Jeremías 44:22 - Qullan Arunaca

²² Ucatpï Tatitojj jan juc'ampi jumanacan jan wali luratanacamjja uñjañ muncjjäntejja, uca luräwinacamasti juparojj ñankhachänwa. Ucataracwa jumanacan marcanacamajj k'ala t'unjatajja, janiraquiw ucanacanjja maynis jaccjjeti, takenin uñjcata maldecitaw tucuraqui, ajjsarcañaraquiwa.

Aymar Bibliia 1986

²² Ucatpï Tatitojj jan juc'ampi jumanacan jan wali luratanacamjja uñjañ muncjjäntejja, uca luräwinacamasti juparojj ñankhachänwa. Ucataracwa jumanacan marcanacamajj k'ala t'unjatajja, janiraquiw ucanacanjja maynis jaccjjeti, takenin uñjcata maldecitaw tucuraqui, ajjsarcañaraquiwa.

Qullan Arunaka DC

²² Ukatpï Tatitux jan juk'ampi jumanakan jan wali luratanakam uñjañ munkxäntixa, uka luräwinakamasti juparux ñanqhacharakïnwa. Ukat jumanakan markanakamax q'ala t'unjata uñjasi, jan utjaskaya uraqir tukuraki; taqinin uñjkata ñanqhachata axsarkañaw tukxi.

Jeremías 44:22 Jak'a apnaqawi uñst'ayäwi

Génesis 19:13

aca marcsti t'unjapjjäwa. Sintipunëjjewa Tatitu contra jucha luratanacapajja, ucatwa aca marcar t'unjañataqui qhitanipjjetu —sasa.

Génesis 6:3

Uqham uñjasinsti Diosajj sänwa: “Janiw jakerojj wiñayataqui jacaycjjäti, jupasti janchiquiwa. Uqhamasti pataca pä tuncani maranacaquiw jacani” sasa.

2 Reyes 17:15

Uqhamarac jupanacajj jisc'achapjjaraquïnwa leyinacaparu, uqhamarac nayra awquinacapampi suma parlt'äwiru mantapcäna ucanacsa, camachi arunaca jupanacar churatäcäna ucanacsa. Ucjjarusti inamaya yakha diosanacan khepapwa arcapjjäna. Ucatsti jupanacpachawa inamayaru puripjjäna, jupanacar muytqui uca maya marcanacar uñtata, Tatitojj ucanacatracwa ewjjawayäna: “Janiw jupanacjamajj lurätati” sasa.

Isaías 1:24

Ucatpï jichhajj take ch'amani Tatitojj, Israelan take ch'amani Tatitupajj sejja: “¡Ucqhacamaqui! Nayaw uñisirinacajjarojj juchañchä, jupanacarusti uqhamat uqham luraraquï.

Isaías 43:24

Janiraquiw suma k'apquir cañsa alctati. Nayatac ofrenda apaniñamataquejja, janiraquiw sacrificiot loktat uywanacan liq'inacapampis cusisiyquistati. Jan ucasti jucha lurañanacamampejj karjayistawa, ñankha luratanacamampisti p'ek usuyaraquista.

Isaías 7:13

Isaiasajj saraquïnwa: —Ist'apjjam, jumanaca David reyin utapanquirinaca. ¿Jumanacataquejj janit cunäquisa jakenacaru majañajja, Diosajjarusti majañ munapjjaracta ucajja?

Jeremías 15:6

Jumajj nayarojj apanucuwayistawa, maysa uñtaractajja. Naya Tatituw arsta. Ucatpï nayajj, llamp'uchasiñan karitäjjatajj laycuw amparajj ayttjja jumar mutuyañataqui, ucat t'unjaracsma.

Jeremías 18:16

Uqhamatwa marcapjja mä wasararu tucuyjjapjje, muspharcaña, sustjascaña tucuyapjjaraqui. Qhitinacatejj uca cheka pasapcani ucanacasti, takeniw mayjt'asiñata p'eke qhiwipjjani.

Jeremías 23:2

Israelan Dios Tatitupasti siwa; cawquïri awatirinacatejj marcapa apnakapqui ucanacarojja: “Jumanacajj ovejanacajj-jja ananucupjjtawa, jaltayapjjtawa, janiraquiw sum awatipctati. Jichhajj waliquiwa, nayajj take jan wali luräwinacamatjja walpunracwa mutuyapjjäma. Naya Tatituw ucjja arsta.

