1 Timoteo 6:5 - Qullan Arunaca

⁵ uqhamaraqui alekat jan wali amtañani jakenacampi nuwasiñasa. Janiw cuna cheka arunacsa yatquiti, jan ucasti amuyatanacapatjja saräwipajj kollke jicjjatañäcaspas uqhamawa. [Acanacatjja jithektam.]

Aymar Bibliia 1986

⁵ uqhamaraqui alekat jan wali amtañani jakenacampi nuwasiñasa. Janiw cuna cheka arunacsa yatquiti, jan ucasti amuyatanacapatjja saräwipajj kollke jicjjatañäcaspas uqhamawa. [Acanacatjja jithektam.]

Qullan Arunaka DC

⁵ sapa kuti jan wali amtan jaqinakamp nuwasiña, khitinakatix chiqa kankañsa jan yatipki ukanakampi, jupanakasti Tatitur iyawsañ chuymax qullqi jikxatañäkaspas ukhamak amuyapxi.

1 Timoteo 6:5 Jak'a apnaqawi uñst'ayäwi

Isaías 56:11

mank'at jiwat anunacäpjjewa, janiraquiw sisthapipquisa, jan cun amuyiri awatirinacäpjjaraquiwa; sapa maynis thaquipanac sarasipqui, cunatejj jupanacataquejj asquïqui ucacwa thakhasipqui.

Jeremías 6:13

“Takenisa, jisc'as jach'asa, lunthatasiñampi jicjjatañatacwa lup'isipquejja; profetanacasa, sacerdotenacasa, takeniw lunthatasiñaru catuyasipjje.

Jeremías 8:10

Ucatpï jichhajj warminacapjja yakhanacaru catuyäjja. Orakenacapsa yakhanacaruw catuyaraquëjja. Cunjämatejj jisc'as jach'asa, lunthatasiñampi ganañacwa amtasipqui; profetanacasa, sacerdotenacasa takeniw lunthatasiñaru catuyasipjje.

Ezequiel 33:31

Uqhamaw marcajjajj jutasin juman nayrakataman kont'asipjje cunjämtejj lurapjjerïcäna, arunacama ist'añataqui. Ucampisa janiw uca arunacarjama sarnakapquiti. Munasiña k'ochunacäcaspasa uqhamacwa k'ochupjje, ucampisa jupanacan chuymanacapajj kollken khepapa sarañanquiwa.

Mateo 12:33

“Mä kokatejj sumächi ucajja, suma achuniwa; jan suma kokäcchi ucasti, janiw sumäquiti achupajja. Uqhamasti mä kokajj achupat uñt'atawa.

Mateo 21:13

Ucatsti saraquïnwa: “Kellkatanjja siwa: ‘Utajjasti Diosat mayisiñ utäniwa’ sasa, ucampis jumanacajj lunthatanacan putupwa wact'ayasipjjatätajja” sasa.

Mateo 23:13

“¡Ay, camachapcaquïta jumanacajj ley yatichirinaca, fariseonaca, c'ari chuymaninaca! Jumanacasti alajjpacha puncjja jist'antapjjtawa yakhanacan jan mantapjjañapataqui; ni jumanacas mantapcaractati ni yakhanacarus mantayapcaractati.

1 Corintios 11:16

Ucampis maynitejj aca toket ch'ajjwañ munchejja yatiñapawa, janiwa jiwasas ni Diosan iglesianacapas yakha luräwjja uñt'ctanti.

2 Tesalonicenses 3:6

Jilatanaca, ewjjt'apjjsmawa Tatit Jesucristosan sutiparu, jithektapjjam cawquïr jilatatejj jan irnakañ munqui ucatjja, uqhamarac cuntejj nanacajj yatichapjjsma ucarjama jan sarnakañ munirinacatjja.

1 Timoteo 1:6

Yakhepanacajj acatjja saranucjjapjjewa, jan cunatac sirvquir ch'ajjwañanacaru chhakasina.

1 Timoteo 3:3

Janiraquiw machirïñapäquisa, qhitimpis ch'ajjwirïñapäquiti, janiraquiw lunthatatampi jicjjatat kollks munañapäquiti. Antisas qhuyapayasirïñapawa, takenimpis suman jacañapa, janiraquiw kollke chuymäñapäquiti.

1 Timoteo 3:8

Uca pachparaquiw diacononacajj suman uñjat chachanacäpjjañapa; arsutaparojj phokhañaparaquiwa, janiraquiw machjasiñapäquiti, janiraquiw lunthatatampi jicjjatat kollksa munañapäcaraquiti.

1 Timoteo 4:7

Ucampis jan yäkamti aca oraken lokhe arunacaparojja. Sapürus Dios chuymaqui jacam.

1 Timoteo 4:8

Janchin ejercicio lurañajj cunataquis asquiwa, ucampis Dios chuymäñawa juc'ampi take cunataquis asquejja, acapachan jacañataquisa uqhamarac jutiri urun jacañataquisa.

1 Timoteo 6:6

Ucampis take cunäniñajj Dios chuymäñanacwa utji, cunatejj utjarapquistu ucampiqui cusisitästan ucapacha.

2 Timoteo 3:5

Suma Dios chuymäcaspas uqhamaw tucupjjani, ucampis chekpach Diosar arcañan ch'amapjja apanucupjjaniwa. Uca casta jakenacampejj jan cunans mayachasimti.

2 Timoteo 3:8

Cunjämatejj Janes, uqhamarac Jambres jan wali jakenacajj Moisés contra sayt'apjjäna, uca pachparaquiw uca jakenacajj Tatitun arunacapataqui sayt'apjje. Aca jakenacajj chuymatpach jan wali amtani jakenacäpjjewa, iyawsäwi toketjja apanucutäpjjewa.

Tito 1:11

Ucanacarojj amuct'ayañaw waquisi. Familiapachanacwa mayjt'ayapjje, cunatejj jan walïqui ucanac yatichasina, jan wali chuymampi kollke jicjjatasiñ laycuqui.

2 Pedro 2:15

Cheka thaquit sarakapjjatap laycuw chhaktat sarnakapjje. Beoran yokapa, Balaam profetan luratanacaparuw arcapjje, qhititejj jan walinac lurasa, kollke jicjjatañac muncänjja ucaru.

2 Pedro 2:3

Kollker sinti chuyma churatäpjjatap laycojja c'ari yatichäwinacampejj jumanacatjja k'alwa take cunsa apsupjjätam, ucampis jupanacarojj t'unjatäñaquiw suyt'jje, nayratpacha juchañchatäpjjaraquiwa.

Judas 1:11

¡Ay cunancapcaquini! Cainan thaquip arquirinacajja Kollke jicjjatañ laycuw maysar saranucupjje, Balaamjama. Coré chachjamaw amuyasipjje, qhititejj juchapat jiwayatäcäna uqhama.

Apocalipsis 18:13

Apanipjjaraquïnwa canela, suma k'apquiri kollanaca, incienso, mirra, perfumenaca, vino, aceite, suma jac'u, trigo, uqhamarac qhumt'ir uywanaca, ovejanaca, caballonaca, caballomp katatiñ carronaca, apanipjjaraquïnwa esclavonacsa.

Apocalipsis 18:3

Take marcanacasti uca Babilonian wachoka jucha luratanacapampejj vinompjamaw macharapjje. Acapach reyinacasti uca Babiloniampiraquiw wachoka juchan jacapjjänjja, alaquipa luriri jakenacasti jupan jan wali sarnakatapampejj waliraqui kamiriptapjjänjja” sasa.