2 Samuel 3 - Qullan Arunaca

¹ Saúl reyin jakenacapampi, Davidan jakenacapampisti mä kawkha maranacaw guerran nuwasipjjäna, ucampisa Davidan jakenacapajj juc'at juc'atwa ch'amani tucupjjäna, Saúl reyin jakenacapasti juc'at juc'ataracwa thayjtapjjaraquïna.

Davidan familiapa

² Davidan wawanacapasti, cunapachatejj jupajj Hebronan jaccäna ucanacasti acanacänwa: Amnón, ucasti jilïri wawänwa, Jezreelanquiri Ahinoam warmin wawaparaqui;

³ ucjjarusti Quileab sataraquïnwa, ucasti Carmel token utjiri Nabal jaken ijmapa, Abigail warmin wawaparaquïnwa; ucjjaru, quimsïri wawapasti Absalón sataraquïnwa, Maaca warmin wawapa, uca warmisti Talmai jaken phuchapänwa, jupasti Gesur marcan reyiparaquïnwa.

⁴ Pusïri yokapasti Adonías sataraquïnwa, Haguit warmin wawaparaqui. Pheskëri yokapasti Sefatías sataraquïnwa, Abital warmin wawaparaqui.

⁵ Sojjtïri yokapasti Itream sataraquïnwa, Egla warmin wawaparaqui, jupasti Davidan yakha warmiparaquïnwa. Acanacasti Davidajj Hebronan jaccäna ucapachaw nacipjjaraquïna.

Abner chachajj Davidampiw mayacht'asi

⁶ Saúl reyin jakenacapampi, Davidan jakenacapampisti nuwasiscaquïnwa, ucampisa Abner chachajj Saúl reyin utapanjja juc'ampi munañaniw tucüna.

⁷ Saúl reyisti mä warmimpiw sarnakaraquïna, ucasti Rizpa satänwa, Aja jaken phuchapa, Abnerasti uca warmimpiw sarnakjjaraquitayna. Ucatwa Is-boset chachajj Abnerarojj saraquïna: —¿Cunatsa awquejjan uñt'atapampi iquintta? —sasa.

⁸ Abner chachasti Is-boset jaken uqham satapampejja wali colerasïna ucat saraquïna: —¿Nayasti anütti, alekaqui mä anjama aca Judá marcan sirviñataquejja? Nayajj Saúl awquiman utapanjja take chuymaw take cuns lurta, uqhamaraqui amigonacaparusa, familianacaparusa, jumarusti janiraquiw Davidan amparaparu catuycsmati. ¿Ucatti jichhajj jumajj mä warmimpi jucha luratajjat juchañchitäta?

⁹ ¡Tatitusti nayarojj wali mutuyitpan, janitejj Davidampi phokä, cuntejj Tatitojj arsuwayqui ucanacampejja!

¹⁰ ¡Saúl reyirusti tronopjja apakaraquïwa, Davidaruraquiw Israeljjaru, uqhamaraqui Judá orakjjaru reyit utt'ayaraquï, Dan sisqui uca chekata, Beerseba sisqui uca chekcama! —sasa.

¹¹ Is-boset jakesti ucjjarojj janiw juc'ampi arscjjänti ni mä arumpsa, ajjsararaquïnwa.

¹² Abnerasti mayni qhitanacwa Davidan ucaru qhitäna aqham sañapataqui: “¿Qhitinquis aca marcajja? Mä arust'äwi lurañäni, nayasti kawkhtejj puedcä ucwa lurä take Israel marcajj jumampi sayt'asiñapataqui” sasa.

¹³ Davidasti ucjjarojj saraquïnwa: “Jumampi mä arust'äwir mantañataquejj iyawsaquïmawa, ucampisa mä amtäwimpi: Cunapachatejj nayar uñstiri jutcät ucapachajja, Saúl reyin Mical phuchapjja irpanipunim, jan irpancäta ucapachasti antesas jan uñstcjjestati” —sasa.

