir llaquisitanacasajj Tatituruw cutiquipstayistu, ucatsti khespiyaraquistuwa, janiw llaquisiñasäquiti. Ucampis jan Diosatacjama llaquisitasasti jiwañaruw aparaqui.

Qullan Arunaca

¹⁰ Diosar cusisiyquir llaquisitanacasajj Tatituruw cutiquipstayistu, ucatsti khespiyaraquistuwa, janiw llaquisiñasäquiti. Ucampis jan Diosatacjama llaquisitasasti jiwañaruw aparaqui.

2 Corintios 7:10 Jak'a apnaqawi uñst'ayäwi

Génesis 30:1

Raquelasti Jacobutak jan wawanïrjam amuyasisinsti, Lía kullakapampiw uñkatasïna, ukat chachaparux sarakïna: —Janitix wawaniptaykitäta ukkhaxa, jiwañaruw purï —sasa.

2 Samuel 12:13

Davidasti Natán nayraqatan juchanïtap uñt'asïna, sarakïnwa: —Nayax Tatit nayraqatan jucha lurta —sasa. Natanasti ukxaruw sarakïna: —Tatitux janiw juchamat mutuykätamti, janiw jiwkarakïtasa.

2 Samuel 13:4

Mä urusti, Jonadabax Amnón jaqiruw jiskt'äna: —Reyin yuqapa, ¿kunas kamachtam? ¿Kunatarak urut urutjam t'ukhantasktasti? ¿Janit nayar yatiykitasma? —sasa. Amnón jaqisti ukxaruw sarakïna: —Absalón jilaxan Tamar kullakaparuw walpun munta —sasa.

2 Samuel 17:23

Ahitófel jaqisti jupan amtataparjam jan lurapxatap uñjasax, asnop wakicht'asisin yurïwi markapan utjir utaparuw sarxäna; ukatsti wila masinakapan jan walt'añanakap taqi kun sumar askicht'xasinsti, jaychkatasïnwa. Ukhamaw jupax jiwxäna, ukatsti awkipan amay imäwipar imt'atäxänwa.

1 Reyes 21:4

Ahab reyisti Nabot chachan ukham satapat wali llakt'ata, mayjt'atarakiw reyi utapar sarxäna, juparusti akham satayna: “Janiw nayax kuntix awkinakaxat katuqkta ukxa churkirismati” sasa. Purisinsti pirqar uñkatataw ikintxäna, janiw manq'añsa munkänti.

Salmos 38:18

18 (19) ¡Taqi juchanakax arsusxä, ukanakaw walpun t'aqhisiyitu!

Proverbios 15:13

Kusisit chuyman jaqix kusisit ajanuniwa; llakit chuyman jaqisti llakita ajanunirakiwa.

Proverbios 15:15

Llakit sarnaqiritakix, taqi urunakas jan walikamakiwa; kusisit sarnaqiritakisti, taqi urunakas kusisiñakiwa.

Proverbios 17:22

Kusisit chuymax jaqin jakañap sumaptayi, llakisit chuymasti jan ch'aman tukuyi.

Proverbios 18:14

Usutarux ch'am katxatatapaw wayxäsi, ch'ama thayjtatarusti, ¿khitirak waytaspasti?

Eclesiastés 7:3

Larusiñat sipansa jachañaw juk'amp askixa, ajanurux janis wal lurkchini, ukampis chuymarux ask luri.

Jeremías 31:9

Tatitur yuspagarasa, jacht'asisarakiw kuttanxapxani. Nayasti jalir uma thiyanakaruw jupanakar irparakï, jan liwisipxañapatakisti, mä suma khuskhachat thakhinjam irparakï. Nayaw Israelan awkipätxa, jupasti jilïr yuqall wawaxarakiwa.

Ezequiel 7:16

Mulljat palomanakjamas qullunakar jaltapxpan, juchanak lurapxatapat jiwarasipkakipuniniwa.

Jonás 3:10

Ukatsti Tatitux Nínive markankir jaqinakarux jan wali sarnaqäwinakap apanukur uñjäna, ukat jupanakat khuyapt'ayasïna, janirakiw kuna mutuñatix jutañapäkän uksa apayankxänti.

Jonás 3:8

Ukatsipana, llakisiñat taqinis chhankha isinakampi uchasipxam, taqi ch'amampi Tatitur art'asipxam, sapa maynirak jan wali sarnaqäwipa, jan wali luräwinakap jaytanukpan;

Jonás 4:9

Tatitusti juparux jiskt'änwa: —¿Uka alin pharsxatapat phiñasitamax walikïskiti? —sasa. Jonás profetax sarakïnwa: —¡Jïsa, walikïskiwa, phiñasiñatsa niyaw jiwaskta! —sasa.

Mateo 26:75

Pedrosti ukkhakiw kunjämtix Jesusax siskatayna uk amtasïna: “Wallpax janïr art'kipana, kimsa kutiw nayarux jan uñt'ir tuküta” sasa. Uka chiqat mistusinsti, Pedrox walpun jachäna.

Lucas 15:10

Nayasti sapxsmawa: Diosan angelanakap taypin ukhamarakiw kusisiñax utjani, mä juchararan kutikipstanitapata.”

Lucas 18:13

Ukampis qullqi apthapirix jayarukiw qhiparäna, janirakiw alaxpachar uñtañsa munkänti, jan ukasti jupapachaw chuymap liq'isïna, akham sasa: ‘¡Diosaxay, naya juchararat khuyapayasita!’ sasa.

Hechos 11:18

Jerusalenankir jilatanakasti ukanak ist'asin amukt'apxiwa, ukatsti Diosaruw yupaychapxi, muspharataw sapxaraki: —Ukhamax Diosax jan judiöpkis uka jaqinakan jupar kutikipstapxañap munaraki, ukhamat wiñay jakañanïpxañapataki —sasa.

Hechos 3:19

Ukhamasti jan wali lurañanak apanukusin kutikipstapxam, Diosar makhatapxam juchanakam pampachañapataki,

2 Corintios 12:21

Axsararaktwa, inas jutirin wasitat tumpapkäma ukapachaxa, Diosax jumanakat mä p'inqa uñjasiychitani, ukat inas jumanakat waljani nayratpach juch lurasipkatamat jachañaxächini, q'añu jakañanaksa, wachuq juchan sarnaqañanaksa, jan wali lurañanaksa janirak apanukupktati uka layku.

2 Corintios 7:9

jichhasti kusistwa; janiw llakisitanakamatti, jan ukasti uka llakisiñaw Diosarux irpkatapxtam. Uka llakisiñax Diosan munañaparjamänwa, ukhamasti nanakax janiw kuna jan walsa lurapksmati,

Hebreos 12:17

Jumanakax yatipxtawa, kunapachatix Esaú chachax awkipat aski waxt'äwi katuqañ munän ukkhaxa, janiw churatäkänti; wal jachkchïn ukas janiw kun lurañas wakiskxänti.

1 Samuel 30:6

Davidasti wali llakt'ataw jikxatasïna, jaqinakasti qalampiw juparux k'upjañ munapxäna, wawanakapar ukham apapxatapatxa taqiniw wali mayjt'atäpxäna. Ukampis Davidax Tatitu Diosaparuw katuyasïna,