Éxodo 14:13 - Qullan Arunaca

¹³ Ucampis Moisesajj jupanacarojj sänwa: —Jan ajjsarapjjamti, mayjancapjjaquim. Jichhawa uñjapjjäta Tatitojj cuntejj lurcani jichhüru jumanacaru khespiyañataqui ucjja. Ucampis jichhüru egipcionacar uñjapcta uqhamjja janiw mayampsa uñjcjjapjjätati.

Aymar Bibliia 1986

¹³ Ucampis Moisesajj jupanacarojj sänwa: —Jan ajjsarapjjamti, mayjancapjjaquim. Jichhawa uñjapjjäta Tatitojj cuntejj lurcani jichhüru jumanacaru khespiyañataqui ucjja. Ucampis jichhüru egipcionacar uñjapcta uqhamjja janiw mayampsa uñjcjjapjjätati.

Qullan Arunaka DC

¹³ Ukampis Moisesax ukxaruw jupanakar säna: —Jan axsarapxamti. Ch'amañchasipxam, jichhüruw uñjapxäta kuntix Tatitux jumanakar qhispiyañatak lurkani uka. Jichhür uñjapkta uka egipcionakarux janiw mayampsa uñkatkxapxätati.

Éxodo 14:13 Jak'a apnaqawi uñst'ayäwi

Génesis 15:1

Ucanac khepatsti Tatitu Diosajj Abramarojj mä visionan uñstäna ucatsti saraquïnwa: —Jan ajjsaramti, Abram, nayätwa jumar arjjatirimajja, jumar churañasti wali jach'apunïniwa —sasa.

Génesis 26:24

Uca arumasti Tatituw uñstäna, saraquïnwa: “Nayätwa Abraham awquiman Diosapajja. Jan ajjsaramti, nayaw jumampïscta. Abraham sirvirejja laycuw jumarojj bendicïma, wawanacamsa mirtayaraquïwa” sasa.

Génesis 46:3

Diosasti juparojj saraquïnwa: —Nayajj Diosätwa, awquiman Diosapätwa. Egiptor sarañjja jan ajjsaramti, ucanwa nayajj wawanacamarojj mä jach'a marca tucuyä.

Génesis 49:18

“¡Tata, khespiyasiñamwa suyt'ascta!

2 Reyes 6:16

Eliseosti sänwa: —Jan ajjsaramti, jiwasampïqui ucanacasti juc'ampiwa, jupanacampïqui ucanacata sipana —sasa.

1 Crónicas 11:14

jupajja chicachica yapu taypiru sayt'asisinjja nuwasïnwa filisteo jakenacaru atipjasina. Uqhamawa Tatitojj yanapäna jach'apuni atipjayasa.

2 Crónicas 20:15

Jupasti sänwa: “Judá, uqhamaraqui Jerusalén marcan jaquir jakenaca, uqhamarac juma Josafat reyisa, Tatitusti aqham sapjjtamwa: ‘Jan ajjsarapjjamti, janiraqui uca jach'a ejército uñjasinsa sustjasipjjamti, aca nuwasiñajja janiw jumanacancquiti, jan ucasti Diosanquiwa.

2 Crónicas 20:17

Janiw jumanacati nuwasipcätajja, ucampis jumanacajj sum waquichasipjjam, alekt'apjjaquiraquim, ucatsti uñjapjjätawa cunjämtï Tatitojj jumanacar khespiyapcätam uca. ¡Jerusalenanquiri, Judá orakenquir jakenaca, jan ajjsarapjjamti, janirac sustjasipjjamsa; arumanthi alwasti jupanacamp nuwasir sarapjjam, Tatitusti jumanacampïsquiwa!’ ” sasa.

Nehemías 9:9

Jumajj uñjtawa cunjämsa nayra awquinacajjajja Egiptona t'akhesipjjäna ucjja, uqhamarac ist'aractawa llaquisiñ horasan parlasitanacapjja Mar Rojo sat kota jac'ana.

Salmos 3:8

Tatay, jumaw khespiyirïtajja; ¡marcamarojj asquinacampiy phokhantam!

Salmos 68:21

Diosajj uñisirinacapan p'ekep jaljtayani, ñankha lurañ jan wanir jakenacan p'eke ch'aqhap t'unjani.

Salmos 78:53

Wali thuriñchat jupanacarojj irpäna, jan ajjsarayasipjjañapataqui, timanacaparusti lamar kotaw p'amp'antäna.

Salmos 91:8

Nayranacamamp uñjañataquiquiw ucancäta, ñankha lurir jakenacan catokäwip uñjäta.

