ໂຢຊວຍ 17:18 - ພຣະຄຳພີສັກສິ

¹⁸ ດັ່ງນັ້ນ ທາງ​ເຂດ​ເນີນພູ​ຈຶ່ງ​ຈະ​ເປັນ​ຂອງ​ພວກເຈົ້າ. ເຖິງ​ແມ່ນ​ວ່າ​ມັນ​ເປັນ​ປ່າ​ກໍຕາມ ແຕ່​ພວກເຈົ້າ​ກໍ​ສາມາດ​ຖາງ​ໃຫ້​ແປນ ແລະ​ຢຶດຄອງ​ຈາກ​ສົ້ນ​ເບື້ອງນີ້​ຈົນເຖິງ​ສົ້ນ​ເບື້ອງນັ້ນ ເປັນ​ກຳມະສິດ​ຂອງ​ພວກເຈົ້າ​ໄດ້. ສຳລັບ​ພວກ​ການາອານ​ນັ້ນ ເຖິງ​ແມ່ນ​ວ່າ​ພວກເຂົາ​ມີ​ລົດຮົບ​ເຫຼັກ ແລະ​ມີ​ກຳລັງ​ຫລາຍ​ກໍຕາມ ພວກເຈົ້າ​ກໍ​ຈະ​ຂັບໄລ່​ພວກເຂົາ​ອອກ​ໄປ​ໄດ້.”

ໂຢຊວຍ 17:18 Jak'a apnaqawi uñst'ayäwi

ປະຖົມມະການ 49:24

ແຕ່​ໂຢເຊັບ​ຖື​ໜ້າທະນູ​ໄວ້​ໃນ​ກຳມື​ຢ່າງ​ໝັ້ນແກ່ນ ແລະ​ແຂນ​ລາວ​ຈຶ່ງ​ໄດ້​ຮັບ​ຊ່ວຍ​ຊູ​ຂຶ້ນ​ໃຫ້​ແຂງແຮງ; ເປັນ​ເພາະ​ຣິດອຳນາດ​ຂອງ​ພຣະອົງ ຄື​ພຣະເຈົ້າ​ອົງ​ຊົງ​ນຳພາ​ຢາໂຄບ​ມາ​ຕະຫລອດ. ພຣະອົງ​ເປັນ​ທັງ​ຜູ້​ປົກປ້ອງ​ຄຸ້ມຄອງ​ຕະຫລອດ​ມາ ທັງ​ເປັນ​ພຣະຜູ້​ລ້ຽງ​ຊົນເຜົ່າ​ຊາດ​ອິດສະຣາເອນ​ດ້ວຍ.

2 ຊາມູເອນ 18:6

ກອງທັບ​ຂອງ​ກະສັດ​ດາວິດ​ໄດ້​ອອກ​ໄປ​ໂຈມຕີ​ພວກ​ອິດສະຣາເອນ​ທີ່​ນອກ​ເມືອງ ແລະ​ໄດ້​ຕໍ່ສູ້​ພວກເຂົາ​ຢູ່​ໃນ​ປ່າ​ເອຟຣາອິມ.

ໂຣມ 8:31

ຖ້າ​ເປັນ​ຢ່າງ​ນັ້ນ ເຮົາ​ທັງຫລາຍ​ຈະ​ວ່າ​ຢ່າງ​ໃດ? ຖ້າ​ພຣະເຈົ້າ​ຢູ່​ຝ່າຍ​ພວກເຮົາ ຜູ້ໃດ​ຈະ​ຕໍ່ສູ້​ພວກເຮົາ​ໄດ້?

ໂຣມ 8:37

ແຕ່​ໃນ​ເຫດການ​ທັງປວງ​ເຫຼົ່ານີ້ ພວກເຮົາ​ກໍ​ມີ​ໄຊຊະນະ​ຢ່າງ​ເຫລືອລົ້ນ ໂດຍ​ທາງ​ພຣະອົງ​ຜູ້​ຊົງ​ຮັກ​ພວກເຮົາ​ທັງຫລາຍ​ນັ້ນ.

ພຣະບັນຍັດສອງ 33:17

ໂຢເຊັບ​ມີ​ກຳລັງ​ກ້າ​ຄື​ງົວກະທີງ​ເຖິກ​ໂຕໜຶ່ງ ຈຶ່ງ​ເກັ່ງກ້າ​ຕໍ່ສູ້ ເພາະ​ຮູ້​ວ່າ​ຕົນ​ມີ​ເຂົາ​ຕ້ານທານ; ເຂົາ​ຂອງ​ລາວ​ນັ້ນ​ມີ​ມານາເຊ​ຫລາຍ​ພັນ​ຄົນ​ຊ່ວຍ ແລະ​ຂອງ​ເອຟຣາອິມ​ເປັນ​ໝື່ນໆ​ຊຶ່ງ​ເປັນ​ກຳລັງ. ດ້ວຍ​ກຳລັງ​ເຫຼົ່ານັ້ນ​ລາວ​ຈຶ່ງ​ໄລ່​ຫລາຍ​ຊົນຊາດ​ໜີ ແລະ​ດັນ​ພວກເຂົາ​ອອກ​ໄປ​ຈົນ​ສຸດ​ແຜ່ນດິນ​ໂລກ.”

