Apocalipsis 20:4 - Qullan Arunaca Ucatsti trononacwa uñjaracta, ucanacansti qhitinacatejj taripañataqui munañanïña catokapcataynas ucanacaw kont'atäpjjäna. Uñjaractwa qhitinacatejj p'eke apakata jiwapjjäna Jesusan testigopäpjjatapata, uqhamarac Diosan arunacap parlapjjatap laycu. Uqhamaraquiw qhitinacatejj jan uca jach'a ajjsarcañ animalaru, diosaparus yupaychapcataynati ni chimpupsa p'ekenacaparu ni amparanacaparu uchayasipcataynasa ucanacajj ucancapjjaraquïnwa. Ucanacasti jactapjjataynawa ucatsti Cristompiw waranka mara reinapjjäna. Aymar Bibliia 1986 Ucatsti trononacwa uñjaracta, ucanacansti qhitinacatejj taripañataqui munañanïña catokapcataynas ucanacaw kont'atäpjjäna. Uñjaractwa qhitinacatejj p'eke apakata jiwapjjäna Jesusan testigopäpjjatapata, uqhamarac Diosan arunacap parlapjjatap laycu. Uqhamaraquiw qhitinacatejj jan uca jach'a ajjsarcañ animalaru, diosaparus yupaychapcataynati ni chimpupsa p'ekenacaparu ni amparanacaparu uchayasipcataynasa ucanacajj ucancapjjaraquïnwa. Ucanacasti jactapjjataynawa ucatsti Cristompiw waranka mara reinapjjäna. Qullan Arunaka DC Ukatsti reyi qunuñanak uñjarakta, uka qunuñanakansti, khitinakatix Jesucriston qhanañchataparu, Diosan yatiyäwipar taqi chuymampi sayt'apxatap layku jiwayat uñjasipkatayna, ukanakaw qunt'atäsipkäna. Jupanakax janiw uka jach'a axsarkañ animalarusa, ukar uñtasit lursutarus yupaychapkataynati, janirakiw chimpupsa paranakaparu, amparanakapar uchayasipkataynati. Jupanakasti jaktapxänwa, Diosasti jupanakar reyi qunuñanak churäna, Cristompi waranqa mara apnaqapxañapataki. |
Uca reyinacan apnakañapcamasti, alajjpachanquiri Diosajj mä yakha reino sayt'ayaraquini, uca reinosti janipuniw tucjatäcaniti ni apnakatäcaraquinisa yakha marcanacampejja, jan ucasti jupaw take yakha reinonacarojj tucjani, wiñayan wiñayapaw uca reinojj utjaraquini.
Take ucanac pasatatsti acapach apnakañajj alajjpachanquir Diosar catuyatäjjaniwa, wiñayataquiw jupancjjaraquini’ sasa.
uca chuymani Jilïr jaken puriniñapcama, ucatsti uca chuymani jakejj Diosan marcaparojj chekaparuw uñjäna, horasasti purinjjaraquitaynawa Diosan marcapajj uca reino catuntasjjañapataqui.
Apnakañasa, munañanïñasa, jach'a cancañasa, take acapachanquiri reinonacasa, alajjpachanquir Diosan marcaparu catuyatäjjaniwa. Diosan reinopasti wiñayataquipunïniwa, take acapachanquiri marcanacaw juparojj sirvipjjani, jaysapjjaraquini.’
“Nayasti uñch'uquiscaquïyätwa, ucjjarusti mä trononacaw uchataraquïna, mä Jilïri chuymani jakew kont'asiraquïna, isipajj qhunjam jank'oraquïnwa, ñic'utanacapasti t'ajjsit t'awrjamaraqui. Konuñapasa, uca konuñapan ruedanacapasa ninacamaquiraquïnwa.
“Jumanacasti uñjapjjam, nayasti Elías profetaruw qhitanipjjäma janïra Diosan urupa jutquipana, cawquïri urutï wali jach'äni, uqhamarac wali ajjsarcayäni.
