2 Juan 1 - Qullan Arunaca

Chekampita munasiñampita

¹ Naya niya wali chuymanëjjasawa, Diosan ajllit cullacar aca cartjja kellkta, uqhamarac wawanacaparus, qhitinacarutejj nayajj chekpachana munasta, ucanacaru ucampis janiw naya sapaquiti munasctjja, jan ucasti take qhitinacatejj Diosar uñt'apqui ucanacas munasiraquiwa.

² Munasipjjsmawa jumanacaru, cheka cancañajj chuymanacasan utjatap laycu, ucasti wiñayataquiw jiwasampiraquïni.

³ Dios Awqui, uqhamarac Tatit Jesucristo, Dios Awquin Yokapajj bendicipjjätamwa, churapjjaraquïtamwa qhuyapayasiñapa, samarañapana, chekampina munasiñampina.

⁴ Wal cusista yakhep wawanacamar Diosampi jacascatapa jicjjatasina, cunjämtï Dios Awquejj sisquistu uqhamarjama.

⁵ Jichhasti cullaca, achict'assmawa maynit maynicam munasipjjañäni. Aca kellkanipcsma ucajja janiw machak camachïquiti, jan ucasti acajj kalltäwitpacha utjistäna ucawa.

⁶ Munasiñajj Diosan camachinacaparjama jacañawa. Acawa uca camachejja: Munasiñan sarnakapjjam cunjämtï kalltäwitpach ist'apjjta uqhamarjama.

Sallkjirinacata

⁷ Aca orakenjja walja sallkjirinacawa sarnake. Jupanacajj janiw Tatit Jesucriston mä jakeru tucusa jutatapjja iyawsapquiti. Qhititejj uca yatichäwinïqui ucajj sallkjiriwa, Tatit Jesucriston uñisiriparaquiwa.

⁸ Wal amuyasipjjam jumanacpacha, irnakatanacamajj jan chhakañapataqui, jan ucasti Diosan phokhat pagop catokapjjañamataqui.

⁹ Qhititejj sinti nayrt'canejja janirac Tatit Jesucriston yatichäwiparjam sarnakqui ucajja, janiw Diosampïquiti; ucampis qhititejj Tatit Jesucriston yatichäwiparjam sarnakquejja uquïriw Awquimpejja, uqhamarac Yokampisa.

¹⁰ Cawquïritejj jumanacar jutapjjätamjja jan aca yatichäwimpi ucarojja, jan utanacamar catokapjjamti, ni aruntapjjamsa.

¹¹ Qhititejj aruntani uquïrejja, jan wali luräwinacaparu mayachascaspas uqhamawa.

Tucuyäwi arunaca

¹² Walja arunacaw jumanacar sañajj utjasquitu, ucampis janiw sañ munapcsmati carta toke, jan ucasti jutañwa amtta jumanacar uñcatañataqui, ajanuy ajanu parlañataqui, uqhamat cusisiñasajj phokhatäñapataqui.

¹³ Cullacaman wawanacapajj, cawquïrinacarutejj Diosajj ajlliwayqui ucanacajj aruntanipjjaractamwa.