ເຢເຣມີຢາ 23:24 - ພຣະຄຳພີສັກສິ

²⁴ ພຣະເຈົ້າຢາເວ​ໄດ້​ກ່າວ​ວ່າ, “ບໍ່ມີ​ຜູ້ໃດ​ຫລົບລີ້​ຈາກ​ສາຍຕາ​ຂອງເຮົາ​ໄປ​ໄດ້. ພວກເຈົ້າ​ບໍ່​ຮູ້​ຫລື​ວ່າ ເຮົາ​ຢູ່​ທຸກໆ​ບ່ອນ​ທັງ​ໃນ​ສະຫວັນ ແລະ​ທີ່​ແຜ່ນດິນ​ໂລກ?” ພຣະເຈົ້າຢາເວ​ກ່າວ​ດັ່ງນັ້ນແຫຼະ.

ເຢເຣມີຢາ 23:24 Jak'a apnaqawi uñst'ayäwi

ປະຖົມມະການ 16:13

ນາງ​ຮາກາ​ຈຶ່ງ​ຖາມ​ຕົນເອງ​ວ່າ, “ຂ້ອຍ​ໄດ້​ເຫັນ​ພຣະເຈົ້າ ແລະ​ມີ​ຊີວິດ​ຢູ່​ເພື່ອ​ເວົ້າ​ເຖິງ​ເລື່ອງ​ນີ້​ແທ້​ບໍ?” ດັ່ງນັ້ນ ນາງ​ຈຶ່ງ​ເອີ້ນ​ພຣະເຈົ້າຢາເວ​ຜູ້​ທີ່​ໄດ້​ກ່າວ​ແກ່​ນາງ​ວ່າ, “ພຣະເຈົ້າ​ຜູ້​ເຫັນ​ໄດ້.”

1 ກະສັດ 8:27

ໂອ​ພຣະເຈົ້າ​ເອີຍ ແຕ່​ພຣະອົງ​ຢາກ​ຢູ່​ໃນ​ແຜ່ນດິນ​ໂລກ​ນີ້​ແທ້​ບໍ? ແມ່ນແຕ່​ຟ້າ​ສະຫວັນ​ທັງໝົດ​ກໍ​ບໍ່​ໃຫຍ່​ພໍ​ທີ່​ຈະ​ຮັບ​ພຣະອົງ​ໄດ້ ແລ້ວ​ພຣະວິຫານ​ທີ່​ຂ້ານ້ອຍ​ສ້າງ​ນີ້​ຈະ​ໃຫຍ່​ພຽງພໍ​ສຳລັບ​ພຣະອົງ​ໄດ້​ຢ່າງໃດ?

2 ຂ່າວຄາວ 2:6

ແຕ່​ທີ່​ຈິງ​ແລ້ວ ບໍ່ມີ​ຜູ້ໃດ​ສ້າງ​ວິຫານ​ອັນ​ໃຫຍ່ໂຕ​ສຳລັບ​ພຣະອົງ​ໄດ້ ເພາະ​ແມ່ນແຕ່​ສະຫວັນ​ແລະ​ສະຫວັນ​ທີ່​ສູງສຸດ​ກໍ​ຮອງຮັບ​ພຣະອົງ​ບໍ່ໄດ້. ຂ້າພະເຈົ້າ​ຈະ​ສ້າງ​ພຣະວິຫານ​ໃຫ້​ພຣະອົງ​ໄດ້​ຢ່າງໃດ ນອກຈາກ​ຈະ​ສ້າງ​ບ່ອນ​ເຜົາ​ເຄື່ອງຫອມ​ຖວາຍ​ແກ່​ພຣະອົງ​ເທົ່ານັ້ນ.

2 ຂ່າວຄາວ 6:18

ແຕ່​ພຣະເຈົ້າ​ເອີຍ ພຣະອົງ​ສະຖິດ​ຢູ່​ເທິງ​ແຜ່ນດິນ​ໂລກ​ທ່າມກາງ​ມະນຸດ​ໄດ້​ແທ້​ບໍ? ແມ່ນແຕ່​ສະຫວັນ​ແລະ​ສະຫວັນ​ທີ່​ສູງສຸດ​ກໍ​ບໍ່​ໃຫຍ່​ພໍ​ທີ່​ຈະ​ຮັບ​ພຣະອົງ​ໄດ້; ສະນັ້ນ ວິຫານ​ທີ່​ຂ້ານ້ອຍ​ໄດ້​ສ້າງ​ນີ້​ຈະ​ໃຫຍ່​ພໍ​ສຳລັບ​ພຣະອົງ​ໄດ້​ຢ່າງໃດ?