Jeremías 24:9

Jupanacarusti yakha marcanacataquisa ajjtascaña tucuyä, jisc'achjata, apanucuta, maldecita uqhamaw sarnakapjjani cawqui marcanacarutejj nayajj ananuccä uca marcanacanjja.

Jeremías 25:11

Take aca marcasti t'unjatäniwa, lakayanacaruquiw tucjjani. Pakallko tunca mararaquiw aca marcanacajj Babilonianquir mä reyin apnakata uñjasipjjani.

Jeremías 25:18

Jerusalén marcaruw churta umañapataqui uqhamaraqui Judá orakenquiri take marcanacarusa, reyinacapampi take jilïrinacapampi umapjjañapataqui, uqhamat jupanacajj t'unjatäñapataqui, pampa tucjata apanucuñataqui, ajjsarcaña qhathatcaña tucjatäñapataqui, uqhamata mayninacajj yatekasipjjañapataqui cunjäma maldicionarutejj jalt'qui uca toketa, jichhürcamasa uqhamaquïsipcañapataqui.

Jeremías 25:38

Mä leonajj putupat mistunqui uqhamaw mistuniraqui, ucatsti jupanacan marcapajj pampa t'unjataw uñjasiraqui, Tatitun colerasiñapajj mä ninjam naqhatap laycu, uqhamaraqui mä jach'a nuwasïwi apayanitapata.

Jeremías 26:6

uqhamasti nayajj aca templorojj cunjämtejj Silo chekanquir templorojj lurctjja uqhamracwa jichhajj luräjja. Aca marcarusti mä uñtascaña maldeciraquï, take acapachanquiri marcanacataquejja.’ ”

Jeremías 29:18

Jumanacarusti guerrampi, mach'ampi, cunayman usunacampiraquiw arcnakapjjäma. Take aca orakenquiri marcanacampisti ajjtasiyapjjaraquïmawa, jumanacarusti takenin uñjcañwa maldecipjjaraquïma, mä p'enkwa tucjapjjaraquïma, cawquïri marcanacarutï apanucuta uñjasipcäta ucansti jumanacajj ajjsarcaña, sustjascañäpjjaraquïtawa.

Jeremías 29:19

Jumanacajj janiw nayar sirviri profetanacajj cuna arunactejj ewjjapctam uca arunacarojj ist'apctati uca laycu, nayasti mayampi mayampwa jumanacarojj uca profetanacjja qhitanipjjaracsma, ucampis jumanacajj janiw jupanacarojj ist'apctati. Naya Tatituw ucjja arsta.

Jeremías 30:14

Take munirinacamasti apanucuwayjjapjjtamwa, janiw jumat amtascjjapjjaraquiti. Nayaw jumarojj uqham chhojjriñchsmajja, uñisirimäquiristsa uqhama jan qhuyapt'ayasisaw mutuyämajja, walja jach'a juchanac luratam laycuw uqham lursmajja.

Jeremías 34:22

Uca uñisirinacarusti wasitatwa aca marcaru cutt'ayaniraquï, ucatsti tucjayaraquïwa, catuntasinsti ninampiw naqhantayaraquï. Judá orakenquiri yakha marcanacarusti ch'usa wasaran jan jakeni tucuyaraquëjja. Naya Tatituw ucjja arsta.”

Jeremías 4:4

Judá uqhamaraqui Jerusalén marcan utjir jakenaca, jumanacajj circuncidasipjjam, ucatsti nayarojj Tatitut uñt'asipjjaraquita, chuymanacamarusti cuna arust'äwitejj utjqui uca unañchäwinac uscusipjjam; uqhamata ñankha luratanacam laycojj jan colerasiñajjajj ninjam aktascañapataqui, ucsti janiraquiw qhitis jiwaraycaraquispati.

Jeremías 42:18

“Israelana Diosapa take ch'amani Tatitusti siwa: ‘Cunjämatejj colerasiñajjampi khoruchasiñajjampejja ninjam jumanacataqui aktänjja, take qhitinacatejj Jerusalén marcan jacapcäna take ucanac toke, uqhamaraquiw jumanac tokejj colerasiñajjajj aktani, jumanacatejj Egiptor sarapjjäta ucapachajja. Jumanacajj jakensa uñtcaña maldecitäpjjätawa, ajjsarcaña tucjataw uñjasipjjaraquïta, janiraquiw mayampsa aca orakjja uñjapcjjätati’ sasa.

