ຂໍຊົງໂຜດໃຫ້ໄດ້ເຫັນຄວາມຈະເລີນຮຸ່ງເຮືອງ ຂອງຜູ້ທີ່ເປັນໄພ່ພົນຂອງພຣະອົງດ້ວຍ ແລະໃຫ້ໄດ້ມີສ່ວນໃນຄວາມສຸກຂອງພວກເຂົາ ຄືໄດ້ພາກພູມໃຈນຳຊົນຊາດຂອງພຣະອົງ.
1 ເປໂຕ 2:9 - ພຣະຄຳພີສັກສິ ແຕ່ຝ່າຍເຈົ້າທັງຫລາຍ ເປັນຊາດທີ່ພຣະເຈົ້າຊົງເລືອກໄວ້ແລ້ວ ເປັນປະໂຣຫິດຫລວງ ເປັນປະຊາຊາດບໍຣິສຸດ ເປັນພົນລະເມືອງຂອງພຣະເຈົ້າ ເພື່ອເຈົ້າທັງຫລາຍຈະໄດ້ປະກາດພຣະບາລະມີຂອງພຣະອົງ ຜູ້ໄດ້ຊົງເອີ້ນພວກເຈົ້າໃຫ້ອອກມາຈາກຄວາມມືດ ເຂົ້າໄປສູ່ຄວາມສະຫວ່າງອັນມະຫັດສະຈັນຂອງພຣະອົງ. ພຣະຄຳພີລາວສະບັບສະໄໝໃໝ່ ແຕ່ພວກເຈົ້າເປັນຜູ້ທີ່ພຣະເຈົ້າເລືອກໄວ້, ເປັນປະໂລຫິດຫລວງ, ເປັນຊົນຊາດບໍລິສຸດ, ເປັນພົນລະເມືອງຂອງພຣະເຈົ້າ, ເພື່ອພວກເຈົ້າຈະໄດ້ປະກາດຄຳສັນລະເສີນພຣະອົງຜູ້ເອີ້ນພວກເຈົ້າອອກຈາກຄວາມມືດເຂົ້າສູ່ຄວາມສະຫວ່າງອັນມະຫັດສະຈັນຂອງພຣະອົງ. |
ຂໍຊົງໂຜດໃຫ້ໄດ້ເຫັນຄວາມຈະເລີນຮຸ່ງເຮືອງ ຂອງຜູ້ທີ່ເປັນໄພ່ພົນຂອງພຣະອົງດ້ວຍ ແລະໃຫ້ໄດ້ມີສ່ວນໃນຄວາມສຸກຂອງພວກເຂົາ ຄືໄດ້ພາກພູມໃຈນຳຊົນຊາດຂອງພຣະອົງ.
ພຣະເຈົ້າຢາເວເປັນພຣະເຈົ້າ ພຣະອົງດີຕໍ່ພວກເຮົາ. ຈົ່ງຖືກິ່ງໄມ້ ແລະເລີ່ມສະຫລອງເທດສະການ ຈົ່ງພາກັນຍ່າງເປັນຂະບວນອ້ອມແທ່ນບູຊາເຖີດ.
ພຣະເຈົ້າຢາເວໄດ້ເລືອກຢາໂຄບໃຫ້ເປັນຄົນຂອງພຣະອົງເອງ ຊາວອິດສະຣາເອນໃຫ້ເປັນກຳມະສິດຂອງພຣະອົງ.
ຄົນຮຸ່ນຫລັງຈະບົວລະບັດຮັບໃຊ້ພຣະອົງ ຄົນຈະກ່າວສູ່ເຊັ່ນລູກຫລານເຖິງພຣະເຈົ້າຢາເວ.
ຄວາມສຸກເປັນຂອງຊົນຊາດທີ່ພຣະເຈົ້າ ເປັນພຣະເຈົ້າຢາເວໃດ ຄວາມສຸກເປັນຂອງປະຊາຊົນທີ່ພຣະອົງໄດ້ເລືອກໄວ້.