ພຣະທຳ​ໂຢບ 34:21

ທີ່ຈິງ ພຣະອົງ​ເຝົ້າເບິ່ງ​ການກະທຳ​ຂອງ​ທຸກຄົນ ຂີດໝາຍ​ການ​ເດີນ​ໄປ​ຂອງ​ມະນຸດ​ທຸກ​ບາດກ້າວ.

ພຣະທຳ​ໂຢບ 34:22

ບໍ່ມີ​ຄວາມມືດ​ອັນໃດ​ທີ່​ຈະ​ມືດໜາ​ຫລາຍ ພໍ​ທີ່​ຈະ​ປິດບັງ​ຄົນ​ບາບໜາ​ຈາກ​ພຣະເຈົ້າ​ໄວ້​ໄດ້.

ເພງ^ສັນລະເສີນ 10:11

ຄົນຊົ່ວຮ້າຍ​ໄດ້​ຄິດ​ໃນໃຈ​ວ່າ, “ພຣະເຈົ້າ​ລືມ​ແລ້ວ ພຣະອົງ​ປິດຕາ​ຂອງ​ພຣະອົງ​ໄວ້ ແລະ​ກໍ​ຈະ​ບໍ່​ເຫັນ​ເລີຍ.”

ເພງ^ສັນລະເສີນ 139:7

ຂ້ານ້ອຍ​ຈະ​ປົບໜີ​ຈາກ​ພຣະອົງ​ໄປ​ທາງ​ໃດ? ຈະ​ໜີໄປ​ໃສ​ເພື່ອ​ຫລີກ​ຈາກ​ສາຍ​ຕາ​ຂອງ​ພຣະອົງ​ໄດ້?

ເພງ^ສັນລະເສີນ 139:8

ຖ້າ​ຂຶ້ນ​ໄປ​ທີ່​ຟ້າ​ສະຫວັນ ພຣະອົງ​ກໍ​ຢູ່​ທີ່ນັ້ນ​ແລ້ວເດ ຖ້າ​ລົງ​ໄປ​ໃນ​ພິພົບ​ຄົນຕາຍ ພຣະອົງ​ກໍ​ຢູ່​ທີ່ນັ້ນ​ດ້ວຍ.

ເພງ^ສັນລະເສີນ 148:13

ຂໍ​ໃຫ້​ສິ່ງ​ທັງໝົດ​ເຫຼົ່ານີ້ ຈົ່ງ​ຍ້ອງຍໍ​ສັນລະເສີນ​ພຣະນາມ​ຂອງ​ພຣະເຈົ້າຢາເວ ເພາະ​ພຣະນາມ​ຂອງ​ພຣະອົງ​ຍິ່ງໃຫຍ່​ກວ່າ​ນາມ​ໃດໆ​ທັງສິ້ນ. ສະຫງ່າຣາສີ​ຂອງ​ພຣະອົງ​ສູງສົ່ງ​ເໜືອ​ແຜ່ນດິນ​ໂລກ ແລະ​ທັງ​ຢູ່​ເໜືອ​ຟ້າ​ສະຫວັນ.

ເພງ^ສັນລະເສີນ 90:8

ພຣະອົງ​ເປີດເຜີຍ​ການບາບ​ຂອງ​ພວກ​ຂ້ານ້ອຍ​ຕໍ່ໜ້າ​ພຣະອົງ ຄື​ການບາບ​ອັນ​ລັບລີ້​ຊຶ່ງ​ພຣະອົງ​ເຫັນ​ໄດ້.

ສຸພາສິດ 15:3

ທຸກ​ເຫດການ​ທີ່​ເກີດຂຶ້ນ​ພຣະເຈົ້າຢາເວ​ຮູ້ເຫັນ ພຣະອົງ​ເປັນ​ຜູ້​ເຝົ້າເບິ່ງ​ທັງ​ຄົນດີ​ແລະ​ຄົນຊົ່ວ​ດ້ວຍ.

ເອຊາຢາ 29:15

ເຄາະກຳ​ເປັນ​ຂອງ​ພວກເຈົ້າ​ສາ​ແລ້ວ ພວກ​ທີ່​ຊອກ​ປິດບັງ​ແຜນການ​ຂອງ​ພວກຕົນ​ໄວ້​ຈາກ​ພຣະເຈົ້າຢາເວ. ພວກເຂົາ​ເຮັດ​ຕາມ​ແຜນການ​ຂອງຕົນເອງ​ໃນ​ທີ່​ລັບລີ້ ແລະ​ຄິດ​ວ່າ​ບໍ່ມີ​ຜູ້ໃດ​ຮູ້​ເຫັນ​ພວກຕົນ​ກຳລັງ​ເຮັດ​ຢູ່.

