1 Corintios 1:7 - Qullan Arunaka DC

⁷ Ukhamat Diosan luräwipax jan pist'apktamti, Jesucristo Tatitusax uñstankan uka uru suyäwimana.

Aymar Bibliia 1986

⁷ Uqhamatsti janiraquiw cuntejj Diosajj churqui uca bendicionanacatjja cunas pist'apctamti, ucchañcamasti jumanacajj Tatitojj jutcani uca urwa suyt'asipcaracta.

Qullan Arunaca

⁷ Uqhamatsti janiraquiw cuntejj Diosajj churqui uca bendicionanacatjja cunas pist'apctamti, ucchañcamasti jumanacajj Tatitojj jutcani uca urwa suyt'asipcaracta.

1 Corintios 1:7 Jak'a apnaqawi uñst'ayäwi

Génesis 49:18

“¡Tatay, qhispiyasiñam suyaskaktwa!

Mateo 25:1

“Diosan qhapaq markapax aka uñtasïwimpi sasiwa. Tunka tawaqux aceitempi nakhir lamparanakapas apt'ataw jaqichasir waynar katuqir mistupxäna.

Lucas 17:30

Jaqin Yuqapax uñstankan ukürux ukhamäniwa.

Romanos 8:19

Akapachan taqpach jakirinakaw suyt'aski, kunürutix Diosan wawanakapätasax qhanañchatäkani uka.

Romanos 8:23

Janiw akapach sapaki t'aqhiskiti, jan ukasti, jiwasaxa, Qullan Ajay nayraqat katuqirinakax t'aqhisiraktanwa. Jiwasanakax chuyma manqhisan t'aqhistan Diosan jiwasanakar wawanakapjam katuqatäñas uru suyt'asa, janchinakasax qhispiyat uñjaskani uka uru.

1 Corintios 4:5

Ukhamasti, jumanakax jan kunatsa mäkix taripapxamti; Tatitun jutañap suyt'apxam, jupaw ch'amakankki uk qhanar apsuni, chuyman amtäwinakapsa qhanstayarakini. Ukatsti Diosaw sapaqat maynirux luräwipatjam jach'achaskani.

2 Corintios 12:13

Jumanakarux janiw yaqha iglesianakat juk'äpkasmas ukham lurapksmati, jan ukasti, jakañaxatak jumanakat jan kun mayitaxakiw utji. Ukham jan kun mayitaxat khuyapt'ayasipxita.

Gálatas 5:5

Ukampis jiwasanakanxa, Ajayu tuqi, iyawsañ tuqitarakiw, Diosan nayraqatapan katuqatäñ suyt'äwisax utjistu.

Filipenses 3:20

Ukampis jiwasanakax alaxpachankir jaqinakäpxtanwa, ukatsti Qhispiyir Cristo Tatitun alaxpachat jutañap suyasipktan.

Colosenses 3:4

Pachpa Cristow jumanakan jakañamaxa. Kunapachatix jupax uñstankan ukkhasti, jumanakax jupamp chikaw qhapaq kankañapan phuqt'at uñstapxarakïta.

1 Tesalonicenses 1:10

Diosan Jesús Yuqapar alaxpachat kutiniñap suyapkta ukanakata, juparusti Diosaw jiwatanak taypit jaktayäna. Jesusasti, jutkani uka axsarkañ mutuñat qhispiyistu.

2 Tesalonicenses 1:7

ukat jumanak t'aqhisirinakar samarañ churañapataki, kunjämtix nanakar churapkitu ukhama. Ukasti kunürutix Tatit Jesusax ch'aman angelanakapampi uñstankan ukkhaw phuqhasini, alaxpachat nina lawranak taypinjam jutkan ukapacha.

2 Timoteo 4:8

Jichhax mä suma pilluw suyt'askitu, chiqapar taripir Tatituw khä urun churitani. Janiw naya saparukit churkitani, jan ukasti, taqi khitinakatix munasiñampi Tatitun jutañap suyt'asipki ukanakarux churarakiniwa.

Tito 2:13

ukatsti kusiskañ suyt'äwimpi jakañas yaticharakistu, jach'a Qhispiyir Tatit Jesucriston kutt'aniñap suyasa.

Hebreos 9:28

Ukhamarakiw Cristox mä kutik taqinin juchap pampachañatak t'aqhisis luqtasïna. Uka qhipatsti wasitat uñstanini, janiw juchanak pampachiriti, jan ukasti, jupar suyt'irinakar qhispiyiriw uñstanini.

1 Pedro 1:13

Ukatpï jilatanaka, kuntix lurapkäta ukanakat wal amuyt'asipxam, mä suma jakañan sarnaqapxarakim. Taqi chuyma suyt'apxam, kuntix Diosax khuyapayasiñapan jumanakar churapkätam Jesucristox jutkani ukkhaxa.

1 Pedro 4:13

Jan ukasti Jesucristjam t'aqhisipxatanakamat kusisipxam, ukhamat kunapachatix jupax qhapaq kankañapamp jutkan ukkhax kusisiñan phuqt'atäpxañamataki.

1 Pedro 5:4

Ukhamat kunapachatix jach'a Awatirix uñstankan ukkhaxa, jumanakax mä suma churäwi katuqapxäta, ukasti wiñayatakïniwa.

2 Pedro 3:12

Tatitun jutañap urun jank'akïñap munas suyt'apxam. Uka urusti alaxpachanakax ninampi nakhantatäniwa, taqi kunas ninampi umatatayatarakïniwa;

1 Juan 3:2

Munat jilatanaka, jichhax Diosan wawanakapäxtanwa. Ukampis tukuy urunakan kunäkañänitix ukax janïraw qhanstkiti, kunapachatix Jesucristox uñstankan ukapachax jupjam tukkañän uk yattanwa, kunjämäkitix jupax ukhampach uñkatatas layku.

Judas 1:21

Tatitun munasiñapan jakapxam, ukatsti kunürutix Tatit Jesucristosax khuyapayasiñapan wiñay jakañ churkistani uka uru suyt'apxam.