1 Samuel 27:4 - Qullan Arunaka DC

⁴ Saúl reyisti Davidan Gat tuqir jaltxatap yatisinxa, janiw arknaqkxänti.

Aymar Bibliia 1986

⁴ Saúl reyisti, Davidan Gat tokeru sarjjatap yatisinsti, janiwa arcnakcjjänti.

Qullan Arunaca

⁴ Saúl reyisti, Davidan Gat tokeru sarjjatap yatisinsti, janiwa arcnakcjjänti.

1 Samuel 27:4 Jak'a apnaqawi uñst'ayäwi

2 Samuel 15:18

Jilïr yanapirinakapasti David jak'an taqpachani sayt'asipxäna, ukchañkamasti reyi uta uñjiri taqpach cereteonakampi, peleteonakampi, Gat markatpach jupar arkanipkatayna uka suxta pataka geteo jaqinakampix, reyin nayraqatapan siqiki sarantapxäna.

1 Samuel 26:21

Ukat Saúl reyix säna: —¡David, wawaxa, nayaw juchanïtxa! ¡Mä pisi chuyman jaqjamaw sarnaqtxa, luräwixansa pantjasiraktwa! Ukampis kuttanxam, janiw jichhax kuna ñanqhsa lurkxämati, jichhüruw jumax jakañaxar jan kuna ñanqhsa lurañ munatam uñacht'ayista —sasa.

1 Samuel 27:3

Davidampi jaqinakapampix Aquís jaqimpiw Gat chiqan jakasipxäna, sapaqat maynis wila masipamp kuna. Davidasti panpacha warminakap irpasxäna: Jezreelankiri Ahinóam warmimpi, Carmel chiqankir Abigail sata Nabalan ijma warmipäkän ukampi.

1 Samuel 27:5

Davidasti Aquís reyirux sarakïnwa: —Juma munañan reyitix nayaru yanapt'añ munchistaxa, achikt'assmawa, aka uraqiman kawkïr markan jakasiñaxatakisay churita, ukampis janiw walïkaspati luqtirimax juma munañan reyimpi chika jach'a markan jakañapaxa —sasa.