ເອຊາຢາ 57:15

ເຮົາ​ເປັນ​ພຣະເຈົ້າ​ອົງ​ສູງສຸດ, ອົງ​ບໍຣິສຸດ, ແລະ​ອົງ​ຊົງ​ຊີວິດ​ຢູ່​ຕະຫລອດໄປ. ເຮົາ​ຢູ່​ໃນ​ສະຖານທີ່​ສູງສຸດ​ແລະ​ບໍຣິສຸດ; ແຕ່​ເຮົາ​ຢູ່​ນຳ​ປະຊາຊົນ​ຜູ້​ທີ່​ຖ່ອມໃຈ​ແລະ​ຜູ້​ທີ່​ກັບໃຈໃໝ່ ເພື່ອ​ວ່າ​ເຮົາ​ຈະ​ໄດ້​ຟື້ນຟູ​ຈິດວິນຍານ ແລະ​ຄວາມຫວັງ​ຂອງ​ພວກເຂົາ​ຂຶ້ນ​ໃໝ່.

ເອຊາຢາ 66:1

ພຣະເຈົ້າຢາເວ​ກ່າວ​ວ່າ, “ສະຫວັນ​ເປັນ​ບັນລັງ​ຂອງເຮົາ ແລະ​ແຜ່ນດິນ​ໂລກ​ເປັນ​ທີ່​ຮອງ​ຕີນ​ຂອງເຮົາ. ແລ້ວ​ພວກເຈົ້າ​ຈະ​ສ້າງ​ຫໍໂຮງ​ຊະນິດ​ໃດ​ສຳລັບ​ເຮົາ ຈະ​ສ້າງ​ວັງ​ຊະນິດ​ໃດ​ໃຫ້​ເຮົາ​ຢູ່?

ເຢເຣມີຢາ 16:17

ເຮົາ​ເຫັນ​ທຸກໆ​ສິ່ງ​ທີ່​ພວກເຂົາ​ເຮັດ. ບໍ່ມີ​ສິ່ງໃດ​ປິດບັງ​ຈາກ​ເຮົາ​ໄປ​ໄດ້. ບາບ​ຂອງ​ພວກເຂົາ​ຫລົບຫລີກ​ຈາກ​ສາຍຕາ​ຂອງເຮົາ​ບໍ່ໄດ້​ດອກ.

ເຢເຣມີຢາ 32:19

ພຣະອົງ​ວາງແຜນ​ໄດ້​ດີເລີດ ແລະ​ເຮັດ​ສິ່ງ​ຕ່າງໆ​ດ້ວຍ​ຣິດອຳນາດ. ພຣະອົງ​ເຫັນ​ທຸກໆສິ່ງ​ທີ່​ມະນຸດ​ເຮັດ ແລະ​ພຣະອົງ​ໃຫ້​ບຳເໜັດ​ຕາມ​ການກະທຳ​ຂອງ​ພວກເຂົາ.

ເຢເຣມີຢາ 49:10

ແຕ່​ເຮົາ ໄດ້​ປຸ້ນ​ເອົາ​ນຳ​ເຊື້ອສາຍ​ຂອງ​ເອຊາວ​ຈົນ​ໝົດກ້ຽງ ພ້ອມທັງ​ໄດ້​ເປີດເຜີຍ​ບ່ອນ​ທີ່​ພວກເຂົາ​ຫລົບລີ້ ເພື່ອ​ວ່າ​ພວກເຂົາ​ຈະ​ຫລົບລີ້​ບໍ່ໄດ້​ອີກ​ຕໍ່ໄປ. ປະຊາຊົນ​ເອໂດມ​ທັງໝົດ​ຖືກ​ທຳລາຍ​ແລ້ວ. ບໍ່ມີ​ຜູ້ໜຶ່ງ​ຜູ້ໃດ​ໃນ​ພວກເຂົາ​ເຫຼືອ​ຢູ່​ເລີຍ.

