Jeremías 30:17 - Qullan Arunaca

¹⁷ C'umar sarnakasiñ cuttayjjaraquïma, chhojjrinacamjja nayaw kolljjäma, uñisirinacamajj kawkhas parlascpan. ‘Sionajj apanucutawa, janiw qhitis jupatjja llaquiscjjeti’ sasa. Naya Tatituw ucjja arsta.”

Aymar Bibliia 1986

¹⁷ C'umar sarnakasiñ cuttayjjaraquïma, chhojjrinacamjja nayaw kolljjäma, uñisirinacamajj kawkhas parlascpan. ‘Sionajj apanucutawa, janiw qhitis jupatjja llaquiscjjeti’ sasa. Naya Tatituw ucjja arsta.”

Qullan Arunaka DC

¹⁷ K'umar sarnaqasiñ kuttayxäma, chhuxrinakam nayaw qullt'xäma, uñisirinakamax qawqhas parlaskpan: ‘Apanukut marka’ sasa. Naya, Tatituw uk arsta.”

Jeremías 30:17 Jak'a apnaqawi uñst'ayäwi

Job 5:18

Jupatejj chhojjriñchi ucajja, kolljjataraquiniwa, jupatejj amparapampi nuwantchi ucajja, samarañjja churaraquiniwa.

Salmos 103:3

Tatituw takpach juchanacajjat pampachitu, jupaw take usunacajjat c'umarachitu;

Salmos 107:20

Arup qhitanïna, jupanacarusti c'umaraptayänwa, ¡mankhapachat khespiyäna!

Salmos 12:5

Tatitojj jupanacarojj siwa: “Jan cunan jakenacampi, jan yäkat jakenacampejj mutuyataw uñjasipjje, t'akhesiyataw uñjasipjjaraqui, ucat jupanacar yanapt'añatac sartasï, yanapt'ayasiñ munataparjamaw yanapt'ä” sasa.

Salmos 142:4

Cupi tokeruw uñtasta, janiw qhitis yanapt'ir jutquituti. Janiw qhitis arjjatir utjquituti. Janiw qhitis nayat llaquirejj utjquiti.

Salmos 23:3

jupaw machak ch'am churitu, cheka thaquinjam irpitu, sutipar jach'añchañ laycu.

Éxodo 15:26

Saraquïnwa: “Jumanacatejj naya Tatitu Diosaman arunacajja suma ist'apjjäta, ucat munañajjarjam lurapjjaraquïta, uqhamarac camachinacajjarusa, leyinacajjarusa phokhapjjaraquïta ucqhajj janiw cawquïr usunactejj egipcionacar apaycta ucanacampejj t'akhesiyapcämati. Nayätwa jumanacar c'umarachir Tatitumajja” sasa.

Isaías 11:12

Marcanacataquisti mä unañchäwi ucharaquini, jaya marcar apayat israelitanacarusti tantachthapjjaraquiniwa; amstata, aynachata, inti jalsu toketa, uqhamaraqui inti jalanta toketsa mayjaruw tantacht'jjaraquini, qhitinacatejj Judá marcatjja jayancapcän take ucanacarojja.

Isaías 30:26

Tatituw kollani ch'okantaraquini marcapan chhojjrinacapjja. Ucapachaw phajjsejj intjama khanani, intisti khanapat sipanjja pakallko uqhampwa khant'ani, pakallko intin khanapäcaspas uqhama.

Isaías 33:24

Janiw qhitis siscaspati: “Usutätwa” sasajja. Diosasti Sionan jaquir jakenacan juchanacapjja perdonaraquiniwa.

Isaías 54:6

Mä tawakpach apanucut warmir uñtatäyätawa, apanucuta, t'akhesiyataraqui; ucampis Diosamaw wasitat jawstam, saractamwa:

Isaías 56:8

“Nayaw cuttayanjjä tantachthapjjaraquï, qhitinacatejj jayan apanucutäpcän ucanacarojja.” Ucwa Tatitojj arsu, qhititejj willitatatäpcän uca israelitanacaru mayjaru tantachthapqui ucajja.

Isaías 57:18

Sarnakäwipjja uñjtwa, ucampis nayajj kolljjatäwa, samarañ churaraquï, chekpachansa samarataraquiw uñjasjjanejja. Llaquitanacarusti nayaw chuymachäjja,

Isaías 57:19

takenirus saraquïwa: ¡Samarañajj utjpan jayanquirinacampi, uqhamaraqui jac'anquirinacampisa! ¡Nayaw marcajjarojj kolljjatasjjä!”

Isaías 58:8

Ucapachaw khanamajj, khantati warawarar uñtata c'ajani, usuchjatanacamas janc'aquiraquiw jacthapjjani. Cheka cancañamasti juman nayrakatamwa sarani, khapak cancañajjaraquiw juman khepamatjja arcanïtam.

Isaías 60:15

Janiw mayampis apanucutäpcätati, uñisita, sapaquiraqui, jan ucasti nayaw jumarojj wiñayataqui c'ajquir tucuyäma, wiñayataqui cusiscañaraqui.