ເຮັບເຣີ 13:6

ດ້ວຍເຫດນັ້ນ ຈົ່ງ​ໃຫ້​ພວກເຮົາ​ມີ​ໃຈ​ກ້າ ແລະ​ກ່າວ​ວ່າ, “ອົງພຣະ​ຜູ້​ເປັນເຈົ້າ ເປັນ​ພຣະ​ຜູ້​ຊ່ວຍ​ຂອງ​ຂ້າພະເຈົ້າ ແລະ ຂ້າພະເຈົ້າ​ຈະ​ບໍ່​ຢ້ານກົວ. ມີ​ຜູ້ໃດ​ແດ່​ຈະ​ເຮັດ​ຫຍັງ ໃຫ້​ຂ້າພະເຈົ້າ​ໄດ້.”

ໂຢຊວຍ 13:6

ດິນແດນ​ເຫຼົ່ານີ້​ລວມເອົາ​ເຂດແດນ​ທັງໝົດ​ຂອງ​ຊາວ​ຊີໂດນ ຊຶ່ງ​ຢູ່​ຕາມ​ເຂດ​ເນີນພູ​ລະຫວ່າງ​ພູ​ເລບານອນ​ແລະ​ເມືອງ​ມີສະເຣໂຟດ​ມາອີມ. ເຮົາ​ຈະ​ຂັບໄລ່​ປະຊາຊົນ​ເຫຼົ່ານີ້​ທັງໝົດ​ອອກ​ໜີ ເມື່ອ​ປະຊາຊົນ​ອິດສະຣາເອນ​ບຸກໜ້າ​ເຂົ້າ​ໄປ. ເຈົ້າ​ຈະ​ຕ້ອງ​ແບ່ງປັນ​ດິນແດນ​ນີ້​ໃຫ້​ຊາວ​ອິດສະຣາເອນ ຕາມ​ທີ່​ເຮົາ​ໄດ້​ສັ່ງ​ເຈົ້າ​ໃຫ້​ເຮັດ.

ໂຢຊວຍ 15:9

ຈາກ​ບ່ອນ​ນີ້ ຊາຍແດນ​ໄດ້​ໄປ​ຈົນເຖິງ​ນໍ້າພຸ​ເນັບໂທອາ ແລະ​ອອກ​ໄປ​ຈົນເຖິງ​ເມືອງ​ຕ່າງໆ​ໃກ້​ກັບ​ພູ​ເອຟະໂຣນ. ໃນ​ທີ່ນັ້ນ ຊາຍແດນ​ນີ້​ໄດ້​ລ້ຽວ​ໄປ​ທາງ​ບາອາລາ (ຫລື​ກີຣີອາດ​ເຢອາຣີມ)

ໂຢຊວຍ 17:17

ໂຢຊວຍ​ໄດ້​ກ່າວ​ແກ່​ເຜົ່າ​ເອຟຣາອິມ ແລະ​ມານາເຊ​ຕາເວັນຕົກ​ວ່າ, “ຕາມ​ທີ່​ຈິງ​ແລ້ວ ພວກເຈົ້າ​ມີ​ຄົນ​ຫລາຍ ແລະ​ມີ​ອຳນາດ​ເຂັ້ມແຂງ. ພວກເຈົ້າ​ຄວນ​ຈະ​ໄດ້​ຮັບ​ເກີນກວ່າ​ໜຶ່ງ​ສ່ວນ.

ໂຢຊວຍ 20:7

ດັ່ງນັ້ນ ໃນ​ທິດ​ຕາເວັນຕົກ​ຂອງ​ແມ່ນໍ້າ​ຈໍແດນ ພວກເຂົາ​ຈຶ່ງ​ໄດ້​ເລືອກ​ເອົາ​ເມືອງ​ເກເດັດ​ໃນ​ຄາລີເລ ໃນ​ເຂດ​ເນີນພູ​ຂອງ​ເຜົ່າ​ເນັບທາລີ; ເມືອງ​ຊີເຄມ​ໃນ​ເຂດ​ເນີນພູ​ຂອງ​ເຜົ່າ​ເອຟຣາອິມ ແລະ​ກີຣີອາດ-ອາກບາ​ຄື​ເມືອງ​ເຮັບໂຣນ​ໃນ​ເຂດ​ເນີນພູ​ຂອງ​ເຜົ່າ​ຢູດາ.

1 ຊາມູເອນ 1:1

ຍັງ​ມີ​ຊາຍ​ຄົນ​ໜຶ່ງ​ຊື່​ວ່າ ເອນການາ ຄົນ​ໃນ​ເຜົ່າ​ເອຟຣາອິມ ຜູ້​ທີ່​ອາໄສ​ຢູ່​ໃນ​ເມືອງ​ຣາມາ​ໃນ​ເຂດ​ເນີນພູ​ເອຟຣາອິມ. ລາວ​ເປັນ​ລູກຊາຍ​ຂອງ​ເຢໂຣຮາມ​ແລະ​ຫລານຊາຍ​ຂອງ​ເອລີຮູ ແລະ​ເປັນ​ຄົນ​ໃນ​ຄອບຄົວ​ໂຕຮູ ຊຶ່ງ​ເປັນ​ສ່ວນ​ໜຶ່ງ​ຂອງ​ຕະກຸນ​ຊູເຟ.