ຖ້າວ່າຂ້ານ້ອຍໄດ້ເວົ້າຢ່າງນັ້ນ, ຂ້ານ້ອຍຈະບໍ່ໄດ້ປະຕິບັດສົມກັບເປັນປະຊາຊົນຂອງພຣະອົງ.
ຈົ່ງໄຂປະຕູເມືອງໃຫ້ຊົນຊາດທີ່ສັດຊື່ເຂົ້າມາ ຄືຊົນຊາດທີ່ປະຊາຊົນເຮັດໃນສິ່ງທີ່ຖືກຕ້ອງ.
ແຕ່ສຳລັບພວກເຈົ້ານັ້ນແມ່ນຊາດອິດສະຣາເອນ ເປັນພວກທີ່ອຸທິດຕົວເພື່ອການບົວລະບັດຮັບໃຊ້ ແມ່ນປະຊາຊົນພວກໜຶ່ງທີ່ເຮົາໄດ້ເລືອກເອົາ ຄືເຊື້ອສາຍອັບຣາຮາມມິດສະຫາຍຂອງເຮົານັ້ນ.
ປະຊາຊົນຂອງເຮົາຜູ້ຕາບອດ ເຮົາຈະນຳພາ ໃຫ້ເດີນໄປຕາມທາງທີ່ພວກເຂົາບໍ່ເຄີຍທຽວຈັກເທື່ອ. ເຮົາຈະປ່ຽນມືດໃຫ້ເປັນແຈ້ງສຳລັບພວກເຂົາ ທີ່ຫລຸບທີ່ໂນນໃຫ້ເປັນທີ່ຮາບພຽງແລະອ່ອນນຸ້ມ. ສິ່ງເຫຼົ່ານີ້ແຫລະ ເປັນຄຳສັນຍາຂອງເຮົາ ເຮົາຈະຮັກສາສິ່ງນັ້ນໄວ້ຢ່າງແນ່ແທ້.
ອົງພຣະຜູ້ເປັນເຈົ້າກ່າວວ່າ, “ບັດນີ້ ຈົ່ງຟັງ ເຊື້ອສາຍຢາໂຄບຜູ້ຮັບໃຊ້ຂອງເຮົາ ຊາດອິດສະຣາເອນຄືປະຊາຊົນທີ່ເຮົາໄດ້ເລືອກໄວ້.
ຄົນຈະຮູ້ວ່າພວກເຈົ້າເປັນປະໂຣຫິດຂອງພຣະເຈົ້າຢາເວ ເຂົາຈະກ່າວເຖິງພວກເຈົ້າວ່າ ເປັນຜູ້ຮັບໃຊ້ຂອງພຣະເຈົ້າຂອງພວກເຮົາ. ພວກເຈົ້າຈະມ່ວນຊື່ນຢູ່ກັບສົມບັດຊົນຊາດທັງຫລາຍ ແລະຈະພູມໃຈໃນຊັບສິນທີ່ເປັນຂອງພວກເຈົ້າ.
ຄົນຈະເອີ້ນຊື່ພວກເຂົາວ່າ, “ປະຊາຊົນບໍຣິສຸດ” “ຜູ້ທີ່ພຣະເຈົ້າຢາເວໄດ້ຊົງໄຖ່ໄວ້ແລ້ວ.” ເຈົ້າຈະມີຊື່ວ່າ, “ເມືອງທີ່ພຣະເຈົ້າຊົງຮັກ” “ນະຄອນທີ່ພຣະເຈົ້າບໍ່ຍອມປະຖິ້ມຈັກເທື່ອ.”
ເຮົາຈະໃຫ້ບາງຄົນໃນພວກເຂົາເປັນປະໂຣຫິດແລະເປັນຊາວເລວີ.” ພຣະເຈົ້າຢາເວກ່າວດັ່ງນີ້ແຫຼະ.
ປະຊາຊົນຜູ້ທີ່ໃຊ້ຊີວິດຢູ່ໃນຄວາມມືດໜາ ກໍໄດ້ເຫັນແສງແຈ້ງອັນຍິ່ງໃຫຍ່ສາແລ້ວ. ພວກເຂົາເຄີຍອາໄສຢູ່ໃນດິນແດນແຫ່ງເງົາມືດມົວ ແຕ່ບັດນີ້ ແສງແຈ້ງໃສກຳລັງສ່ອງໃສ່ພວກເຂົາເຈົ້າ.
ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ, “ພວກເຂົາຈະເປັນປະຊາຊົນຂອງເຮົາ. ໃນມື້ທີ່ເຮົາດຳເນີນການນັ້ນ ພວກເຂົາຈະເປັນກຳມະສິດຂອງເຮົາແທ້ໆ. ເຮົາຈະເມດຕາພວກເຂົາດັ່ງພໍ່ເມດຕາລູກຜູ້ທີ່ຮັບໃຊ້ຕົນ.
ປະຊາຊົນຜູ້ທີ່ໃຊ້ຊີວິດຢູ່ໃນຄວາມມືດໜາ ໄດ້ເຫັນແສງແຈ້ງອັນຍິ່ງໃຫຍ່. ສຳລັບພວກທີ່ຢູ່ໃນເງົາແຫ່ງຄວາມຕາຍ ແສງແຈ້ງໃສໄດ້ສ່ອງໃສ່ເຂົາເຈົ້າ.”
ໃນທຳນອງດຽວກັນນີ້ແຫຼະ ຈົ່ງໃຫ້ແສງສະຫວ່າງທີ່ຢູ່ໃນພວກເຈົ້ານັ້ນສ່ອງແຈ້ງຕໍ່ໜ້າຄົນທັງຫລາຍ ເພື່ອວ່າພວກເຂົາຈະໄດ້ເຫັນຄຸນງາມຄວາມດີທີ່ພວກເຈົ້າເຮັດ ແລະພວກເຂົາຈະສັນລະເສີນພຣະບິດາເຈົ້າຂອງພວກເຈົ້າທີ່ສະຖິດຢູ່ໃນສະຫວັນ.”
ເພື່ອຈະສ່ອງສະຫວ່າງແກ່ຄົນທັງຫລາຍ ທີ່ຢູ່ໃນບ່ອນມືດ ແລະຢູ່ໃນເງົາ ຂອງຄວາມຕາຍ ເພື່ອຈະນຳພາຕີນຂອງເຮົາໄປ ໃນທາງສະຫງົບສຸກ.”
ຂ້ານ້ອຍຖວາຍຕົວແກ່ພຣະອົງ ເພາະເຫັນແກ່ພວກເຂົາ ເພື່ອໃຫ້ພວກເຂົາໄດ້ຮັບການຊົງຊຳລະແຕ່ງຕັ້ງໄວ້ດ້ວຍຄວາມຈິງເໝືອນກັນ.
ທ່ານທັງຫລາຍ ຈົ່ງລະວັງຕົວເອງໃຫ້ດີ ແລະເຝົ້າຮັກສາຝູງແກະ ທີ່ພຣະວິນຍານບໍຣິສຸດເຈົ້າໄດ້ມອບໄວ້ໃຫ້ພວກທ່ານເປັນຜູ້ດູແລ, ຈົ່ງບຳລຸງລ້ຽງຄຣິສຕະຈັກຂອງພຣະເຈົ້າ ທີ່ພຣະອົງເປັນເຈົ້າຂອງ ໂດຍພຣະບຸດໄດ້ຊົງໄຖ່ມາດ້ວຍພຣະໂລຫິດຂອງພຣະອົງເອງ.
ເຮົາໃຊ້ເຈົ້າໄປກໍເພື່ອວ່າ ເຈົ້າຈະໄຂຕາຄົນເຫຼົ່ານັ້ນ ແລະເພື່ອວ່າ ເຈົ້າຈະນຳພວກເຂົາອອກຈາກຄວາມມືດ ມາຫາຄວາມສະຫວ່າງ ແລະຈາກອຳນາດຂອງມານຊາຕານ ມາຫາພຣະເຈົ້າ ໂດຍວາງໃຈເຊື່ອໃນເຮົາບາບກຳຂອງພວກເຂົາຈະໄດ້ຮັບການອະໄພ ແລະຮັບສ່ວນໃນທ່າມກາງປະຊາຊົນທີ່ພຣະເຈົ້າໄດ້ເລືອກໄວ້.”’