Éxodo 14:30

Uca urusti Tatitojj uqhamwa israelitanacarojj khespiyäna egipcionacan ch'amapatjja. Ucatsti israelitanacajj kota thiyanjja uñjapjjänwa egipcio jake jiwaratanaca.

Éxodo 20:20

Moisesasti israelitanacarojj saraquïnwa: —Jan ajjsarapjjamti. Diosasti jutiwa jumanacaru yant'añataqui, uqhamarac jupajj muniwa take horasan jupar ajjsarasa jan jucha lurapjjañanacama.

Isaías 26:3

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

Isaías 30:15

Tatitusti, Israelan kollan Diosapajj siwa: “Cuttanjjapjjam, samaratäquïpjjaraquim, khespitäsipcätawa. Samarañampin, iyawsañampina ch'amajj utji.” Ucampis jumanacajj janiw munapctati,

Isaías 35:4

ajjsaririnacarusti sapjjaraquim: “Ch'amacht'asim, jan ajjsaramti” sasa. “¡Acanquiw Diosamajj jumanacar khespiyañataqui, uñisirinacamarusti juchanacapatjamwa mutuyaraquini!”

Isaías 43:11

Naya sapaquïtwa Tatitojja, nayat yakhasti janiw khespiycaspati.”

Isaías 7:4

ucatsti saraquim: ‘Amuyasim, ucampis jan sustjasimti, jan ajjsaramti, janiraqui llajllas tucumti, uca pä jisc'a ninar uñtata jek'erinacatjja, Rezín reyejj Sirio jupan jakenacapampi, uqhamaraqui Remaliasan yokapasa, jupanacasti colerat naqhantirjamäscaraquiwa.

Jeremías 3:23

Kollunac pataru sarapjjatajjajj inamayaquiwa, uca kollunac patan arnakasitanacajjas inamayawa, khespiyiri Tatit Dios sapanacwa, Israelajj khespiyasiñjja jicjjatani.

Lamentaciones 3:26

Tatitur suyt'ascañaquiw walejja, Tatituna yanapapa suyt'añaquiw walejja.

Oseas 1:7

Ucampisa, Judá marcatjja qhuyapt'ayasïwa, naya quipca, Tatitu Diosaparaquiw khespiyä. Janiw guerrampiti khespiycäjja; jan ucasti, jan armampi, jan espadampi, jan caballeriampiquiw khespiyäjja.”

Oseas 13:4

Tatitojj siwa: “Naya Tatituwa juman Diosamätjja, Egiptonccäyätasa ucqhatpacha; jan qhitirus Diosamatjja uñt'asimti, jan ucasti nayaruqui, nayaquiraquïtwa juman khespiyirimajja.

Oseas 13:9

Tucjämaw jichhajj, Israel, janiraquiw qhitis jarc'akcätamti.

Habacuc 3:13

Jumasti mistuntawa marcamaru yanapt'iri, juma quipca ajllisctasa uca reyimpiru. Jan wali amtañani jakenacan jilïripsa tucjaractawa, takpachaniruw k'alala jan cunani tucjaractajja.

Habacuc 3:8

Tatay, ¿coleratätati jawiranacataquejja? ¿Colerataraquïtati jach'a kotanacataquejja? ¿Ucatti caballonacamata jaltajja, atipt'iri carromarus kont'astajja?

Números 14:9

Ucampis jan Tatitu contra sartapjjamti, ni uca marcan jakenacaparus ajjsarapjjamti, jupanacasti mä t'ant'jam mank'antatäniw jiwasataquejja. Jupanacar arjjatirejj janiw qhitis utjquiti, ucat sipansa Tatituw jiwasampïsqui. ¡Jan ajjsarapjjamti!

Mateo 28:5

Angelasti warminacarojj saraquïnwa: “Jan ajjsarapjjamti, nayajj yattwa ch'accatatäcäns uca Jesusar thakasipcatama.

Deuteronomio 20:3

aqham sasa: ‘Ist'apjjam israelit jakenaca; jichhüruwa uñisirinacamampi nuwasipjjäta. Jan jumanacajj mayjt'asipjjamti, janirac ajjsarapjjamsa; janiraqui qhathatipjjamti ni sustjasipjjamsa,

1 Samuel 11:13

Ucampisa Saúl waynajj saraquïnwa: —Jichhürojj janiw qhitis jiwayatäcaniti, jichhüru Tatitojj Israel marcaparu khespiyatap laycu —sasa.

1 Samuel 12:16

“Uqhamasti jichhajj jan onjjtapjjamti cawqhancapctatejj uca chekata, cuna jach'a uñacht'äwinactejj Tatitojj jumanacar uñacht'ayapcätam ucanacwa uñjapjjäta.