Sembulo 6 - Siswati 1996 Bible Siswati 1996 Bible
Sembulo 6

¹ Ngabona liWundlu licatulula lolunye lwaletimphawu letisikhombisa, ngeva lesinye saletidalwa letine sikhuluma ngelivi lekudvuma sitsi: “Wota!”

² Kwatsi chamu lihhashi lelimhlophe, nalona labeligibele aphetse butjoki, wanikwa umchele, wahamba ancoba, ayawuncoba.

³ Latsi liWundlu nalicatulula luphawu lwesibili, ngeva sidalwa sesibili sitsi: “Wota!”

⁴ Kwaphindze kwatsi chamu lihhashi lelibovu. Lowo labeligibele wavunyelwa kutsi ayewususa kuthula emhlabeni, kuze bantfu babulalane bodvwana; wanikwa inkemba lenkhulu.

⁵ LiWundlu laphindze lacatulula luphawu lwesitsatfu, ngase ngiva sidalwa sesitsatfu sitsi: “Wota!” Kwachamuka lihhashi lelimnyama, lona labeligibele aphetse silinganiso esandleni sakhe.

⁶ Ngase ngiva livi shangatsi liphuma emkhatsini wetidalwa letine litsi: “Libinta lakolo wekudliwa ngelilanga lelingatsengwa ngeliholo lelilanga, nemabinta lamatsatfu emabele langatsengwa ngeliholo lelilanga; kepha ungawoni emafutsa neliwayini!”

⁷ Latsi liWundlu nalicatulula luphawu lwesine, ngeva livi lesidalwa sesine litsi: “Wota!”

⁸ Kwatsi chamu lihhashi lelimphofu, libito lemgibeli walo bekunguKufa, iHayidesi yamlandzela. Banikwa emandla etikwencenye yesine kukwemhlaba, kutsi bayibulale ngenkemba, nangendlala, nangesifo lesingelapheki, nangetilwane tesiganga.

⁹ Latsi liWundlu nalicatulula luphawu lwesihlanu, ngabona lilati, ngaphansi kwalo kunemiphefumulo yalabo lababebulawelwe livi laNkulunkulu nebufakazi lababenabo.

¹⁰ Bamemeta kakhulu, ngelivi lelikhulu, batsi: “Nkhosi Somandla, longcwele naloliciniso, kuyawudzimate kube ngunini ungehluleli uphindzisele ingati yetfu kulabo labahleti emhlabeni?”

¹¹ Ngamunye ngamunye wabo wase unikwa ingubo lemhlophe; batjelwa kutsi ase baphumule kancane, kuze kuphelele linani lalababetinceku kanye nabo nebazalwane babo, lababesetawubulawa njengabo.

¹² Latsi liWundlu nalicatulula luphawu lwesitfupha, ngabona kutamatama lokukhulu kwemhlaba. Lilanga laba mnyama njengendvwangu yelisaka leboya, inyanga yaba njengengati.

¹³ Tinkhanyeti tesibhakabhaka tavutfuteleka emhlabeni njengekuhhohloka kwemakhiwa lasengakavutfwa emkhiweni, nakuhhusha umoya lomkhulu.

¹⁴ Sibhakabhaka sanyamalala njengekugocotwa kwelicansi; tonkhe tintsaba netichingi tesuswa etindzaweni tato.

¹⁵ Onkhe emakhosi emhlaba, netikhulu, netindvuna, nalabacebile, nalabanemandla, nabo bonkhe labatigcili, nalabakhululekile, babhaca emigedzeni nasemihumeni emkhatsini wemadvwala etintsaba.

¹⁶ Bamemeta tintsaba nemadvwala batsi: “Welani etikwetfu, nisifihle ebusweni balowo lohleti esihlalweni sebukhosi, naselulakeni lweliWundlu,

¹⁷ ngobe lilanga lelikhulu lelulaka labo selifikile. Ngubani longaba nemandla ekuma?”