Jeremías 44:12

Qhitinacatejj Judá orakeru kheparapqui, ucatsti Egipto tokeru jacasiri sarjjapjjaraqui ucanacarojj pachpanwa k'al tucusiyäjja. Takeniwa, jisc'at kalltasina jach'acama, guerran jiwarapjjani, mank'atjamaw jiwarapjjaraquini, ucatsti mayninacan uñtcañäniw, maldecita jisc'achjataraqui uñjasipjjani, ajjsarcañäpjjaraquiniwa.

Jeremías 44:2

“Israelan take ch'amani Diosapasti siwa: ‘Jumanacajj uñjapjjtawa cuna casta t'akhesiñanactejj Jerusalén marcjjaru uqhamaraqui Judá orakenquiri yakha marcanacjjaru apayancta take ucanacjja. Jichhajj uca marcanacajj k'ala aynacht'atawa, janiraquiw qhitis uca marcanacanjja jaccjjeti,

Jeremías 44:6

Ucatwa colerasiñajjampi khoruchasiñajjampi aktänjja, ucatsti ninjamaraquiw Judá orakenquir marcanacan naqharaquïnjja, uqhamaraqui Jerusalén callenacansa. Take ucanacasti jichhürcama tucjataraquiwa, wasararu tucuyataraquiw uñjasipjje.

Jeremías 48:9

Moab marcarojj suma pallalla kalanac uscupjjam, uca marcarusti t'unjapjjaraquiniwa, marcanacapasti k'ala t'unjataw uñjasipjjani, jan mä jakeniw uñjasipjjaraquini.”

Jeremías 5:9

¿Uca luratanacapatsti janit mutuycästi? ¿Uqham sarnaker jakenacarojj janit juchap uñt'asiycäjja?

Ezequiel 39:23

Yakha marcanacasti yatipjjaraquiniwa, israelitanacajj yakha marcaru apanucuyatäpjjatapa jupanacan jucha lurapjjatanacap laycu, janiw nayarojj take chuymampi arcapquitänti; nayasti ucatwa jupanacataquejj maysa uñtjjta, uqhamaraqui uñisirinacapampiw atipjayaracta, guerranacana jiwarayapjjañanacapataqui.

Ezequiel 5:13

Ucapachaw nayajj jupanacjjarojj jach'a colerasiñajj warjjatanï; colerasiñajjsti jupanacjjaruw samarayaraquï, ucat nayajj samarjjaraquï. Cunapachatejj nayajj uqham colerajja jupanacjjaru samarayä ucqhasti yatipjjaraquiniwa, naya Tatitun jach'a colerasiñajjampi arsutajja.

Daniel (hebreo) 9:11

Take Israel jakenacaw yatichäwinacamjja jan ist'apcti, juman arsutanacamarusa janiw jaysapcaractti, ucatpï nanacjjarojj purinejja take ñankhachäwi arunacajja, uqhamaraqui cuna juramentotejj Moisesan leyipan kellkatäqui ucarjama, nanacasti juma tokew jucha lurapjjta.

Daniel (hebreo) 9:12

Jumasti, nanacjjaru aca jach'a jan walt'äwi apayanisajja, cuna ajjsarañanactejj nanacaru churapquista ucjja phoktawa, uqhamaraqui qhitinacatejj marca apnakapqui ucanacampisa; aca orakensti janipuniw utjcänti mä mutuyäwejja cawquïri mutuyäwtejj jumajj nanacjjaru apayanipquista uqhamajja.

Amós 2:13

Waliquiwa, nayasti jichhajj orakwa warariyäjja cunapachatejj cayunacam oraker tacnokapcät ucqhajja, cunjämatï mä carretajj trigo cargampejj wararejj uqhama.

Malaquías 2:17

Diosasti karitäjjew jumanacan arunacama isch'uccäwejja; jumanacasti jisqhisisipcactawa: “¿Cunaraqui jiwasasti lurtan jiwasaru isch'uccäwi karjasiñapataquisti?” sasa. Jumanacasti sapjjaractawa: “Jan wali lurir jakenacajj Diosataquejj waliquïsquiwa, jupanacarusti Diosajj suma chuymampiw uñji” sasa. Jan ucajj cunapachatejj sapcta: “¿Cawquincaraqui chekaparu uñjiri Diosasti?” sasa ucapacha.

Romanos 9:22

¿Diosataquisti cunaraqui, jupatejj mutuñsa mä yatichäwi toke churañ munchi ucasti? Chekpachansa jupajj wali llamp'u chuymampiwa jakenacarojj uñji, jakenacajj jach'a mutuña catokañapa waquiscchïna t'unjatäñataqui ucasa, uqham toke Diosajj ch'amanïtapa uñacht'ayasiña munasa.