Jesusasti juparojj sänwa: —Khanacwa sapjjsma, cunapachatejj take cunas wasitat machak lurascan ucqhajja, cunapachatejj Jaken Yokapajj konuñapjjar kont'ascan ucqhajja, jumanacan nayaru arcatam laycojja tunca payan konuñaruraquiw kont'asipjjäta ucat tunca payani Israel tribüquis ucar taripañataqui.
Uca urunacansti waljaniraquiw nayar iyawsatanacapjja chhaktayasipjjani, jupanac puraraquiw maynis mayni contra catuntayasipjjani, uñisisipjjaraquini.
Herodesasti ac ist'asinjja sänwa: —Acajj Juanawa. Nayajj p'ekep qharekayctjja ucaw jiwatat jactanjjpacha —sasa.
Ucatsti Jesusaruw jisct'apjjäna: —¿Cunatarac ley yatichirinacasti ‘Eliasaw nayrakat jutañapa’ sapjjesti? —sasa.
Aca Juanasti Tatitun nayrakatap sarani, Elías profetan ajayupat ajayuni, uqhamarac ch'amapat ch'amani, awquinacaru wawanacapampi sumancthapiyañataqui, jan jaysasirinacarusti jaysañ yatekapjjañapataqui. Uqhamatwa jakenacarojj waquichani Tatitur catokapjjañapataqui —sasa.
jumajj cusisitäyätawa. Jupanacasti janiw jumarojj cuttayapquiristamti; ucampis jumajj asqui jakenacan jacatatäwipanwa catokjjäta —sasa.
qhä reinojjan jumanacajj mank'apjjäta, umapjjaraquïta mesajjana, uqhamarac tronon kont'asipjjäta, Israelan tunca payan triburu taripapjjañamataqui.”
Mä juc'ampitjja jakenacajj janiw juc'ampi uñjcjjapjjetaniti, ucampis jumanacajj uñjasipquitätawa, jumanacajj jacapjjätawa nayan jacascatajj laycu.
Judionacajj uqham apanucuta uñjasitap laycutï yakha marcanquirinacajj Diosampejj sumancañar purchi ucajja, ¿cunjämaraquïspa jupanacajj wasitata catokatäjjaspa ucqhasti? Ucajj jiwatanacata jactañäcaspas uqhamawa.
Wawanacapätas laycojja Diosatjja herencia catokaraquiñäni jupan arsutaparjama. Uca herenciajja Cristompiraquiw catokañäni, jiwasanacatejj jupamp chica take cunans t'akhesiñäni ucajja, ucat alajjpachan jupampiraquiñäni.
t'akhesiñäni ucajja, jupampiraquiw jacañäni; jan uñt'iri tucuñäni ucajja, jupajj jan uñt'iriw tucuracstani.
Juan sirviripasti cuntejj uñjcatayna ucjja uqhampachwa arsu. Jupasti Diosan testigoparaquiwa cuntejj Jesucristojj arscatayna ucanacata.
Naya, Juanajj, jumanacan jilamätwa, jumanac chica t'akhisiriraquïtwa, Diosan ajllit marcapana, uqhamarac paciencia chuymtï Tatitojj churquistu ucana. Diosan arunacap parlatajj laycu, Jesucristot yatiyatajj laycuraquiw nayajj Patmos sat islan preso catutäscäyäta.
Uca quimsa uru chicani pasatatsti, Diosajj jactayjjewa uca pani testigorojja, jakenacasti jupanac uñjasajj wal ajjsarapjjäna.
Pakallköri angelasti trompetapwa phust'asïna, ucatsti mä arunacaraquiw alajjpachana jach'at ist'asïna, aqham sasa: “Acapach marcanacajj Tatit Cristosaruw jakcatjjapjje. Jichhajj juparaquiw wiñayan wiñayapataqui apnakani” sasa.