ອັກຄຼີປາກ່າວແກ່ໂປໂລວ່າ, “ໃນເວລາສັ້ນໆນີ້ ເຈົ້າຄິດວ່າເຈົ້າຈະເຮັດໃຫ້ເຮົາເປັນຄຣິສຕຽນຊັ້ນບໍ?”
ລວມທັງພວກເຮົາທີ່ເປັນໄພ່ພົນ ທີ່ພຣະອົງຊົງເອີ້ນເອົານັ້ນ ບໍ່ແມ່ນຈາກຄົນຢິວເທົ່ານັ້ນ ແຕ່ຈາກຄົນຕ່າງຊາດດ້ວຍ.
ຖ້າຜູ້ໃດທຳລາຍວິຫານຂອງພຣະເຈົ້າ ພຣະອົງກໍຈະທຳລາຍຜູ້ນັ້ນ. ດ້ວຍວ່າ, ວິຫານຂອງພຣະເຈົ້າເປັນທີ່ບໍຣິສຸດສັກສິດ ແລະພວກເຈົ້ານັ້ນແຫຼະ ເປັນວິຫານຂອງພຣະອົງ.
ເປັນເຄື່ອງມັດຈຳຂອງການຮັບມໍຣະດົກຂອງພວກເຮົາ ຈົນກວ່າເຮົາຈະໄດ້ຮັບເປັນກຳມະສິດ ເປັນທີ່ຖວາຍສັນລະເສີນແດ່ພຣະກຽດຕິຍົດຂອງພຣະອົງ.
ເພື່ອຈະໃຫ້ເປັນທີ່ສັນລະເສີນພຣະຄຸນອັນຮຸ່ງເຮືອງຂອງພຣະອົງ ຊຶ່ງຊົງໂຜດປະທານແກ່ພວກເຮົາໃນພຣະເຢຊູເຈົ້າ ຜູ້ຊົງເປັນທີ່ຮັກຂອງພຣະເຈົ້າ.
ຈົ່ງຖວາຍພຣະກຽດຕິຍົດແດ່ພຣະເຈົ້າໃນຄຣິສຕະຈັກ ແລະໃນພຣະຄຣິດເຈົ້າເຢຊູ ທຸກຍຸກທຸກສະໄໝຕະຫລອດໄປເປັນນິດເທີ້ນ ອາແມນ.
ແຕ່ຄວາມຮັກຂອງພຣະເຈົ້າຢາເວ ສຳລັບປູ່ຍ່າຕາຍາຍຂອງພວກເຈົ້າມີຫລາຍທີ່ສຸດ ທີ່ພຣະອົງໄດ້ເລືອກເອົາພວກເຈົ້າ ແທນທີ່ຈະເລືອກເອົາປະຊາຊົນຊາດອື່ນ ແລະພວກເຈົ້າກໍຍັງເປັນປະຊາຊົນທີ່ພຣະອົງໄດ້ເລືອກໄວ້ຈົນເຖິງວັນນີ້.
ພວກເຈົ້າເປັນພວກບໍຣິສຸດຂອງພຣະເຈົ້າຢາເວ ພຣະເຈົ້າຂອງພວກເຈົ້າ, ພຣະເຈົ້າຢາເວໄດ້ເລືອກພວກເຈົ້າໃຫ້ເປັນໄພ່ພົນຂອງພຣະອົງຈາກປະຊາຊາດທົ່ວເທິງແຜ່ນດິນໂລກນີ້.”
ພວກເຂົາຈະບໍ່ມີທີ່ດິນເປັນຂອງຕົນເອງດັ່ງເຜົ່າອື່ນໆ, ສ່ວນແບ່ງຂອງພວກເຂົາແມ່ນສິດທິແຫ່ງການເປັນປະໂຣຫິດຂອງພຣະເຈົ້າຢາເວ ຕາມທີ່ພຣະອົງໄດ້ສັນຍາໄວ້.
