ເພງ^ສັນລະເສີນ 128:3 - ພຣະຄຳພີສັກສິ

³ ເມຍ​ເຈົ້າ​ນັ້ນ​ຈະ​ເປັນ​ດັ່ງ​ຕົ້ນອະງຸ່ນ​ພັນດີ ທີ່​ມີ​ໝາກດົກງາມ​ໃນ​ບ້ານ​ເຮືອນ​ຂອງເຈົ້າ ແລະ​ພວກ​ລູກຊາຍ​ທີ່​ນັ່ງ​ຢູ່​ອ້ອມຂ້າງ​ອ້ອມແອວ ກໍ​ເປັນ​ດັ່ງ​ແຖວ​ຕົ້ນ​ກອກເທດໜຸ່ມ​ຢູ່​ອ້ອມຮອບ​ເຈົ້າ.

ເພງ^ສັນລະເສີນ 128:3 Jak'a apnaqawi uñst'ayäwi

ປະຖົມມະການ 49:22

ສ່ວນ​ໂຢເຊັບ​ນັ້ນ​ດັ່ງ​ລໍປ່າ​ຕາມ​ແຄມ​ນໍ້າພຸ​ໄສ ປຽບ​ຄື​ລູກ​ມ້າ​ເຖິກ​ໂຕ​ງາມ​ຕາມ​ເນີນພູ​ພຸ້ນ.

1 ຂ່າວຄາວ 8:40

ລູກຊາຍ​ຂອງ​ອູລາມ​ເປັນ​ນັກຮົບ​ທີ່​ເກັ່ງກ້າ​ແລະ​ນັກຍິງທະນູ. ລາວ​ມີ​ລູກຊາຍ​ແລະ​ຫລານຊາຍ​ທັງໝົດ​ໜຶ່ງຮ້ອຍ​ຫ້າສິບ​ຄົນ. ຊື່​ທັງໝົດ​ທີ່​ມີ​ຢູ່​ຂ້າງ​ເທິງ​ນັ້ນ​ແມ່ນ​ບັນດາ​ລູກ​ຫຼານ​ຂອງ​ເຜົ່າ​ເບັນຢາມິນ.

ເພງ^ສັນລະເສີນ 127:3

ເດັກນ້ອຍ​ຄື​ຂອງຂວັນ​ທີ່​ພຣະເຈົ້າຢາເວ​ໂຜດ​ປະທານ ພວກເຂົາ​ຄື​ພອນ​ອັນ​ແທ້ຈິງ.

ເພງ^ສັນລະເສີນ 127:5

ຄວາມສຸກ​ເປັນ​ຂອງ​ຄົນ​ທີ່​ມີ​ທະນູ​ຫລາຍ​ລູກ​ໃນ​ມື ເມື່ອ​ປະເຊີນ​ກັບ​ສັດຕູ​ໃນ​ທີ່​ຕັດສິນ​ຈະ​ບໍ່​ພ່າຍແພ້.

ເພງ^ສັນລະເສີນ 144:12

ຂໍ​ໃຫ້​ລູກຊາຍ​ຂອງ​ຂ້ານ້ອຍ​ເປັນ​ດັ່ງ​ຕົ້ນໄມ້​ໃຫຍ່ ທີ່​ໃຫຍ່​ຂຶ້ນ​ຢ່າງ​ທ່ຽງທຳ​ໃນ​ໄວ​ໜຸ່ມ​ຂອງ​ເຂົາເຈົ້າ. ຂໍ​ໃຫ້​ລູກສາວ​ຂອງ​ຂ້ານ້ອຍ​ເປັນ​ດັ່ງ​ເສົາ​ຕົ້ນ​ໃຫຍ່ ທີ່​ຖືກ​ປະດັບ​ໄວ້​ເອ້​ໃນ​ພະຣາຊວັງ.

ເພງ^ສັນລະເສີນ 52:8

ແຕ່​ຂ້ານ້ອຍ​ເປັນ​ດັ່ງ​ຕົ້ນ​ໝາກກອກເທດ​ຕົ້ນ​ໜຶ່ງ ທີ່​ໃຫຍ່​ຂຶ້ນ​ຢູ່​ໃນ​ວິຫານ​ຂອງ​ພຣະເຈົ້າ ຂ້ານ້ອຍ​ໄວ້ວາງໃຈ ໃນ​ຄວາມຮັກ​ອັນ​ໝັ້ນຄົງ​ຂອງ​ພຣະເຈົ້າ​ຕະຫລອດໄປ.

ເຢເຣມີຢາ 11:16

ຄັ້ງໜຶ່ງ ເຮົາ​ໄດ້​ເອີ້ນ​ພວກເຂົາ​ວ່າ ກົກ​ໝາກກອກເທດ​ທີ່​ມີ​ໃບ​ຂຽວງາມ​ດີ ແລະ​ມີ​ໝາກ​ງາມ​ເຕັມ​ກົກ, ແຕ່​ບັດນີ້​ໃນ​ທ່າມກາງ​ສຽງ​ຟ້າຮ້ອງ​ຢ່າງ​ຄຶກຄະນອງ ເຮົາ​ຈະ​ມາ​ເພື່ອ​ຈູດ​ໃບ​ແລະ​ຫັກ​ງ່າ​ຂອງ​ມັນ​ຖິ້ມ.

ເອເຊກຽນ 19:10

ສ່ວນ​ແມ່​ຂອງ​ເຈົ້າ​ນັ້ນ​ເປັນ​ດັ່ງ​ເຄືອໝາກອະງຸ່ນ ທີ່​ຖືກ​ປູກ​ໄວ້​ໃກ້​ແຄມ​ລຳທານ​ແຫ່ງ​ໜຶ່ງ. ຍ້ອນ​ໃນ​ທີ່ນັ້ນ​ມີ​ນໍ້າ​ຊຸ່ມຊື່ນ​ຢ່າງ​ຫລວງຫລາຍ ເຄືອ​ອະງຸ່ນ​ຈຶ່ງ​ມີ​ໃບ​ດົກໜາ​ເຕັມ​ແຕ່​ໝາກ.

ໂຣມ 11:24

ດ້ວຍວ່າ, ຖ້າ​ພຣະເຈົ້າ​ຊົງ​ຕັດ​ເຈົ້າ​ອອກ​ຈາກ​ຕົ້ນກອກ​ປ່າ ທີ່​ເປັນ​ໄມ້​ປ່າ​ຕາມ​ທຳມະຊາດ ແລະ​ຊົງ​ນຳ​ມາ​ຕໍ່​ເຂົ້າ​ກັບ​ຕົ້ນກອກ​ພັນ​ດີ ຊຶ່ງ​ຜິດ​ທຳມະຊາດ​ຂອງ​ມັນ​ແລ້ວ ການ​ທີ່​ຈະ​ເອົາ​ກິ່ງ​ເຫຼົ່ານັ້ນ​ທີ່​ເປັນ​ກິ່ງ​ເດີມ ມາ​ຕໍ່​ເຂົ້າ​ກັບ​ຕົ້ນ​ມັນ​ເອງ ກໍ​ຈະ​ງ່າຍ​ກວ່າ​ນັ້ນ​ຫລາຍ​ເທົ່າ​ໃດ​ໜໍ.