¹⁴ Uqhamarusa Davidajj Is-boset jaken ucarojj mayni qhitanaca qhitaraquïnwa aqham sasa: “Mical warmi catuyita, jupajj warmejjawa, jupampisti filisteonacan chhojjorasiñanacapat pataca lip'ichinac apanisaw casarasta” sasa.

¹⁵ Uqhamasti Is-boset jakejj Paltiel jaket irparanipjjañapataquiw qhitäna, uca Paltiel jakesti Lais jaken yokapänwa, Mical warmin chachaparaqui.

¹⁶ Ucampisa Paltiel jakejj khepapatwa jacht'asisa arcäna, Bahurim sisqui ucacamaw arcaraquïna. Ucanwa Abnerajj Paltiel jakerojj cuttanjjañapataqui saraquïna, jupasti cuttanjjaraquïnwa.

¹⁷ Uca khepatsti Abner chachajj Israelanquir jilïri jakenacampiw parlaraquïna, aqham sasa: “Niya mä kawkha maranacaraquiw jumanacajj sarnakapjjta, Davidajj jumanacan reyimäñama munasina.

¹⁸ Jichhajj waliquiwa, horasasti purinjjaraquiwa, Tatitusti Davidarojj arsuraquïnwa, Israel marcaparojj jupa toke filisteonacata, uqhamaraqui take uñisirinacapan amparapat khespiyaña” sasa.

¹⁹ Abnerasti Benjamín tribunquir jakenacampejj parlaraquïnwa, ucatsti Hebronaruw sararaqui Davidar yatiyañataqui cuntejj Israel jakenacajj amtcatayna take ucanaca, uqhamaraqui Benjamín tribunquir jakenacas amtcatayna ucanacsa.

²⁰ Pä tunca jakempiw Hebronarojj purinïna, cawqhanccäntejj Davidajj uca chekaru, Davidasti jupataquejja, uqhamaraqui jupampi chica sarcän uca jakenacataquisa mä jach'a mank'äwi waquicharaquïna.

²¹ Abnerasti Davidarojj saraquïnwa: —Jichhajj sarjjañajjawa take Israel jakenacaru tantacht'añataqui, ucat juma jach'a reyimpi mä arust'äwi lurañapataqui, uqhamat juma jach'a reyejj cunjämarutejj muncta uqhamaru apnakañamataqui —sasa. Davidasti Abnerarojj mä sumwa qhitanuct'jjäna, ucat Abnerajj c'uchiquiraquiw sarjjäna.

Joab jakejj Abneraruw jiwayi

²² Joab chachampi Davidan arquirinacapampisti uca horasaw purinisipcaraquïna pampa toketa, cuntejj uñisirinacapat aparanipcatayna ucanacsti waljpunwa apanipjjatayna. Abnerasti janiraquiw Davidampi chica Hebronancjjänti, jan ucasti jupajj c'uchiquiw sarjjatayna Davidan qhitanucutajja.

²³ Joab chachasti take ejercitopampi purinisasti, yatiyapjjaraquïnwa Ner jaken yokapa Abnerajj reyimpi jiquisitapa, ucatsti sarjjataparaqui reyin qhitanucutajja.

²⁴ Ucanac ist'asinsti Joab jakejj reyir uñjiriw saräna, ucat saraquïnwa: “Jach'a rey, ¿cunarac jumasti lurtasti? Abnerajj jach'a reyiru uñjiriraquis jutataynajjä, ucatsti jach'a reyejj qhitanucjjaquiraquitaynasä.

²⁵ ¿Jach'a reyisti janit yatqui, Ner jaken Abner yokapajj reyir sallkjiri, uqhamaraqui uñakeri jutatapsti, uqhamaraqui take cuntejj jach'a reyejj lurqui take ucanaca?” sasa.

²⁶ Joab jakesti Davidampi parlaña tucuyjjasin mistunjjatapatsti, mayni qhitanacwa qhitäna Abner jakeru thakhanipjjañapataqui, jan Davidar yatiyasa, uca qhitanacasti Sira sisqui uca uma phuch'u chekatwa cutt'ayanipjjäna.