ເອເຊກຽນ 8:12

ພຣະອົງ​ຈຶ່ງ​ຖາມ​ຂ້າພະເຈົ້າ​ວ່າ, “ມະນຸດ​ເອີຍ ເຈົ້າ​ເຫັນ​ບໍ ສິ່ງ​ທີ່​ບັນດາ​ຜູ້ນຳ​ຂອງ​ຊາດ​ອິດສະຣາເອນ​ກຳລັງ​ເຮັດ​ຢູ່​ຢ່າງ​ລັບລີ້​ນັ້ນ? ແຕ່ລະຄົນ​ກໍ​ມີ​ບ່ອນ​ຂາບໄຫວ້​ຮູບເຄົາຣົບ​ຂອງຕົນ. ການ​ແກ້ຕົວ​ຂອງ​ພວກເຂົາ​ຄື: ‘ພຣະເຈົ້າຢາເວ​ບໍ່​ເຫັນ​ພວກເຮົາ​ດອກ ພຣະເຈົ້າຢາເວ​ໄດ້​ປະຖິ້ມ​ປະເທດ​ຂອງເຮົາ​ສາ​ແລ້ວ.”’

ເອເຊກຽນ 9:9

ແລ້ວ​ພຣະອົງ​ກໍ​ຕອບ​ວ່າ, “ປະຊາຊົນ​ອິດສະຣາເອນ ແລະ​ຢູດາ​ໄດ້​ເຮັດ​ຜິດ ເພາະ​ການບາບ​ອັນ​ຮ້າຍແຮງ. ພວກເຂົາ​ໄດ້​ຂ້າ​ຄົນ​ທົ່ວ​ທັງ​ດິນແດນ ແລະ​ເຮັດ​ໃຫ້​ນະຄອນ​ເຢຣູຊາເລັມ​ເຕັມ​ໄປ​ດ້ວຍ​ຄາດຕະກອນ. ພວກເຂົາ​ເວົ້າ​ວ່າ ‘ພຣະເຈົ້າຢາເວ​ໄດ້​ປະຖິ້ມ​ປະເທດ​ຂອງ​ພວກເຮົາ ພຣະເຈົ້າຢາເວ​ບໍ່​ຮູ້​ເຫັນ​ສິ່ງໃດ.’

ດານີເອນ 2:22

ພຣະອົງ​ເປີດເຜີຍ​ສິ່ງ​ເລິກລັບ​ທັງຫລາຍ ຮູ້​ທຸກຢ່າງ​ທຸກ​ແນວ​ທີ່​ຖືກ​ປິດບັງ​ໄວ້ ແມ່ນແຕ່​ສິ່ງ​ນີ້​ຖືກ​ປິດບັງ​ໄວ້​ໃນ​ທີ່ມືດ​ກໍຕາມ ແສງ​ແຈ້ງໃສ​ກໍ​ອ້ອມຮອບ​ພຣະອົງ​ໄວ້ທຸກ​ດ້ານ.

ດານີເອນ 4:35

ພຣະອົງ​ຖື​ວ່າ​ຄົນ​ໃນ​ໂລກນີ້​ບໍ່ມີ​ຫຍັງ​ໝົດ ຕ່າງ​ກໍ​ບໍ່ມີ​ຄຸນຄ່າ​ບໍ່ມີ​ຫຍັງ​ທັງນັ້ນ; ມະນຸດ​ໃນໂລກ ແລະ​ເທວະດາ​ເທິງ​ສະຫວັນ ກໍ​ຢູ່​ໃຕ້​ການປົກຄອງ​ຂອງ​ພຣະອົງ​ທັງນັ້ນ. ບໍ່ມີ​ຜູ້ໃດ​ສາມາດ​ຂັດຂວາງ​ພຣະປະສົງ ຫລື​ສອບຖາມ​ເຖິງ​ສິ່ງ​ທີ່​ພຣະອົງ​ຊົງ​ກະທຳ.

ເອເຟໂຊ 1:23

ຊຶ່ງ​ເປັນ​ພຣະກາຍ​ຂອງ​ພຣະອົງ ຊຶ່ງ​ເຕັມ​ບໍຣິບູນ​ດ້ວຍ​ພຣະອົງ ຜູ້​ຊົງ​ເຕັມ​ໃນ​ທຸກຫົນ​ທຸກແຫ່ງ​ທົ່ວ​ສັບພະທຸກສິ່ງ.

ເຮັບເຣີ 4:13

ແລະ​ໃນ​ທຸກສິ່ງ​ທີ່​ໄດ້​ຖືກ​ສ້າງ​ຂຶ້ນ​ນັ້ນ ບໍ່ມີ​ສິ່ງໃດ​ຖືກ​ບັງລັບ​ໄວ້​ຈາກ​ພຣະພັກ​ພຣະອົງ​ໄດ້ ແຕ່​ທຸກສິ່ງ​ໄດ້​ປາກົດ​ແຈ້ງ​ຕໍ່​ສາຍຕາ​ຂອງ​ພຣະອົງ ຜູ້​ທີ່​ເຮົາ​ຈະ​ຕ້ອງ​ໃຫ້​ການ​ນັ້ນ.