Numeri 9 - Siswati 1996 Bible Siswati 1996 Bible
Numeri 9

¹ Simakadze wakhuluma kuMosi eHlane laseSinayi ngenyanga yekucala, emnyakeni wesibili kusukela ema-Israyeli aphuma eGibhithe, watsi:

² “Ema-Israyeli akagubhe uMkhosi weliPhasika ngaleso sikhatsi lesimisiwe.

³ Akaligubhe ngaleso sikhatsi lesimisiwe, kusihlwa ngelilanga leli-14 kuyo lenyanga; kulandzelwe yonkhe leyo mitsetfo nemiyalo lemacondzana nalo.”

⁴ Ngako Mosi watjela sive sema-Israyeli kutsi akagubhe umkhosi weliPhasika;

⁵ avele akwenta loko eHlane laseSinayi kusihlwa ngelilanga leli-14 enyangeni yekucala. Ema-Israyeli akwenta konkhe loko njengobe Simakadze abeyale Mosi.

⁶ Noko labanye babo abazange bawugubhe lomkhosi, ngobe babengcolile ngekwemtsetfo, ngekutsi babetsintse sidvumbu. Ngako beta kuMosi na-Aroni ngalo lelo langa bafike

⁷ batsi: “Sesingcolile ngenca yekutsintsa sidvumbu, kodvwa kuya ngani kutsi tsine sikhishwe sivinjelwe kutsi siletse umnikelo waSimakadze kanye nalamanye ema-Israyeli ngaleso sikhatsi lesesimisiwe?”

⁸ Mosi wabaphendvula watsi: “Ase nime, ngize ngitfole umyalo waSimakadze ngani.”

⁹ Simakadze wakhuluma kuMosi, watsi:

¹⁰ “Tjela ema-Israyeli utsi: ‘Nangabe lomunye wenu nome wetitukulwane tenu angcole ngenca yekutsintsa sidvumbu nome aseluhambeni khashane, kodvwa noko angaligubha lelo Phasika laSimakadze.

¹¹ Kufanele bona baligubhe ngelilanga leli-14 enyangeni yesibili kusihlwa. Kufanele baligubhe ngekudla lizinyane lemvu, nesinkhwa lesite imbiliso kanye netibhidvo letibabako.

¹² Kufanele kubete labakushiyela likusasa, kantsi nematsambo alo bangawephuli. Nabagubha loMkhosi weliPhasika, kufanele bayente yonkhe imitsetfo yalo.

¹³ Kodvwa nakwenteka lomunye ayekela kuwugubha loMkhosi weliPhasika, kantsi akasiye longcolile ngekwemtsetfo futsi akekho ekuhambeni, lowo muntfu uyawuncunywa esiveni sakubo, ngobe phela akawuletsi umnikelo waSimakadze ngaleso sikhatsi lesijutjiwe. Lowo muntfu uyawulitfwala lelo cala lesono sakhe.

¹⁴ “ ‘Umuntfu wetive lohlala emkhatsini wenu lofuna kuwugubha loMkhosi weliPhasika, naye angachubeka awugubhe alandzele leyo mitsetfo nemiyalo. Niyawuba nayo yona leyo mitsetfo kubetive nakubemdzabu.’ ”

¹⁵ Ngelilanga lekumiswa kwelithende lekukhontela, lifu lalimbonya. Kusukela kusihlwa kwaze kwaba ngusekuseni lelifu lelalisetikwelithende lekukhontela, lalifanana nemlilo.

¹⁶ Lalivamise kwenta njalo nje ngekutsi lelifu lilimbonye, bese kutsi ebusuku lifanane nemlilo.

¹⁷ Kwakutsi nangabe lifu liphakama etikwelithende, ema-Israyeli atfutse, litsi lapho lima khona, ema-Israyeli nawo emise khona.

¹⁸ Ema-Israyeli abetfutsa ngekuyalwa nguSimakadze, ngalokufananako abemisa nase kusho Simakadze. Babengatfutsi kuleyo nkambu, nangabe lelifu seloku lisetikwelithende lekukhontela.

¹⁹ Nangabe lelifu lihleti etikwelithende lekukhontela emalanga lamanyenti, ema-Israyeli abelalela umyalo waSimakadze, angatfutsi.

²⁰ Ngaletinye tikhatsi lelifu lalike libesetikwelithende lekukhontela emalanga lambalwa; abetsi Simakadze angawatjela kutsi akeme, bese ayemisa atsi angawatjela kutsi akahambe, vele atfutse.

²¹ Ngaletinye tikhatsi lelifu lalihlala etikwelithende kusukela kusihlwa kuze kube ngusekuseni, litsi lingaphakama ekuseni, batfutse futsi. Babechubeka bahambe nase kuphakeme lelifu nome ngusemini nome ngusebusuku.

²² Kwakutsi lelifu nalihleti etikwalelithende lekukhontela emalanga lamabili nome inyanga nome umnyaka, ema-Israyeli abechubeka kuhlala lapho, angatfutsi; kodvwa lalitsi lingaphakama, nawo vele atfutse.

²³ Simakadze abetsi angawatjela kutsi akeme, nawo eme, atsi angawatjela kutsi akahambe vele nawo ahambe, alalela umyalo waSimakadze ngesandla saMosi.