ແຕ່ສຳລັບພວກເຈົ້າແລ້ວ ພວກເຈົ້າເປັນປະຊາຊົນທີ່ພຣະເຈົ້າຢາເວໄດ້ຊ່ວຍກອບກູ້ ອອກມາຈາກຂຸມນະຣົກຂອງເອຢິບ. ພຣະອົງໄດ້ນຳພວກເຈົ້າອອກມາ ເພື່ອຫລໍ່ຫລອມໃຫ້ເປັນໄພ່ພົນຂອງພຣະອົງ ເໝືອນດັ່ງທີ່ພວກເຈົ້າເປັນຢູ່ໃນວັນນີ້.
ຈົ່ງເຮັດເຊັ່ນນີ້ ເພາະວ່າພວກເຈົ້າເປັນພວກບໍຣິສຸດຂອງພຣະເຈົ້າຢາເວ ພຣະເຈົ້າຂອງພວກເຈົ້າ. ພຣະເຈົ້າຢາເວ ພຣະເຈົ້າຂອງພວກເຈົ້າຈາກໄດ້ເລືອກເອົາພວກເຈົ້າຈາກຊົນຊາດທັງໝົດທົ່ວເທິງແຜ່ນດິນໂລກ ມາເປັນຊົນຊາດພິເສດຂອງພຣະອົງ.
ເຮົາກຳລັງບາກບັ່ນມຸ່ງໜ້າໄປສູ່ຫລັກໄຊ ເພື່ອຈະໄດ້ຮັບລາງວັນຄືຊີວິດ ຊຶ່ງພຣະເຈົ້າໄດ້ຊົງເອີ້ນເອົາໃນພຣະຄຣິດເຈົ້າເຢຊູ ໃຫ້ໄປຮັບຢູ່ເບື້ອງເທິງ.
ພຣະອົງໄດ້ຊ່ວຍກູ້ເອົາພວກເຮົາອອກມາຈາກອຳນາດຂອງຄວາມມືດ ແລະໄດ້ນຳພາພວກເຮົາເຂົ້າໄປຕັ້ງໄວ້ໃນອານາຈັກແຫ່ງພຣະບຸດທີ່ຮັກຂອງພຣະອົງ,
ຜູ້ຊົງໂຜດເຮົາທັງຫລາຍໃຫ້ພົ້ນ ແລະຊົງເອີ້ນເອົາເຮົາທັງຫລາຍໃຫ້ເປັນໄພ່ພົນຂອງພຣະອົງ ບໍ່ແມ່ນເພາະເຫັນແກ່ການດີທີ່ເຮົາໄດ້ເຮັດນັ້ນ ແຕ່ເພາະເຫັນແກ່ພຣະປະສົງຂອງພຣະອົງເອງ ແລະພຣະຄຸນຊຶ່ງຊົງປະທານແກ່ພວກເຮົາໃນພຣະຄຣິດເຈົ້າເຢຊູ ຕັ້ງແຕ່ດຶກດຳບັນມານັ້ນ
ພຣະອົງໄດ້ສະຫລະພຣະອົງເອງ ແທນພວກເຮົາທັງຫລາຍ ເພື່ອໄຖ່ເອົາພວກເຮົາໃຫ້ພົ້ນຈາກຄວາມຊົ່ວຊ້າທັງໝົດ ແລະເພື່ອຊຳລະພວກເຮົາໃຫ້ເປັນຜູ້ບໍຣິສຸດ ເພື່ອເປັນໄພ່ພົນຂອງພຣະອົງໂດຍສະເພາະ ແລະມີໃຈຮ້ອນຮົນສຳລັບເຮັດຄວາມດີ.
ຄືຜູ້ທີ່ພຣະເຈົ້າ ພຣະບິດາເຈົ້າໄດ້ຊົງເລືອກໄວ້ແລ້ວ ຕາມທີ່ພຣະອົງໄດ້ຊົງຮູ້ລ່ວງໜ້າໄວ້ກ່ອນ ເພື່ອພຣະວິນຍານຈະຊົງຊຳລະໃຫ້ບໍຣິສຸດ ຈະໃຫ້ນົບນ້ອມເຊື່ອຟັງພຣະເຢຊູຄຣິດເຈົ້າ ແລະຈະໃຫ້ຮັບການຊຳລະດ້ວຍພຣະໂລຫິດຂອງພຣະອົງ. ຂໍພຣະຄຸນ ແລະສັນຕິສຸກຈົ່ງບັງເກີດທະວີຄູນແກ່ເຈົ້າທັງຫລາຍເທີ້ນ.
