Ruthe 2 - Siswati 1996 Bible Siswati 1996 Bible
Ruthe 2

¹ Nawomi abenesihlobo sakhe lesasiselusendvo lwaka-Elimeleki. Lesihlobo sasicebe kakhulu futsi sihloniphekile; libito laso kwakunguBowazi.

² Ruthe, umMowabi, wakhuluma kuNawomi, watsi: “Kuncono ngihambe ngiye ensimini ngiyewukhwimita emvakwalowo lengingahle ngitfole kuye umusa.” Nawomi waphendvula watsi: “Hamba, ndvodzakati yami.”

³ Ngako-ke Ruthe wahamba wayawukhwimita emasimini emvakwebavuni. Kwenteka wangena ensimini leyayiyakaBowazi. Bowazi abewelusendvo lwaka-Elimeleki.

⁴ Kwase kufika Bowazi aphuma eBhetlehema, wafike kubavuni watsi: “Simakadze akabe nani!” Bamphendvula batsi. “Simakadze akakubusise!”

⁵ Bowazi wabuta kulendvuna yebavuni watsi: “Wakabani lomakoti?”

⁶ Lendvuna yamphendvula yatsi: “Lomakoti ungumMowabi, lofike naNawomi, aphuma eveni lakaMowabi.

⁷ Ufike la kimi watsi: ‘Ngicela kukhwimita, ngilandzele bavuni.’ Kusukela ekuseni ngeluvivi seloku angene lapha ensimini solomane uyasebenta, uphumuphumule kancane emtfuntini.”

⁸ Bowazi wakhuluma kuRuthe, watsi: “Lalela-ke, ndvodzakati yami, ungasacali kuyawukhwimita kulenye insimi, kodvwa namatsela kulamantfombatana ami lavunako.

⁹ Wena ubukisise insimi lapho bavuna khona, bese uyabalandzela. Lamajaha ngiwayale kutsi angakutsintsi. Nase womile, ubonatsa kuletimbita letigcwaliswe ngulamajaha.”

¹⁰ Ruthe wakhotsamisa buso bakhe, wabonga, watsi: “Kungani ngizuze umusa longaka kuwe nekutsi unginake kangaka ngiwetive?”

¹¹ Bowazi waphendvula watsi: “Sebangitjele konkhe lokwentele unyokotala, seloku kwafa indvodza yakho. Bangitjela nangekusuka kwakho kini, washiya uyihlo nenyoko, nelive lakini lemdzabu, weta esiveni lowawungasati.

¹² Shangatsi Simakadze angakunika umvuzo ngaloku lose ukwentile. Shangatsi Simakadze, Nkulunkulu wema-Israyeli, angakunika umvuzo lophelele, njengobe naku sewukhosele ngaphansi kwakhe nje.”

¹³ Ruthe wamphendvula watsi: “Maye, ube nemusa kimi, mnumzane, ngobe sewungidvudvutile, wangikhulumisa ngemoya lomuhle mine ncekukati yakho, lite ngingesiye lomunye wetincekukati takho.”

¹⁴ Nasekudliwa Bowazi wabita Ruthe watsi: “Kota lapha, utekudla nasi sinkhwa, usishibe ngeliwayini.” Ngako-ke wahlala kanye netisebenti, Bowazi wamnika imbasha; wadla waze wesutsa, kwadzimate kwasala.

¹⁵ Watsi nakasukuma kuyawukhwimita, Bowazi wakhuluma nalamajaha, watsi: “Ruthe nibomyekela akhwimite nalapho kungakavunwa khona, ningamekhuti.

¹⁶ Nibomhoshulela letinye titfungo atitsatse, ningamtsetsisi.”

¹⁷ Ngako-ke Ruthe wachubeka wakhwimita, laze layawushona; watsi kube akubhule, kwaba ngemakhilogremu labengaba lishumi.

¹⁸ Wakutsatsa wahamba nako waya ekhaya; wakhombisa uninatala sonkhe sivuno sakhe, waphindze wamnika nekudla lokwakusele ensimini nakadlako.

¹⁹ Nawomi wabuta Ruthe watsi: “Lamuhla bewukhwimita kuphi? Bewusebenta kuphi? Ubusisiwe lowo muntfu lokunakile!” Ruthe waphendvula watsi: “Lamuhla bengisebenta ensimini yemuntfu lekutsiwa nguBowazi.”

²⁰ Nawomi watsi kumalukatane wakhe: “Shangatsi Simakadze lonemusa kulabaphilako nalabafile angambusisa.” Wachubeka watsi: “Lomuntfu usihlobo setfu sengati, ungulomunye walabo labafanele kusinakekela.”

²¹ Ruthe wachubeka wakhuluma kuninatala, watsi: “Ngetulu kwaloko uphindze watsi angichubeke kukhwimita naletisebenti takakhe kuze kuphele kuvuna.”

²² Nawomi waphendvula Ruthe, malukatane wakhe, watsi: “Kulungile-ke, ndvodzakati, kuncono ubuyele uyewusebenta kanye nalamantfombatana asensimini yakaBowazi; ngobe ensimini yalomunye bangahle bakuhluphe.”

²³ Ngako Ruthe wachubeka asebenta nalamantfombatana akaBowazi, baze bacedza kuvuna ibhali nakolo. Wachubeka kuhlala neninatala.