Jeremías 10:20

Campamentojjasti k'ala t'unjatawa, take chinüñanacapas t'akaratcamaquiraquiwa. Wawanacajjas apanucuwayjjapjjaquiraquituwa, ¡janiw jacjjapjjeti! Janiraquiw qhitis wasitat carpanacajj sayt'ayirejj utjquiti, ni qhitis lonanaca janatatirejj utjquiti.” Profeta:

Jeremías 17:14

Tata, jumaquiy kolljjatt'ita, ucatsti kollatäyäwa; jumay khespiyita, ucatsti khespitaw uñjasï, juma saparuquiw yupaycharacsma.

Jeremías 3:22

Nayatac sayt'asir wawanaca, nayan ucar cuttanjjapjjam, nayaraquiw jumanacarojj naya toke sayt'asitanacamatjja kollart'jjapjjäma” sasa. “Acancapjjtwa, jumaruw maqhatjjapjjaracsma, jumätaw nanacan Tatitu Diosajjajja.

Jeremías 30:13

Janiw qhitis jumat llaquirejj utjquiti, janiraquiw qhitis chhojjrinacam kollirejj utjquiti, janiw kollañjamäcaractati.

Jeremías 33:24

“¿Amuytati cunjämsa jakenacajj parlapjje nayan Judá orakeru, uqhamaraqui Israelaru apanucutajjatjja? ¡Ucatwa marcajjarojja jisc'achañampi uñjapjje, janiraquiw mä marcarjamas uñjapquiti!

Jeremías 33:6

Ucampisa kollapjjaraquïmawa, c'umara tucuyapjjaraquïma, ucatsti chekpachanaracwa sumana jan qhitin cun sata sarnakasjjapjjäta.

Jeremías 8:22

¿Janit cuna kollas Galaad chekanjja utjcpacha? ¿Janit ucanjja qhiti kollt'iris utjcpacha? ¿Cunataraqui marcajjarusti jan kollapjjesti?

Lamentaciones 2:15

Thaqui sariri jakenacasti uqham jumar uñjasajja, larusisaw amparanacapsa t'ajjllirasipjjaraqui; qhuyusipjjewa, p'eksa qhiwipjjaraqui, sapjjaraquiwa: “¿Acati cawquïri marcattejj wali parlapcäna, uqhamaraqui wali suma marcaw sapcäna ucasti?” sasa.

Ezequiel 34:16

Chhaktat ovejanacjja thaktasjjäwa, saranucutanacsti cuttayanjjaraquïwa, cawquïrinacatejj cayu p'aquita sarnakapjjani ucanacarusti uca p'aquit cayunacapjja kolljjatt'araquïwa, usutanacarusti yanapt'araquïwa, liq'i ovejanacarusa, t'uqhanacarusa sumwa uñjasiraquëjja. Cunjämatejj uñjañajj waquisqui uqhamarjamaw nayajj uñjasiraquëjja.

Ezequiel 35:12

Ucapachaw jumajj uñjäta, cuna jan wali arunactejj jumajj Israelan kollunacap toke arscäyäta uca arunaca ist'atajja. Jumasti saractawa: ‘Uca kollunacajj ch'usa wasaraquiwa, jichhajj tucj-jjaracsnawa,’ sasa.

Ezequiel 36:20

Ucampisa, cawqui marcanacarutejj jupanacajj puripcän uca marcanacansti, jupanacajj nayan sutejj-jja taquisisipcaquïnwa, jakenacasti sapjjaraquïnwa: ‘Acanacajj Dios Tatitun marcapawa, ucampisa orakenacapatjja mistunjjapjjewa’ sasa.

Oseas 11:3

Ucampis nayaw Efraín marcarojj irpnakäyäta, uqhamarac sarnakañsa yaticharaquïyätwa; ucampis jupanacajj janiw amuyasipcänti nayan jupanacar uñjascatajja.

Oseas 6:1

Takeni jutapjjam, Tatitun ucar cuttjjañäni. Jupaw usuchjistu, juparaquiw c'umarachjjestani; chhojjriñchjistuwa, juparaquiw kolljjatjjestani.

Malaquías 4:2

Ucampisa qhitinacatï nayaru ajjsartasa sarnakapcta ucanacataquejj, chekaparu sarnakañajj intir uñtataw khantanini, khanapasti jakenacataquejj khespiyasiñ apanini. Ucatsti jumanacajj cusisiñata jalnakapjjäta cunjämatejj vaca kallunacajj uyut mistusajj jalnakapquejj uqhama.

1 Pedro 2:24

Jesucristo quipcaraquiw juchanacasjja pachpa cuerpopjjaru apawayjje, crusan jiwasina, uqhamata jiwasajj jucha lurañar jiwañasataqui, mä suma jacañan jacañasataqui. Jupajj chhojjriñchjatänwa jumanacajj c'umaräpjjañamataqui.

Apocalipsis 22:2

Uca marcan jach'a callepansti purap jawira uñcatasinjja mä kokaw jilaraquïna. Uca kokasti jacañ churiri kokänwa, tunca payani cutiraquiw maranjja achüna. Sapa phajjsiwa achüna, laphinacapasti marcanacan kollasiñapataquiw willirtaraquïna.