Sembulo 10 - Siswati 1996 Bible Siswati 1996 Bible
Sembulo 10

¹ Ngase ngibona lenye ingilosi lenemandla lamakhulu yehla ezulwini yehlela phansi, yembetse lifu, inemushi wenkosazana etikwenhloko yayo, buso bayo bunjengelilanga, imilente yayo injengetinsika temlilo.

² Yayiphetse incwajana levulekile esandleni sayo. Ngelunyawo lwayo lwangesekudla yema etikwelwandle, ngelwangesancele yema etikwemhlabatsi.

³ Yamemeta ngelivi lelikhulu lelalinjengelekubhodla kwelibhubesi. Yatsi kube imemete, kwevakala kudvuma lokusikhombisa.

⁴ Kwatsi kube kuvakale lokudvuma lokusikhombisa, ngase ngilungiselela kubhala, kodvwa ngeva livi liphuma ezulwini litsi: “Loko lokushiwo kudvuma lokusikhombisa ungakubhali phansi; kugcine kuyimfihlo.”

⁵ Lengilosi lengayibona ime elwandle nasemhlabatsini, yaphakamisela sandla sayo sangesekudla ezulwini,

⁶ yamfunga yena lophila kuze kube phakadze, lowadala lizulu nako konkhe lokukulo, nemhlaba nako konkhe lokukuwo, nelwandle nako konkhe lokukulo, yatsi: “Kutawubate lokutawubambelela!

⁷ Kodvwa kutawutsi ngesikhatsi selivi lengilosi yesikhombisa, nase itawushaya licilongo layo, kufezeke imfihlakalo yaNkulunkulu, njengobe abetsembisile etisebentini takhe, baphrofethi.”

⁸ Ngaphindza ngaliva livi liphuma ezulwini likhuluma kimi litsi: “Hamba uyewutsatsa lencwajana levulekile lesesandleni sengilosi leme etikwelwandle nasetikwemhlabatsi.”

⁹ Ngako ngaya kulengilosi, ngayitjela kutsi ayinginike lencwajana. Yatsi kimi: “Yitsatse, uyidle. Itawuluma esiswini, kodvwa ibe mnandzi njengeluju emlonyeni.”

¹⁰ Ngayitsatsa-ke lencwajana esandleni salengilosi, ngayidla. Yaba mnandzi njengeluju emlonyeni wami, kodvwa ngatsi nase ngiyidlile yaluma esiswini sami.

¹¹ Ngatjelwa kwatsiwa: “Kufanele uphrofethe ngebantfu labanyenti, nangetive, nangetilimi, nangemakhosi.”