Juan 4 - Qullan Arunaca

Jesusampi Samarianquir warmimpi

¹ Fariseonacajj yatipjjänwa Jesusajj walja arquirinïtapa, uqhamarac Bautisir Juanat sipansa juc'amp bautisatapa,

² chekpachansa Jesusajj janiw bautiscänti, jan ucasti discipulonacapaw bautisäna.

³ Uc yatisinjja Jesusajj Judeat Galilearuw cuttawayjjäna.

⁴ Saräwipansti Samaria cheka pasañapänwa.

⁵ Samaria chek pascasinjja Sicar sat marcaruw puri, Jacobojj José yokaparu herencia orake churcatayna uca chekaru.

⁶ Ucawjanwa utjäna uma phuju, Jacobon phujupa sata. Jesusajj thac jutcäwin karjatänwa, ucatsti Jacobon phujupjjaruw kont'asi. Ucqhasti niya chica uru horasänwa.

⁷ Ucancquipansti Samarianquir mä warmiwa uca phujuru purini um apsusiñataqui. Jesusasti warmirojj sänwa: —Um wajjt'ita —sasa.

⁸ Discipulonacapasti ucchañcamajj mank'añ aliriw sarapjjatayna.

⁹ Samarianquir warmisti Jesusarojj saraquïnwa: —¿Cunatsa jumajj judiöcasina um mayista naya samaritänarusti? (Samaritanonacajj judionacampejj janiw walincapcänti.)

¹⁰ Ucjjarusti Jesusajj saraquïnwa: —Cuntejj Diosajj churqui uctejj yatismajja, uqhamarac qhititejj um mayctam uc yatiraquisma ucajja, jumaw nayarojj um mayitasmajja, nayasti jacquir umwa churaraquirisma —sasa.

¹¹ Warmisti Jesusarojj saraquïnwa: —Tata, janiw cunamp um apsuñamas utjquiti, phujusa wali mankheraquiwa. ¿Cunjämatsa jacquir um churitasma?

¹² Nanacan nayra Jacob awquejjaw aca phojjja jaytawayapjjetu; aca pachpa phujutwa jupajj umäna, uca pachparaqui wawanacapasa, uywanacapasa. ¿Jumasti jupat sipansa juc'ampïsmati? —sasa.

¹³ Jesusasti saraquïnwa: —Qhitinacatejj aca umat umapqui ucanacajj wasitampis pharjayasiscaquiniwa.

¹⁴ Ucampis qhititejj naya churcta uca umat umcani ucajja, janiw mayampis pharjayascjjaniti. Cawquïr umtejj nayajj churcta ucajja jupa pachpanwa jalsuni wiñay jacañ churañataqui.

¹⁵ Ucjjarusti warmejj saraquïnwa: —Tata, uca umay churita, jan mayampis pharjayasiñajjataqui, ni aca phujuru wasitat um apsur jutascañajjataquisa —sasa.

¹⁶ Jesusasti saraquïnwa: —Saram, chachamar jawsanim, ucatsti acar jutam —sasa.

¹⁷ Warmisti saraquïnwa: —Janiw chachanïcti —sasa. Jesusasti ucjjarojj saraquïnwa: —Chekacwa sasctajja: ‘Janiw chachanïcti’ sasajja.

¹⁸ Ucampis jumanjj pheska chachaw utjäna, jichha utjctam ucasa janiw chachamäquiti. Uca arsutamajj chekaquïsquiwa.

¹⁹ Uc ist'asinjja warmejj sänwa: —Tata, amuyatajjatjja mä profetjamaquïtawa.

²⁰ Nayra samaritano awquinacajjajj acana, aca kollunwa Diosar yupaychapjjerïna, ucampis jumanac judionacajj sapjjtawa ‘Jerusalén marcawa yupaychañ chekajj’ —sasa.

²¹ Jesusasti saraquïnwa: —Warmi, ac siscsma ucajj chekawa, jan aca kollur ni Jerusalenar sarasin Diosar yupaychaña horasajj niyaw purinini.

²² Jumanac samaritanonacajj yupaychapjjtaw jan yatisina, ucampis nanacajj yatipjjtwa yupaychatanacajj-jja; khespiyasiñasti judionacatwa juti.

²³ Ucampis horasajj puriniwa, anchhichhawa, Awquiru chekpach yupaychirinacajj Ajayun, uqhamarac cheka cancañampin yupaychapjjani. Awquejj uqhamwa yupaychayasiñ muni.

²⁴ Diosajj Ajayuwa, qhitinacatejj jupar yupaychapqui ucanacajja Ajayuna, uqhamarac cheka cancañampina yupaychapjjañapawa.

²⁵ Ucjjarusti warmejj saraquïnwa: —Nayajj yattwa Cristo sutini Mesiasan jutañapa; cunapachatejj jupajj jutcani ucqhawa take cun yatichistani —sasa.

²⁶ Jesusasti juparojj saraquïnwa: —Ucajj nayätwa, qhititejj jumamp parlqui uca.

²⁷ Uqhamäquïpanwa discipulonacapajj purinipjjäna. Jesusar mä warmimp parlquiri uñjasinjja muspharapjjewa. Ucampis janiw qhitis jisct'añataquejj ch'amanïcänti cuntejj uca warmimp parlcäna ucjja.