²⁷ Cunapachatejj Abnerajj Hebronar purinïna ucqhasti, Joab jakejj marcat mistuña puncut qhursa tokeruw irpäna, jupa sapampiqui parlañataqui, ucanwa puracat chhokhontasin jiwayäna, Asael jilaparu jiwayatapat phoksusisa.

²⁸ Uca khepatsti, cunapachatejj Davidajj ucanac yatïna ucapachasti sänwa: “Nayampi reinojjampisti, Tatitu nayrakatanjja janiw cuna juchanïpctsa, Ner jaken Abner yokapan jiwatapatjja.

²⁹ Take juchasti Joab jaken p'ekepjjaru puriscpan, uqhamaraqui take familiapjjarusa, utapansti utjaquipunpan maynisa wila apa usunejja, lepra usunisa, jan ucajj cojosa, jan ucasa jaken jiwayatasa, mank'ata pist'ayasiñasa” sasa.

³⁰ Joab, uqhamaraqui Abisai jakempisti Abnerarojj jiwayapjjänwa guerrana, Abnerajj uca paninin jilaparu Gabaón chekan jiwayatap laycu.

³¹ Ucatsti Davidajj Joab jakempiru uqhamaraqui qhitinacatejj jupampi chekäpcäna ucanacarusti saraquïnwa: “Jichhajj isinacam ch'iyarasipjjam, ucatsti chhanqha isinacampi isthapisipjjaraquim, Abneran jiwatapatsti lutt'asipjjaraquim” sasa. David reyisti, Abnerar imañataqui callasipcäna uca khepäjjwa sararaquïna.

³² Ucatsti Abnerarojj Hebronaruw imjjapjjäna. Ucanwa reyejj wali jach'at wararisa jachäna, Abneran sepulturap jac'ana, take jakenacasa uca quipcaraquiw jachapjjäna.

³³ Ucat reyejj aca jachcañ k'ochu Abneratjamajj k'ocht'asi: “Abner, ¿cunatarac jumasti uqham jiwta, mä jan wali ñankha jakëcasmasa uqhama?

³⁴ Amparanacamasa janejjay chinuntatäcchïntejja, cayunacamas janiraquejjay cadenampi ñach'antatäcchïntejja. ¡Qhitinacatejj jan wali jakenacan amparapan jiwapjje, uqhamaw jiwawaytajja!” sasa. Jakenacasti Abneratjamajj wali jachasipcaquïnwa.

³⁵ Ucatsti Davidan ucaruw sarapjjäna, mankt'asiñapataquiw achict'apjjaraquïna, janïra jayp'untquipana, ucampisa Davidajj juramentompiw arsüna aqham sasa: “¡Diosasti nayarojj wali mutuyitpan, nayatejj t'ant'sa jan ucajj mä cunsa janïra inti jalantquipana mallt'ä ucapachajja!” sasa.

³⁶ Davidan arunacaparusti takeniw sum amuyapjjäna, ucatsti waliquiwa sapjjaraquïnwa, take cuntejj reyejj lurcän ucanacasti jakenacataquejj waliquipunïnwa.

³⁷ Uca urusti israelit jakenacajj sumwa amuyjjapjjäna, Davidajj jan cuna luratapas utjcänti Ner jaken Abner yokapan jiwatapampejja.

³⁸ Ucat reyejj janc'aquiw jilïrinacaparojj saraquïna: “Cunjämatejj jumanacajj jichhajj yatipjjta, jichhürojj Israel marcan mä jach'a jilïri jakew jiwi.

³⁹ Ucatwa nayajj Diosan ajllita reyïcasinsa, wali ajjsarañajjaw utjitu uqham sinti jan wali Sarvia jaken yokanacapan luratanacapatjja. ¡Jichhajj Tatitojj churpan cunatejj waquisqui uca, qhititejj aca jan wali lurqui ucarojja!” sasa.