Nayasti pani testigojj qhitasinï nayjjat parlapjjañapataqui. Jupanacasti waranka pä pataca sojjta tuncani uruw parlapjjani, luto isimpi isthapita.”
Cunapachatï lurañap phokjjapjjani ucqhajja, aca orak mankhat mistuniri jach'a animalaw jupanacar nuwantasina atipjani ucat jiwarayaraquiniwa.
Jupanacasti Corderon jiwatap laycuwa atipjapjje, uqhamarac cuna cheka arunactejj jupjjat parlapcänsa uca laycuraqui. Janiraquiw jiwañsa ajjsarapcänti, jiwañataquisa janc'aquïpjjaraquïnwa.
Jek'esti uca t'akhesïwipatjja wiñayapuniw mistu, janiraquiw samarañajj urus arumas utjquiti, qhitinacatejj uca jach'a ajjsarcañ animalaru, uqhamarac uñtasitanacaparus yupaychapqui, jan ucajj amparaparus, paraparus uca animalan sutipampi chimpt'ayasipqui ucanacataquejja.”
Ucatsti uñjaractwa mä jach'a kotar uñtata, ucasti vidriompit ninampit luratjamänwa. Qhitinacatejj jach'a ajjsarcañ animalarusa, uñtasitaparusa, uqhamarac uca animalan sutipäquis uca numeroparus atipjapcäna ucanacajja, uca kota thiyan sayt'atäpjjänwa, cuntejj Diosajj jupanacar churcataynas uca arpa apt'atcamaqui.
Uca ajjsarcañ animal uñjctas ucajj nayrapachajj jaccäna ucawa, jichhasti ucajj janiw jaccjjeti. Ucampis aca orak mankhatwa mistunini janïra jiwañaru sarcasajja. Qhitinacatejj oraken jacasipqui ucat janiraqui sutinacapajj jacañ librona kellkatäquiti aca orake kalltäwitpacha ucanacajja, uca ajjsarcañ animal uñjasajj wali sustjasipjjani. Uca ajjsarcañ animalasti nayraw utjäna, jichhasti janiw utjcjjeti, ucampis ucapachajj uñstaniniwa.
Qhitinacatejj atipjcani uqhamarac cuntejj nayajj munctjja uc luririnacarojj marcanacjjaru munañanïñwa churäjja,
Cusisiñanïpjjewa, Diosar catuyatäpjjaraquiwa qhitinacatejj nayrïri jactäwin jactapqui ucanacajja. Khepïri jiwasti jupanacjjarojj janiw cuna ch'amanïquisa, jan ucasti jupanacajj Diosampina Cristompina sacerdotepäpjjaniwa. Waranka mararaquiw jupampejj reinapjjani.
Ucanjja janiw arumajj utjcjjaniti, ucan jaquirinacasti janiw lamparinsa, intin khanapasa munascjjaniti, Dios Tatituquiwa khanani, jupanacasti wiñayaraquiw ucanjja reinapjjani.
Qhitinacatejj atipjcani ucanacarojja, nayamp chicwa kont'asiyä tronojjana, cunjämatejj nayajj atipjtjja ucatsti Awquejjampi chicajj tronopan kont'asctjja uqhama.
Uca trono muyuntatasti yakha trononacaw utjaraquïna, ucanacasti pä tunca pusinïnwa. Uca trononacansti pä tunca pusini ancianonacaw jank'ot ist'ata uqhamarac kori coronanacan asjjatata kont'atäsipcaraquïna.
Cunapachatejj Corderojj pheskëri sello ch'iyjcän ucqhasti, altar mankhansti, qhitinacatejj Tatit laycu, uqhamarac arunacap laycu jiwarapcänsa ucanacan almanacapwa uñjta.
aqham sasa: “¡Jan cuna ñankhsa lurapjjamti aca orakeru, ni kotarusa, ni kokanacarusa, janïr Tatit Diosan sirvirinacaparu paranacapat sellonacampi chimpt'casina!” sasa.