²⁸ Ucatsti uc ist'asinjja warmejj uma wayuñap jaytasinwa marcarojj jali, ucatsti jakenacaruw yatiyaraquïna:

²⁹ —Jutapjjam uñjiri, mä chachaw take luratanacajj khanañchitu. ¿Janit Cristöcpacha? —sasa.

³⁰ Ucatsti marcat mistusinjja sarapjjänwa cawqhanccäntejj Jesusajj ucqharu.

³¹ Ucchañcamasti discipulonacapajj Jesusaruw achict'apjjäna: —Yatichiri, mankt'asimaya —sasa.

³² Jesusasti sänwa: —Nayan mank'añajjajj utjiwa, jumanacajj janiw ucjja yatipctati —sasa.

³³ Discipulonacapasti uc ist'asinjja jupanac puraw jisct'asipjjäna: —¿Qhitich mank'a apanirappacha? —sasa.

³⁴ Jesusasti jupanacarojj saraquïnwa: —Nayan mank'ajjajj qhititejj qhitanquitu ucan munañapa, uqhamarac lurañapa phokhañajjawa.

³⁵ Jumanacajj sapjjtawa: ‘Pusi phajjsitwa yapu apthapiscañäni’ sasa, ucampis nayajj sapjjsmawa, uñtapjjam, yapunacajj niyaw pokoratäjje.

³⁶ Qhititejj apthapqui ucajja pagopjja catokewa, yapu apthapitapasti wiñay jacañataquiwa, uqhamat yapuchirimpi yapu apthapirimpi cusisipjjañapataqui.

³⁷ Aca säwisti chekawa: ‘Mayniwa sati, mayniraquiwa apthapi.’

³⁸ Nayajj qhitapjjsmaw jumanacaru jan satapctas ucat yapu apthapiri; mayninacaw ch'am tucupjje, jumanacasti uca irnakatanacapatwa apthapiwayapjjtajja —sasa.

³⁹ Waljaniwa Samaria marcanquirinacajj Jesusar iyawsapjjäna, warmin aqham arsutap laycu: “Take luratanacajj khanañchitu” sasa.

⁴⁰ Samarianquirinacajj jutasin Jesusarojj achict'apjjänwa jupanacamp kheparañapataqui. Jesusajj ucanjj payüruw kheparäna.

⁴¹ Waljaniw iyawsapjjaraquïna Jesusan arunacap ist'asinjja.

⁴² Ucatsti warmirojj sapjjänwa: —Jichhajj, janiw juman arsutamatacti iyawsapctjja, jan ucasti nanac pachpawa jupat ist'apjjtjja, yatipjjaractwa jupajj acapachan khespiyiri chekpach Cristötapa.

Jesusajj mä jilïrin wawapwa c'umaraptayi

⁴³ Payüru pasatatsti, Jesusajj Samariat mistusinjja Galilea tokeruw sarawayjjäna.

⁴⁴ Jesús pachparaquiw arsüna: “Mä profetajj janiw pachpa marcapanjj yäkatäquiti” sasa.

⁴⁵ Galilearu puripansti, ucanquirinacajj sumwa catokapjjäna, Jerusalenan Pascua fiestar sarasina cunanactejj lurcäna ucanac uñjapjjatap laycu.

⁴⁶ Jesusasti wasitampiwa Galileanquiri Caná sat chekaru purïna, cawquintejj umat vinor tucuycäna ucaru. Ucansti utjänwa reyin mä jach'a oficialapa, wawapasti Capernaum marcana usutäscänwa.

⁴⁷ Jesusan Judeat Galilearu puritap yatisinjja, oficialajj saränwa Jesusan ucaru achict'asiri, utapar sarasin wawap kollañapataqui. Wawapajj niya jiwirjamänwa.

⁴⁸ Jesusasti sänwa: —Janitejj milagronacsa ni unañchanacsa uñjapcasma ucajja janiw iyawsapcasmati —sasa.

⁴⁹ Oficialasti sascaquïnwa: —Tata, janc'aquiy jutam janïr wawajjajj jiwquipana —sasa.

⁵⁰ Ucatsti Jesusajj saraquïnwa: —Cuttjjam utamaru, wawamajj c'umaräjjewa —sasa. Jakesti iyawsänwa cuntejj Jesusajj siscäna uca, ucatsti sarawayjjänwa.

⁵¹ Janïr utapar purquipanwa uywatanacapajj jicjjatir mistupjjäna: —Wawamajj c'umaräjjewa —sasa.

⁵² Ucatsti uywatanacaruw jisct'äna cuna horasatsa wawapajj waliptatayna uca. Jupanacasti sapjjewa: —Wasür maya horasaw calenturapajj apaktjje —sasa.

⁵³ Awquisti amtasïnwa uca pachpa horasan Jesusajj “Wawamajj c'umaräjjewa” satapa; jupasti takpach familiapampiw Jesusar iyawsjjäna.

⁵⁴ Acampejj Jesusajj pä cutiw milagro lurjjäna, cunapachatejj Judeat Galilearu cutt'ancäna ucqhajja.