Juan 2 - Qullan Arunaca

Caná marcan mä casarasïwi

¹ Quimsüru pasatatsti mä casarasïwiw utjäna Caná marcana, Galilea tokena. Jesusan taycapajj ucancaraquïnwa,

² Jesusasti discipulonacapamp cuna uca casarasïwiru jawsayataraquïnwa.

³ Vino tucusjjepansti Jesusan taycapajj juparojj sänwa: —Janiw vinopajj utjcjjeti —sasa.

⁴ Ucampis Jesusajj taycaparojj sänwa: —Warmi, ¿cunatsa nayarojj uc sista? Janïraw horasajjajj purinquiti —sasa.

⁵ Ucampis Mariajj sirvirinacarojja sänwa: —Cuntejj sapcätam jupajj uc lurapjjam —sasa.

⁶ Sojjta wacullanacaw kalat lurata utjäna, judionacan cultonacapan k'omachasïwinacaparjama. Sapa wacullarojj mä quimsakallk tunca, jan ucajj patac litrjamaw umajj mantäna.

⁷ Jesusajj sirvirinacarojj sänwa: —Aca wacullanacaru umampi phokharayapjjam —sasa. Jupanacasti phokharayapjjänwa.

⁸ Ucjjarusti Jesusajj saraquïnwa: —Jichhasti apsupjjam mä juq'ita, ucatsti casarasïwi sarayirin ucaru apapjjam —sasa. Jupanacasti apapjjänwa.

⁹ Casarasïwi sarayiristi umjj mallt'änwa, umasti vinoruw tucjjatayna. Janiraquiw cawquit jutataps yatcänti, ucampis sirvirinacapajj sumwa yatipjjäna um apsunipjjatapa. Casarasïwi sarayiristi, casarasiri waynaruw jawsayäna.

¹⁰ Ucatsti saraquïnwa: —Takeniw nayrakat suma vino sirviñ yatipjje, cunapachatejj jawsatanacajj vino umsjjapjje, ucjjaruw jan suma vinöc ucjja umapjje. Ucampis jumajj jichhacamaw suma vinjja imatätajja —sasa.

¹¹ Acjja Jesusajj luränwa Caná sat marcana, Galilea ucsana. Aca milagrojj nayrïr milagrönwa. Uca luräwimpisti ch'amap uñacht'ayäna, yatekerinacapasti juparojj iyawsapjjaraquïnwa.

¹² Acanac pasjjepansti Jesusajj sarawayjjänwa Capernaum sat marcaru, taycapampi, jilanacapampi, discipulonacapamp cuna; uca marcanjja mä kawkha uruw kamarapjjäna.

Jesusajj templo k'omachi

¹³ Judionacan Pascua fiestapajj niya jac'äjjatap laycojja, Jesusajj Jerusalén marcaruw sarawayjjäna.

¹⁴ Templo mankhansti jicjjatänwa vacanaca, ovejanaca, palomanaca aljiri, uqhamarac kollke troquirinacsa.

¹⁵ Uc uñjasinjja, Jesusajj mä chicot waquicht'asisina, takeniruw templot alissüna ovejanacapamp vacanacapamp chica. Kollke troquirinacan kollkenacaps pamparuw willtaraquïna, uqhamarac mesanacaps jakonucuraquïna.

¹⁶ Palomanac aljirinacarusti saraquïnwa: —¡Acat ucanac apsupjjam! Awquejjan utapjja jan mä khathur uñtat tucuyapjjamti —sasa.

¹⁷ Discipulonacapajj uc ist'asinjja amtapjjänwa Kellkatan aqham siri: “Utamar munañaw tucuntitu” —sasa.

¹⁸ Uca pasatatsti judionacajj jisct'apjjänwa: —¿Cuna munañampitï acanac lurcta ucatjja uñachayapjjetasmati? —sasa.

¹⁹ Jesusasti saraquïnwa: —T'unthapipjjam aca templo, nayasti quimsürunwa machakat sayt'ayä —sasa.

²⁰ Judionacasti ucjjarojj sapjjaraquïnwa: —Pusi tunca sojjtan maranwa aca templo lurañjj tucuyapjje, ¿jumasti quimsürun sayt'ayasmati? —sasa.

²¹ Ucampis cawquïr templottejj Jesusajj parlcäna ucajja, jupan janchipänwa.

²² Ucatwa, cunapachatejj Jesusajj jiwatat jactjjän ucqhaw discipulonacapajj amtapjjäna aca arsutapa, Kellkatarus “chekaw” sapjjaraquïnwa, uqhamarac Jesusan arsutanacaparusa.

Jesusajj takeniruw uñt'i

²³ Cunapachatejj Jesusajj Jerusalén marcanccäna Pascua fiestanjja, waljaniw jupar iyawsapjjäna milagronac luratap laycu.

²⁴ Ucampis Jesusajj janiw jupanacar alcatascänti, jupajj takeniru uñt'atap laycu.

²⁵ Jaker uñt'añataquejj janiw qhitin yatiyatäñasa waquiscänti, jan ucasti jupa pachpawa yatïna jaken chuymapa.