ເຈົ້າທັງຫລາຍກໍເປັນເໝືອນຫີນທີ່ມີຊີວິດຢູ່ ພວກເຈົ້າຈົ່ງຍອມໃຫ້ພຣະເຈົ້າຊົງກໍ່ຂຶ້ນເປັນວິຫານຝ່າຍວິນຍານ ເປັນປະໂຣຫິດບໍຣິສຸດ ເພື່ອຖວາຍເຄື່ອງບູຊາຝ່າຍວິນຍານ ຊຶ່ງພໍພຣະໄທຂອງພຣະເຈົ້າ ໂດຍທາງພຣະເຢຊູຄຣິດເຈົ້າ.
ຖ້າຜູ້ໃດກ່າວ ກໍໃຫ້ເໝືອນຜູ້ກ່າວພຣະທຳຂອງພຣະເຈົ້າ, ຖ້າຜູ້ໃດເປັນຜູ້ບໍລິການຮັບໃຊ້ ກໍໃຫ້ບໍລິການຮັບໃຊ້ ເໝືອນຜູ້ຮັບກຳລັງທີ່ພຣະເຈົ້າຊົງໂຜດປະທານໃຫ້ ເພື່ອວ່າພຣະເຈົ້າຈະຊົງໄດ້ຮັບກຽດໃນການທັງປວງ ໂດຍທາງພຣະເຢຊູຄຣິດເຈົ້າ. ສະຫງ່າຣາສີແລະຣິດທານຸພາບ ຈົ່ງມີແດ່ພຣະອົງສືບໆໄປເປັນນິດ ອາແມນ.
ແລະພຣະອົງໄດ້ຊົງຕັ້ງເຮົາທັງຫລາຍ ໄວ້ໃຫ້ເປັນອານາຈັກແລະເປັນປະໂຣຫິດຂອງພຣະອົງ ພຣະກຽດແລະຣິດທານຸພາບ ຈົ່ງມີແດ່ພຣະອົງສືບໆໄປເປັນນິດ ອາແມນ.
ຜູ້ໃດທີ່ມີສ່ວນໃນການຄືນມາຈາກຕາຍຄັ້ງທຳອິດ ຜູ້ນັ້ນກໍເປັນສຸກແລະບໍຣິສຸດ. ຄວາມຕາຍຄັ້ງທີສອງ ຈະບໍ່ມີອຳນາດເໜືອຄົນເຫຼົ່ານັ້ນ ແຕ່ພວກເຂົາຈະໄດ້ເປັນປະໂຣຫິດຂອງພຣະເຈົ້າ ແລະຂອງພຣະຄຣິດ ທັງຈະຄຸ້ມຄອງຮ່ວມກັບພຣະອົງໃນລະຫວ່າງພັນປີ.
ພຣະອົງໄດ້ເຮັດໃຫ້ພວກເຂົາ ເປັນອານາຈັກແຫ່ງປະໂຣຫິດ ເພື່ອຮັບໃຊ້ພຣະເຈົ້າຂອງພວກເຮົາ ແລະພວກເຂົາເຫຼົ່ານັ້ນ ຈະໄດ້ປົກຄອງເທິງແຜ່ນດິນໂລກ.”
ພຣະເຈົ້າຢາເວຈະບໍ່ປະຖິ້ມພວກຂອງພຣະອົງ ໂດຍເຫັນແກ່ນາມຊື່ອັນຍິ່ງໃຫຍ່ຂອງພຣະອົງ ເພາະພຣະເຈົ້າຢາເວໄດ້ຕັດສິນໃຈຮັບເອົາພວກເຈົ້າ ເປັນປະຊາຊົນຂອງພຣະອົງແລ້ວ.